لاقيني خيي بو شربل

سلام خيي يعطيك العافيه
حبّيت تصير بيناتنا جوله ولو ع الخفيف

سليمان رح حييك يا شاعر ورع = رغم الدهر يللي على عتابي ضرع

ومش كل مين خمور هيصاتو جرع = يخمّن لوهمو كون بيلالي اخترع

نهجي بصيد بواشق الحنكه شرع = سهامي معاني قوس افكاري برع

من هيك شو خايف عليك بعركتي = تتعب الطب يقول سبّبلو صرع

* * *

سفر السما حاوي ملمّات السرع = وإيمان حلمي كتير حاوي لو زرع

كلمة صرع خربان يا هولو اخترع***وسم الأفاعي لقّ بالكاسي وكرع
الراكب حمارة يا علي غير السرع***بيضل متلك بالوحل بين التـِّرع
دماغك سميك شعير حتّى ما انزرع***من هيك راسك فج ما بيحمل صرع
شو جابك لسبع الفيافي يا صبي***بالدّور...!! خلفي صفّ عاسحب
القِرع

خلّيك ع قبالي تروك اللي انمحى = ي مشحتر النيّه بزفت المصلحه

جايي أنا بريح التحدّي مصرّحه = تا ادعسك يا عقربه ونتّف لحى

وما كان يعطيك العباره مسلّحه = بالفلسفه لو سميك راس ل م استحى

من كتر ما مسبوع شفتك بالقصيد = حربك دخلت بدون فرض ومسبحه

* * *

سوسو سبع خرفان شو هـ النحنحه = وأضعف من االخرفان همّه مكرسحه

انا كتير سعيد بالحوار معك خيي سليمان

وطبعا الهجوم بس بالشعر

وانا متاكد من روحك الطيبه لهيك

ما رح يصير بيننا زعل

بحييك من قلبي خيي

نفسك بروح الشتم ليش مسلّحة***واللي انكتب عا الخد
بالكفّ..؟ انمحى
شو لاك قلّي ...؟بالسفاهة مصلحة***هذّب ..بيوتك عيب..!! مات اللي استحى
خليّك شاعر ذوق وردة مفتّحة***ألّا.. اذا بتحب ..!!شعر الشرشحة
يا بطلّعك عا الغيم تا تشوف السما***يمّا بتبقا بالمواقع ممسحة

نزال عا القعر غمّق

ما كان بدّي بفرد مسحه تنتهي = لكن براقش فيك عوره بتزدهي

وما زال كل م غزلت لمعه بتشتهي = يسمّيك فصل الذوق سارق أشبهي

شاعر انا بنفحات أمري والنهي = وانت المعتّر بالخساره بتلتهي

وعا قد ما تطلع وتشمخ ع الغيوم = رح فركشك تنزل وتغرق بالسهي

* * *

ي حروف بمجامر نبوغي تأوّهي = وي جروح عا أرض الفدا بتتألّهي

حكيّت راسك ليش يا شب البهي***وبسوالفك بلّشت تلعب تلتهي
عا الغيم خدتك تسرق الشعر الشهي***وتشوف مجد القافية ووين النهي
مسح الأرض علّم جبينك يزدهي***وغيم السما عرش البلاغة الأبهي
كل البيبلّش يمسح ويجلي صحون***متل الخدم بالبيت بدو ينتهي

ي ملفّق حكايات من عين الضرير = توقّى سياط العاصفه والزمهرير

ولو كان سرّ المجد بالشهد الغزير = من الغيم بعدو بحضن موجاتي أسير

بحر الوفا والتضحيه المتلي خبير = وبالفعل مش بالصفصفه يا شكسبير

الأشرف إلي كون الخدم اتعب وكد = ولا كون متلك شي صنم مالي ضمير

* * *

سليمان عا منهج هدى التفسير سير = ما فيك تصبح لو حملت جنزير زير

وقوّال ضدّ مواقف التقصير صير = مش حلم ماحل للأمل تجمير مير

محمد صدق لم قال عنّك شو فقير***ضليّت عاشق صفصفي وبعدك زغير
يا سلحفات الشعر مش ممكن تطير***قلّة مروّة عندك وقلّة ضمير
شامخ شمخ بالمنتدى وصفّا خطير***ومحمدعلى الغيم عم يغزل حرير
ألا أنت ضليّت طش المنتدى***غيوم البلاغة عليك ما شتّت كتير

سليمان صابك متل زغلول الأبي = بتشقلب الأفكار في هـ التجربه

شو باك ضايع عا دروب الموهبه = تا صرت عم تقشع الوزّه أرنبه

قلتلّك المرجع أنا يا هـ الغبي = للغيم وبقلبي كنز فطنه ربي

وم بيشمخو من كل شعّار الزجل = الا اذا نزلو بعركة ملعبي

* * *

لا تنبغت وتخش درب مصعّبه = وللمستحيل ان كان بدّك من عبي

ان جبت السلاحف للمعنّى يا صبي = بجبلك جمل يقرا بفنجان النبي

بجبلك جمل يقرا بفنجان النبي

اذا بتريد وضّح ما فهمت خيي علي

شعرك غموض وليش تا زكرت النبي***بجملة ما ألها محل معنا يا صبي
نقّي قوافي مهذّبي ومدهبّي***ولا تضل تزحف بالمواقع دبدبي
بتمسح بتجلي صح شغلة متعبي***ومنّي نصيحة تروك ها النت اختبي
وخيّط حضن ولبوس عا الجسم الحلو ***عم يطلبو خدّام خبرة بّو ظبي

يعطيك العافيه خيي سليمان

لو تنتبه لصدر البيت بالزوده

انا جبتها على انها من المستحيلات

ان جبت السلاحف للمعنّى يا صبي = بجبلك جمل يقرا بفنجان النبي

يعني ما هي جريمه ولا هي غامضه

واحلى تحيّه يا معلّم

منرجع ع ذات القافيه ت المسكبه = بالعطر تمسح كل همّ ومتعبه

وزعلان من حيث القوافي ملهلبه = حقّك عليي يا جنين الموهبه

بتعب أنا كرمال إرضي كل نبي = واكسب رضى الله بنوايا مهذبه

وعا قد م تعلّي وشموخك يخدعك = بخيّطلك الأكفان م بخيّط عبي

* * *

شو وصّلك يا سوس حقد وسبسبه = تنخر بصحرا البطش ديل العقربه

بزحف وبحفرلك ي شيخ الكركبه = جوره تساع شكالتك المعطّبه

خيّط كفن والبس عباية مقصّبي***وزلغط معي غنيّت ...؟صلّي عاالنبي
قبلك مرق شعّار عبّوا المكتبة***وتركوا اثر عا النت سمعة طيّبي
ألًا انت ضليت نيقة يا صبي***وما تركت ألّا الصفصفة والسبسبي
ويللي ملخ عاالنت رقبات الأسود***ما بيقلبل يفرفك دينين الأرنبة

يا هامل الموضوع بكفي حوربه = اشمخ وانزل مطلبك مش مطلبي

ي فراطة اللي بهدلو بالمكتبه = بجكّ الحكي من دون صور متهيّبه

ويا مالخ أسود بنوايا مرعبه = بعرف انا كيف هدست يا هـ الصبي

هيدا لأنها مربّطه بقلب القفاص = وغر هيك ركّعتك ع ضفر الأرنبه

* * *

شموخك ي حور العقم طيش وملعبه = نزولي بحبقه ونعنعه شو طيّبه

المتعجرف بمشحة علوّ بيختبي = واللي تواضع حمل سمعه طيّبه

سبع البيملخ سبع ..!!!سبع بيسبعك***وبيصر يمشي البول...يا عوعو معك
وما في دوا تا توقّفوا رح ينفعك***خوفك زحف عا الأرض بدّو يوقعك
الغشّوك أنّو السبع نايم أو انوعك***هودي جماعة مأكدّي عم تخدعك
ضفر الأرانب حك جلدك بالزجل***والسبع بس السيرك فيه بيجمع

بعتزر عا كلمة بول معليش فينا نبدلها بكلمة مي

بسيطه ولا يهمّك خيي سليمان

وآسف على التأخير بنشر القصيده انشغلت كتير

يمكن طوّلتا شوي معليش تحمّلنا

وان شاء الله تعجبك

هلا سليمان يعطيك العوافي = ع خبصة شعرك وعجز القوافي

لوانّو الخوف ع جروحي تزنّر = م كنت قشعتني ع النت لافي

انا يا صاحبي للبطش عنتر = زمان اليوم عا ابعد مسافه

ولأنّي مخوّف الشعّار جمّر = الحقد بقلوبهن داخون صافي ( شعّار منطقتنا )

وهربهن ضل بالحجّه مغبّر = وقلبي عليهن من الذوق صافي

انت متوعّك ونايم مكسّر = متل شعرك ودابك بالتجافي

وانا بالفجر زاحف ع المكبّر = ت وعّيك بنسيمي والرهافه

لحتّى تفيق ما تبقى مخدّر = وبيكفّي تضل ع الأمجاد غافي

انا حبّة قمح تا جود اكتر = زحفت بأرض ركبتها النشافه

ومع الإيّام صرت بخير بيدر = سنابل طيبها ع الكون طافي

بميولي قهرت ريح جنون زمجر = بشموخو وكل شي عندو كثافه

وانت عا قد ما تشمخ وتكبر = بلايي الجوع ضانيك بسخافه

انا جدول عطف بالزحف بكبر = بروحي سقيت زنبقة الحفافي

انا ايمان بزحف دوم بسهر = بقلب الفلسطيني الجرح شافي

انا مقاوم بزحفي الموت جنزر = بغزّه جيش شامخ ع المضافه

عملّو من الطفالى بكل معبر = اللحم والدم صينيّة كنافه

واذا بالسيرك يا سوسو تذكّر = شو فضل الزحف يا خيّ الثقافه

انا بمواهبي مروّض غضنفر = بتمّو بزحف وما في مخافه

وانت مع كم قرده يا مشحّر = كمشوك الرفاق بعزم كافي

بشموخ وهيصتك تنكيل أزعر = حرقت الخير ضجّرت المطافي

بسحق الناس كان شموخ هتلر = ونهيه الإنتحار من الخسافه

وشمخ عا روح فادينا وتاجر = كفر يوضاس وتعلّق تلافه

وبزحف العنكبوت الغار سكّر = حمي أشرف نبي من شر صْلافه

نزل يزحف الوحي وما تأثّر = ت يهدي الناس طه وعن رفافه

وانت شامخ جرم للمجد دمّر = وقسي ع الزاحفين بهـ الخلافه

وانا نخزة ضمير بحق حضّر = سلم عطرو بكمّ الوعد دافي

لهيك الزحف من الشموخ أطهر = واذا شموخ اليهودي حلي بعينك

اتركني بزحف ارضي والعفافه

شكرا ع الجوله

وتحيّاتي يامعلّم

يا بن خربان أتعب عا القصيدة***وبلا ما تصفصف قوافي زهيدة
تعلّم كيف شامخ صار يسطع***بجوّ المنتدى بفكرة جديدة

ومُحمد نار بالموقع مولّع ***بيوتو من عند الله فريدة
وانت ضليّت زيز بقلب موقع***التهى بالصفصفة بشهر الحصيدة

نقيقك بالزجل فزّع الضفدع***غموض القافية ولون العبيدي
وانا ما كان بدي الكف يفقع***عا خدّك قبل ما تحمى الحديدة

قالو الناس بو شربل تسّرع***ونزل تا يحاور الخلقة البليدي
قلت معليش قصدي الضو يطلع***ما في صياد بيوفر طريدة

انا النهر النزل من جرد اصلع***كتبت الورد بشفاف القصيدة
وسقيت النت حتى صار أروع***وصدر متعمشق بورد النبيدي

انا شاعر من الألهام بشبع***بغزّة بشعر بأم الشهيدة
وكلما يطلق المحتل مدفع***دموعي تركض تغّسل نهيدي

وما زالك مع ابو شربل بتطمع***توصل للمجد وتبوس ايدي
هدّي بمشلح الكلمة لا توقع***قبل ما يجرفك برقي ورعيدي

انا وعمّار كلما شعر نسمع***النفس بالروح بتصفّي شريدي
وتاتطلع موهبة جديدة بنفقع***متل شمّوخ صعبة بلا حسيدي

ومتل ما علّم سميّي وطلّع***طيور الموهبة البقيت وحيدي
انا عا النت بدّي ضل مرجع***علّم عا الغنا طيور المعنى
لها الأسباب ما بسكّر بريدي

حلو يا علي في تقّدم بس متل ما قلك محمد نقّي شعرك من الغموض ولا تتسرع اكيد انتي سريع لو بتتأنى بيطلع معك شي أجمل
وهلق يا شباب بنطلب بأسمي وأسم علي تهجمو علينا ولا يهمكم ما في زعل نجنا عيلة وحدي وما لازم حدا يزعل من النقد
لأنو وقت بينتقدوا الشاعر بيصير يعطي شي اجمل وتحياتي للجميع
ابو شربل
وهلق انطرو العركة مع باشق من سوريا بيني وبين شادي موسى