شَعرِك يالون الرّيح عصام يوسف

شَعرِك يالون الرّيح

عصام يوسف 14/02/2008

قصيدة أخرى عن الشّعر

كتب الشاعر المهندس عصام يوسف القصيدة التالية بعدما قرأ ماجادت به قريحة الشاعرين الكبيرين خليل روكز ومارون كرم وأيضا قصيدة الدكتور إياد قحوش. القصائد كلها تتغزل بشعر فتاة جميل وماقد أثار في أحاسيسهم من شعور.

شَعْرِك يا لَون الرّيح

وِتْعتّق...

يا جرح تِمِّ الورد

وِتْفتّق!!..
نازِل مِتِل شي خْيال..

مارِق مِتِل مِرْسال..

طالِع مِتِل شي مَمْلَكي

بالبال..

أخْوَتْ مِتِل نَيْرون

أهْوَج مِتِل

كانون

كِلّ ما تْغَبّر مِتِل
شي عتّال
بِتْنفّضي نْجوم السّما

عَنّو

آخ!!!.. لولا

بْتَعرفي إنّو ؟؟؟

لون الحَلا مْنِ الورد

ما بْينْشال!!!..

يا شَعرك!!..

نْزول الشّتي

بالْجِرْد

بِيْجَرّح خْدود السّما

تِجْريح

مِن شَعرِك بْيِطْلَع

قَصايِد وَرْد

وْمِن شَعرِك بْيِنْزَل

مَسيح الرّيح

لولا وِصِل عا خصْرِك

بْيوصَل ربيع
إيد الزّهر بِتْجَمّعو

بْجِرن النّدي

مِتْل الصَّبيع..

بْتِمْرُق عَ خصر

الْمَوقَدي

بِتْكون عَم تِقطُف دَفَا

بْتِقْطُف مِنِ الْجَمْر

الغَفا

يا شَعرِك الْ مِرْتاح

عَ كْتـافِك

بيخرْبِط الألوان..

شي بْيِفْرَح بْنوّار

شي بْيِزْعَل بْنيسـان

بْيِسْبق عَ نَهْر الشّوق

صِفْصافِك

مِنْ كِتر ما جوعان

مِنْ كِتر ما عطشان

بْيُوصَل عَ وِجِّك

عَ التّعَب هِلْكـان

بيْصير يِتـْنقّل

عَلَى ضْفافِك

يا كُل خْدودِك

يِشْرب شْفـافِك

***

مْوحّد مْتلّت

عصام يوسف 11/01/2008

شو بْحِبّ كلّ نْهار

إخلق بِلَون جْديد

شي أحمر..
عْلا شْفـاف..
شي ليلكي .. شال
انْرسم عَ كْتاف
شي أصفر عْلا غْياب
شي أزرق عْلا موج..
مِنْ غِيّاب
شي أخضر عْلا عْيون
حِلْوِي متل كانون

يْلبِّسْ دَفاها تْياب...

وْما بين لون ولون
غيِّرْ مَسار الكون
إطْلع عَلى درْجي
إنزل عَلى درْجي
غيِّر وْبدّل متل
جُوهَرْجي..
***

الشّاعر إذا تْكَرّر
ما فيه يِتْحرّر
ما فيه يِزْرَع ورْد
بالمِرْجي
ما فيه يِطْلَع
عالسّما درْجي
ما فيه متل العطر
يِتْفلّتْ
انْ ما انْداق خمر
قْصايْدو
مْتلّتْ
مِتِل الله
موحّد .. متلّتْ

حَلا مِنُّو.. وْ فِيْه

عصام يوسف 03/05/2007

بْهاك الصَّحو
الْ مِنْ وِجّ عِيْنَيْكِي شَهَقْ
وْ لَهْفِةْ نَهِرْ
شِي مِنْ صَلا شِي
مِنْ حَبَقْ
صارُو الْقَصايِدْ يِخْلَصُو...
شو بْيِكِتْبُو حالُنْ عَ وَرْدِةْ؟
والْعِطِرْ عَبَّا الْوَرَقْ..!!

ما ضَلّ في إلْهُنْ
مَطارِحْ عَ السّطُورْ
وْكِلِّ الْوَرَقْ
شِيْ خْصُورْ
شي غَنْجِة خْصُورْ
وْيِحْتِرِقْ حِبْرِ الْحَكِي
بْتِمِّ الزّهُورْ
كِلْما النِّدِي
عا آخِرِ الْوَرْقَه مَرَقْ
شو هالنِّدِيْ
يِكْتُبْ .. وْإنْتيْ ناطْرَه
شو خاطْرا بْبّالُو
تَ يِكْتُبْ خاطْرة..؟؟
حْبُوب النِّدِي
بْسِرْقِةْ حَلاكِي شاطْرة
وْ أحْلى الشِّعِرْ
يَلِّـيْ مْنِ الْوَرْد انْسَرَقْ
نِقْطِةْ نِدِيْ تُوْقَعْ
مِنِ الْوَرْقَة بْحَنَانْ
تِنْزَل عَ وَرْقة تَانْيِة
يْضِجِّ الْمَكانْ
مِتِلِ الْ كَأِنُّو
بْتِعْزُف بْيانُو كَمَانْ
وْبيْن الْمُوسيقَا وِالشِّعِرْ
قَلْبي احْتَرَقْ
بَخّورْ فَوق الْمذبح ..
وْوِجِّكْ عَبَقْ.

» عصام يوسف طوني شلهوب
» توقيع كتاب عصام يوسف
» محاورة مع الشاعر عصام يوسف
» صفحة الشاعر عصام يوسف
» سؤال للمبدع عصام يوسف بكل محبة