صفحة للتعيق ع سليمان وعلي...

سليمان ممتاز جدا...... بحييك من كل قلبي... ردودك ممتعة وبتفوت عالقلب بلا استئذان..."بدون مجاملة"....

علي عامر.. حلو بس في عندك ثغرات كثيييرة... بتمنى ما توخذ الرد بعنجهية.. خذو من صديق عم ينصحك...
شوي شوي عالردود فكر بالرد مرة ومرتين وثلاث ما حدا لاحقك بعصاي... وبرضو شعرك حلوو كثير....

سليمان ..
بالرد الاخير عندك غلطتين....... كسر صغير بالشطر الثالث "انا متاكد انو خطا مطبعي"
وكلمة "معك" مذكورة مرتين.....

انشالله اني كون غلطان.......

تحياتي وشكرا كثير...... محمد خطيب "تلميذك"

سليمان كتب:: سبع البيملخ سبع ..!!!سبع بيسبعك***وبيصر يمشي البول...يا عوعو معك
وما في دوا تا توقّفوا رح ينفعك***خوفك زحف عا الأرض بدّو يوقعك
الغشّوك أنّو السبع نايم أو انوعك***هودي جماعة ضدّك ومنهم معك
ضفر الأرانب حك جلدك بالزجل***والسبع بس السيرك فيه بيجمع

بعتزر عا كلمة بول معليش فينا نبدلها بكلمة مي

الغشوك انو السبع نايم او انوعك
بعتدقد انو ما في كسر اذا منخفف لفظ الواو بكلمة او....

بس كلمة معك مذكورة مرتين

mohamad kh كتب:: سليمان ممتاز جدا...... بحييك من كل قلبي... ردودك ممتعة وبتفوت عالقلب بلا استئذان..."بدون مجاملة"....

علي عامر.. حلو بس في عندك ثغرات كثيييرة... بتمنى ما توخذ الرد بعنجهية.. خذو من صديق عم ينصحك...
شوي شوي عالردود فكر بالرد مرة ومرتين وثلاث ما حدا لاحقك بعصاي... وبرضو شعرك حلوو كثير....

سليمان ..
بالرد الاخير عندك غلطتين....... كسر صغير بالشطر الثالث "انا متاكد انو خطا مطبعي"
وكلمة "معك" مذكورة مرتين.....

انشالله اني كون غلطان.......

تحياتي وشكرا كثير...... محمد خطيب "تلميذك"

قصدي قول بالسطر مش بالشطر

ليش ما فيي عدّل المشاركة؟؟؟؟؟؟

التكرار عندك حق صلّحتو وريت***كل اللي متلك بالزجل عاالويــــــب سيت
بس الكسر ممنوع عندي بالزجل***بتنقّص ايدي قبل ما اكسر البيت

بالنسبة للتكرار القافية عندك حق بس الكسر رجاع فهام البيت منيح انوعك اي وعكة صحية ههههههههههه ألمت بالأسد

ابدا اخي محمّد ولا يهمّك ما في مشكله

شكرا كتير الك

وان شاء الله تجمعنا جولات التحدّي اذا ما عندك مانع

لانو اخر مرّه كتبنا فيها كانت زمان كتير ع الماسينجر

تحيّاتي

سليمان كتب:: التكرار عندك حق صلّحتو وريت***كل اللي متلك بالزجل عاالويــــــب سيت
بس الكسر ممنوع عندي بالزجل***بتنقّص ايدي قبل ما اكسر البيت

بالنسبة للتكرار القافية عندك حق بس الكسر رجاع فهام البيت منيح انوعك اي وعكة صحية ههههههههههه ألمت بالأسد

تسلم تسلم خيي سليمان.. تلميذك انا....

وانت برضو يا ريت كل الناس تقبل النقد مثل ما انتي بتقبلو...
===============
وخذها بالشعر شو يعني انتي احسن مني Razz

سْلَيْمَان!! شُكْرَاً إلَك عَ الرَد الحِلُو = شِعْرَك حِلُو يَا صَاحْبِي وْمَا أجْمَلُو
يَا رَيْت كِل النّاس مِثْلَك يَا أخِي = تِسْمَع لَ نَقْدِي مِثْلَك وْتِتْقَبَّلُو

================================
تكرم عيونك يا علي.. من عيون.... انت عندي بحوار.. مش عيب هذا رح اعتبرو امر منك...
وبكرا اذا ما خلص عليك سليمان انا بكمل عليك محلو..
وخذها بالشعر انتي الثاني....

بْمَلْقَاك مَع سَلْمَان لازِم تِرْتِقِي = وْمَهْمَا بْتِتْمَشْكَل آخِرْتَك تِتِّقِي
بُكْرَا إذَا مَا خَلَّص عْلَيْك سْلِيمَان = بْكَفِّي أنَا عَنُّو مَتَى رَحْ نِلْتِقِي

حلووويا علي انا عجبتني كتير مع انو بعد الأحيان ما بفهمو
ومنني قبال ها النقروشة

حبيتك بالشعر كتير
وابياتك ورد وتصوير
خلليك مثابر عا الشعر
شاعر لح بتصففي كبير

وامما انت يا سليمان
لوما لسانك بفراشه
كننا بنقللك شربان
من لبوة شعر القصدان
موش من لبووة غششاشي

حلو بتفششوا الصمميم
خييكون امطانيوس

قصيدة سليمان أكثر من رائعة، وردها مزلزل، ولكن هنا يا سليمان لم أجد في قصيدة علي أي غموض، ربما في غيرها!

اخواني الشعراء اخواني القرّاء اخواني النقّاد واعضاء واداري المنتدى عامة، تحية طيبة وبعد!...
لقد شاهدنا حوار اكثر ما يقال عنه "ماشي حالو مش بطّال"، وفي ما يلي نقد بسيط "قابل للتصحيح" للابيات التي كُتبت في هذا الحوار "ارجو تقبّل النقد بروح رياضية":
"خلصنا فصحى بدنا نكتب بالعامية"..
علي عامر:
سليمان رح حييك يا شاعر ورع = رغم الدهر يللي على عتابي ضرع
ومش كل مين خمور هيصاتو جرع = يخمّن لوهمو كون بيلالي اخترع
نهجي بصيد بواشق الحنكه شرع = سهامي معاني قوس افكاري برع
من هيك شو خايف عليك بعركتي = تتعب الطب يقول سبّبلو صرع
* * *
سفر السما حاوي ملمّات السرع = وإيمان حلمي كتير حاوي لو زرع
===
هالبيت فيك تقول عنو بداية غير موفقة.. لانو يا صاحبي انتي عامل القافية بحرفين وعشان هيك لازم يكون الحرفين بكل الكلمات نفس التشكيل وهاي مش موجودة عندك..
ورِع.. ما بعتقد انو يكون في فتحة ع حرف "ر" لانو كلمة ورَع مش سمعانها قبل بمرة.. عشان هيك ممكن تكون موجودة وانا ما بعرفها..
جرَع – اخترَع – شرَع – برَع – صرَع - سرَع – زرَع
ملاحظة: كلمة ضرع ما اسمعتها قبل بمرة وما بعرف كيف تشكيلها..
وثاني شي هاي الابيات فيها غموض انا ما فهمتها ممكن يكون غيري فهمها "انا عم بحكي عن حالي":
يخمّن لوهمو كون بيلالي اخترع - سهامي معاني قوس افكاري برع - سفر السما حاوي ملمّات السرع..
==========
سليمان:
كلمة صرع خربان يا هولو اخترع***وسم الأفاعي لقّ بالكاسي وكرع
الراكب حمارة يا علي غير السرع***بيضل متلك بالوحل بين التـِّرع
دماغك سميك شعير حتّى ما انزرع***من هيك راسك فج ما بيحمل صرع
شو جابك لسبع الفيافي يا صبي***بالدّور خلفي صفّ ع سحب القِرع
===
هالبيت فيك تقول عنو بداية حلوة ل سليمان..
بس انا مش ملاقي فيو جواب ل رد علي.. ممكن الجواب يكون بين السطور وانا ما فهمت المضمون ل هيك ما لقيتو..
==========
علي عامر:
خلّيك ع قبالي تروك اللي انمحى = ي مشحتر النيّه بزفت المصلحه
جايي أنا بريح التحدّي مصرّحه = تا ادعسك يا عقربه ونتّف لحى
وما كان يعطيك العباره مسلّحه = بالفلسفه لو سميك راس ل م استحى
من كتر ما مسبوع شفتك بالقصيد = حربك دخلت بدون فرض ومسبحه
* * *
سوسو سبع خرفان شو هـ النحنحه = وأضعف من االخرفان همّه مكرسحه
===
هالبيت ماني عارف شو بدي قول عنو.. الغموض موجود وبكثرة، وهاي الابيات اللي ما قدرت افهمها ممكن اكون انا مسطل الليلة ومش فاهم اي وممكن الابيات بالحقيقة غامضة "ما بعرف"
ي مشحتر النيّه بزفت المصلحه - جايي أنا بريح التحدّي مصرّحه - حربك دخلت بدون فرض ومسبحه...
وبرضو بيت "تا ادعسك يا عقربة ونتف لحى" اذا بتدعس ع العقربة بتقرصك...
وهالبيت "وما كان يعطيك العباره مسلّحه = بالفلسفه لو سميك راس ل م استحى" فيو انقلاب كبير... اذا بتتمعن بالبيت مليح بتطلع انتي اللي ما بتستحي... او انا مش فاهمو...
==========
سليمان:
نفسك بروح الشتم ليش مسلّحة***واللي انكتب ع الخد بالكفّ..؟ انمحى
شو لاك قلّي بالسفاهة مصلحة***هذّب.. بيوتك عيب..!! مات اللي استحى
خليّك شاعر ذوق وردة مفتّحة***ألّا.. اذا بتحب ..!!شعر الشرشحة
يا بطلّعك عا الغيم تا تشوف السما***يمّا بتبقا بالمواقع ممسحة
===
هالبيت ما فينا نقول عنو غير الله يسلم ثم اللي قالو.. بالرغم من التجريح البسيط الموجود.. بس طبعا بما انو علي اللي بلّش بالتجريح ما فينا نحاسبو ل سليمان.. بحييك من كل قلبي ع هالبيت..
==========
علي عامر:
ما كان بدّي بفرد مسحه تنتهي = لكن براقش فيك عوره بتزدهي
وما زال كل م غزلت لمعه بتشتهي = يسمّيك فصل الذوق سارق أشبهي
شاعر انا بنفحات أمري والنهي = وانت المعتّر بالخساره بتلتهي
وعا قد ما تطلع وتشمخ ع الغيوم = رح فركشك تنزل وتغرق بالسهي
* * *
ي حروف بمجامر نبوغي تأوّهي = وي جروح عا أرض الفدا بتتألّهي
===
الغموض ما زال موجود.. وبتمنى من علي لما يشوف النقد يشرحلي كل الابيات اللي انا حاططها لانو ممكن يكون الرد حلو وانا مش فاهمو عشان هيك شايفو مش حلو.. والغموض بهالابيات:
لكن براقش فيك عوره بتزدهي – "يسمّيك فصل الذوق سارق أشبهي" -
رح فركشك تنزل وتغرق بالسهي - ي حروف بمجامر نبوغي تأوّهي..
هذا البيت لحالو بدو مليون عبقري ل يظبطوه وما رح يظبط معهن.. "يسمّيك فصل الذوق سارق أشبهي" كيف اتفقو كلمة سارق وكلمة اشبهي مع بعض.. على حد علمي اشبهي للمدح مش للذم.. ممكن يكون علمي غلط بس هيك بعرف.. وبعرف برضو انو كل كلمة باللغة العربية الها اتجاه؛ اما سلبي "ذم" او ايجابي "مدح" وكلمة اشبهي شايفها مشوطة للايجابي.. ما بعرف.... بتمنى لاقي جواب..
==========
سليمان:
حكيّت راسك ليش يا شب البهي***وبسوالفك بلّشت تلعب تلتهي
عا الغيم خدتك تسرق الشعر الشهي***وتشوف مجد القافية ووين النهي
مسح الأرض علّم جبينك يزدهي***وغيم السما عرش البلاغة الأبهي
كل البيبلّش يمسح ويجلي صحون***متل الخدم بالبيت بدو ينتهي
===
مش عارف شو بدي اقول عن هالبيت لانو بصراحة ما في شي ينقال.. كامل مكمل "الكمال لله"..
بس في ملاحظة صغيرة ع اشعار سليمان عامة.. انو انتي بتكتب شو بتلفظ.. انا بقول انو لازم تكتب الكلمة مثل ما هيي صحيحة.. والفظها مثل ما بدك..
مثال:
عا الغيم خدتك تسرق الشعر الشهي... خذتك ومش خدتك..
متل الخدم بالبيت بدو ينتهي... مثل مش متل..
==========
علي عامر:
ي ملفّق حكايات من عين الضرير = توقّى سياط العاصفه والزمهرير
ولو كان سرّ المجد بالشهد الغزير = من الغيم بعدو بحضن موجاتي أسير
بحر الوفا والتضحيه المتلي خبير = وبالفعل مش بالصفصفه يا شكسبير
الأشرف إلي كون الخدم اتعب وكد = ولا كون متلك شي صنم مالي ضمير
* * *
سليمان عا منهج هدى التفسير سير = ما فيك تصبح لو حملت جنزير زير
وقوّال ضدّ مواقف التقصير صير = مش حلم ماحل للأمل تجمير مير
===
هالبيت عجبني من علي... القفلة مرتبة والبيت الاول خيال رائع.. عنجد حلو..
بظل في شوية غموض.. واللي هني:
بحر الوفا والتضحيه المتلي خبير - وبالفعل مش بالصفصفه يا شكسبير –
ما فيك تصبح لو حملت جنزير زير - مش حلم ماحل للأمل تجمير مير..
بالبيت الثالث المفروض فيك تذمو مش تمدحو ل سليمان.. وانتي قلتلو يا شكسبير.. وانا برايي انو هذا مش مدح هذا فخر ل الو بانك تلقبو بشكبير..
==========
سليمان:
محمد صدق لم قال عنّك شو فقير***ضليّت عاشق صفصفي وبعدك زغير
يا سلحفات الشعر مش ممكن تطير***قلّة مروّة عندك وقلّة ضمير
شامخ شمخ بالمنتدى وصفّا خطير***ومحمد على الغيم عم يغزل حرير
ألا أنت ضليّت طش المنتدى***غيوم البلاغة عليك ما شتّت كتير
===
هالبيت حلو ما في عليه حكي... طبعا الخطأ موجود دائما من سليمان.. كلمة سلحفات ما بتنكتب هيك.. بتنكتب سلحفاة.. هيك اتعلمتها بالمدرسة..
==========
علي عامر:
سليمان صابك متل زغلول الأبي = بتشقلب الأفكار في هـ التجربه
شو باك ضايع عا دروب الموهبه = تا صرت عم تقشع الوزّه أرنبه
قلتلّك المرجع أنا يا هـ الغبي = للغيم وبقلبي كنز فطنه ربي
وم بيشمخو من كل شعّار الزجل = الا اذا نزلو بعركة ملعبي
* * *
لا تنبغت وتخش درب مصعّبه = وللمستحيل ان كان بدّك من عبي
ان جبت السلاحف للمعنّى يا صبي = بجبلك جمل يقرا بفنجان النبي
===
بهالبيت على عامر ارتكب خطيئة بحق الشعر والشعار.. كيف الك عين تحكي ع الزغلول وتقول عنو بشقلب الافكار.. لك يا ريتني خشخيشة بدف الزغلول..
وبرضو انك تشبه سليمان بالزغلول.. هذا فخر ووسام بعلقو ع جبينو بين كل الناس.. لانو انتي وانا والكل بعرفو مين هوي الزغلول.. اصلا عيب تحرك لسانك وتخليه يحكي ع الزغلول.. انا اذا لساني بدو يغلط بحق حدا من الشعار الكبار بقطعو قبل ما يتحرك...
شو باك ضايع عا دروب الموهبه... يا ريتني ضايع ع دروب الموهبة.. والكل بتمنو هالشي.. كان لازم تقللو شو باك ضايع عن مش ع عن دروب الموهبة..
وم بيشمخو من كل شعّار الزجل = الا اذا نزلو بعركة ملعبي.. بهالبيت في خطأ مبيين وواضح.. وهو انو م بيشمخو من.. لازم تكون وراها اللا اللي نزلو... مش اللا اذا نزلو.. لانو في من معناتو لازم تحدد من شو... وشو لازم يعملو ت يشمخو.. بتمنى تفهم قصدي..
او فيك تقول م بيشمخو شعار عالمنبر معك = الا اذا نزلو بعركة بملعبي..
او تقول م بيشمخو من كل شعار الزجل = اللا اللي نزلو بمعركة ع معلبة..
==========
سليمان:
شعرك غموض وليش تا زكرت النبي***بجملة ما ألها محل معنا يا صبي
نقّي قوافي مهذّبي ومدهبّي***ولا تضل تزحف بالمواقع دبدبي
بتمسح بتجلي صح شغلة متعبي***ومنّي نصيحة تروك ها النت اختبي
وخيّط حضن ولبوس عا الجسم الحلو ***عم يطلبو خدّام خبرة بّو ظبي
===
هالبيت حلو كثير.. الخطأ موجود بكلمة "زكرت" لازم تكون "ذكرت"..
مدهبي لازم تكون مذهبي..
ما في شي ثاني.. حلو البيت..
==========
منرجع ع ذات القافيه ت المسكبه = بالعطر تمسح كل همّ ومتعبه
وزعلان من حيث القوافي ملهلبه = حقّك عليي يا جنين الموهبه
بتعب أنا كرمال إرضي كل نبي = واكسب رضى الله بنوايا مهذبه
وعا قد م تعلّي وشموخك يخدعك = بخيّطلك الأكفان م بخيّط عبي
* * *
شو وصّلك يا سوس حقد وسبسبه = تنخر بصحرا البطش ديل العقربه
بزحف وبحفرلك ي شيخ الكركبه = جوره تساع شكالتك المعطّبه
===
هالبيت مش بمحلو لانك ما جاوبت سليمان.. قاللك عم يطلبو خدام مين جاب سيرة انك تخييطلو عباي او كفن..ممممم
بالبيت الاول الكلمة الاخيرة.. "ومتعبة" هالكلمة اول مرة بسمعها.. يا ريت لو تشرحلنا اياها او اللي بعرف معناها يقللي...
بالبيت الثاني.. زعلان؟؟ وكيف اكتشفت انو زعلان..؟؟ من وين؟ يا ريت توضح..
البيت الاخير قلنا شو علتو.. وهيي انو طلبك انو تظبط حالك وتروح ع ابو ظبي.. ما بعرف من وين استنتجت تخييط الاكفان..
==========
خيّط كفن والبس عباية مقصّبي***وزلغط معي غنيّت ...؟صلّي عاالنبي
قبلك مرق شعّار عبّوا المكتبة***وتركوا اثر عا النت سمعة طيّبي
ألًا انت ضليت نيقة يا صبي***وما تركت ألّا الصفصفة والسبسبي
ويللي ملخ عاالنت رقبات الأسود***ما بيقلبل يفرفك دينين الأرنبة
===
سليمان انتي رائع.. كل ردودك حلوة... كلها ع الاطلاق.. لولا بس شغلة الكلمات اللي بتكتبها مثل ما بتلفطها.. دينين لازم ذينين.. مش مهم جمال البيت وسلاستو غطو العيب الموجود بهالشغلة هاي...
وبرضو بين البيت الثالث والرابع في نقلة بالافكار... يعني كنت تحكي ع علي ومرة وحدة بلشت تحكي عن حالك.. شوفها وبعدين حاسبني.. لاني عارف ما رح تمرقلي اياها..
==========
يا هامل الموضوع بكفي حوربه = اشمخ وانزل مطلبك مش مطلبي
ي فراطة اللي بهدلو بالمكتبه = بجكّ الحكي من دون صور متهيّبه
ويا مالخ أسود بنوايا مرعبه = بعرف انا كيف هدست يا هـ الصبي
هيدا لأنها مربّطه بقلب القفاص = وغر هيك ركّعتك ع ضفر الأرنبه
* * *
شموخك ي حور العقم طيش وملعبه = نزولي بحبقه ونعنعه شو طيّبه
المتعجرف بمشحة علوّ بيختبي = واللي تواضع حمل سمعه طيّبه
===
بهالبيت اول كلمة كان لازم تقللو يا مهمل مش يا هامل..
بخصوص القفلة فيها اشي مش منطقي.. يعني اللي شارب البحر بدو يتشردق بالسواقي.. وياللي مكلخ رقاب الاسود وحتى وهيي بالقفاص بدو يركع ع ضفر الارنبة.. مممممممم
حور العقم؟؟ مصطلح جديد اول مرة بسمعو يا ريت لو تشرحلي اياه او اللي بعرف معناه يشرحو اذا ممكن..
البيت الثانية بالاعادة.. حلو كثيييير اكثر من رائع..
==========
سليمان:
سبع البيملخ سبع ..!!!سبع بيسبعك***وبيصر يمشي البول...يا عوعو معك
وما في دوا تا توقّفوا رح ينفعك***خوفك زحف عا الأرض بدّو يوقعك
الغشّوك أنّو السبع نايم أو انوعك***هودي جماعة مأكدّي عم تخدعك
ضفر الأرانب حك جلدك بالزجل***والسبع بس السيرك فيه بيجمعك
===
هالبيت... شو بدي قول عنو.. اذا كل الابيات رائعة هالبيت شو بدو يكون يعني.. واضح بيلمع مثل الذهب.. لا شو ذهب الماس او لولو.. حلو كثيير..
وانا لو محل علي بعد هالرد كنت بختم كمان.. لانو ما عاد في شي ينقال.. وهون علي اتصرف بحكمة انو ختم...
==========
القصايد الختامية... نعست كثير.. خلو ليلى تنقدهن عني بكفيني انا هذول..
او بتستنوني ل بكرا...
==========
بتمنى تقبلو النقد بروح رياضية وخصوصا انتي يا علي... وطبعا هالنقد قابل للنقد والتصحيح.. النقد البنّاء طبعا.. ممكن يكون نقدي مش بمحلو بمحلات معينة..
وبالنهاية حوار مثل ما قلنا بالبداية.. ماشي حالو منمرقلكو اياتو هالمرة بس بمرات ثانية لازم يكون المستوى اعلى بكثيييييييييييييييييير...

تحياتي وشكرا لسعة صدوركم.. خيّكو الصغير وتلميذكو "محمد خطيب"
ملاحظة: اذا كان في عندي خطأ مطبعي بتمنى من المشرفين يصححوه..

أنا علقت على صفحة " لاقيني خيي بو شربل" وإذا بي أجد هنا أن محمد استعمل قصايد ثانية لعلي أخطأت الصفحة.

عوافي خيي محمّد

اسف على التأخير

كتير مشغول واخدت فرصه بسيطه

وراجع رتّب اوراقي ومكتبتي

وهلّق تفضّل التفسيرات

1) ورع مع الفتحه ع الراء تعني تقوى

2) ضرع كمان مع الفتحه وتعني خضع

3) برع من البراعه والدقّه

4) ملمّات السرع - سرعة الضوء والصوت والروح والخ من السرع الكونيه

5) بالحرب الإنسان ما بيكون حافي ت يدعس ع قشّه كيف ع العقربه

6) سارق اشبهي المقصود عن الرد بنفس القافيه

7) رح فركشك تنزل وتغرق بالسهي اي من هول الضربه يصاب الخصم بأزمه نفسيّه

عبارة يا شكسبير اجت عن مسخره

9) طبعا هي غلطه مطبعيّه اخي ولازم تكون عن دروب الموهبه ومش عا

10) امّا في البيت

م بيشمخو من كل شعّار الزجل = الا اذا نزلو بعركة ملعبي

قصدت ع كل حال وكل نتيجه من النزله بيشمخو لانن تلاقو معي

وما هم كان ربح - خساره او تعادل

11) متعبه تعني ظروف قاسيه

12) تهمتو بالزعل للاستفزاز نوعا ما

13) بين مهمل وهامل ما في فرق وما فيها لغم اذا فكرك شرد خيي محمّد

14) الحور يا محمّد مالو فوايد وما بيثمر

على حد علمي واذا انت خبير زراعي بالاضافه لكونك شاعر

اجمعلنا فوايدو

15) كنت بدي اعطي بعد معنّى لكن تركتا لجوله تانيه

وما حبّيت نطوّل الحوار هيك مهضوم

لا كتير ولا قليل

وشكرا كتير الك

وتحيّاتي للجميع

علي شكرا كثير ع ردك وع تفاعلك مع النقد تبعي...
بتمنى تتابع معي بالموضوع...
===
"ورع مع الفتحه ع الراء تعني تقوى"
انتي قلت ببيتك: سليمان رح حييك يا شاعر وَرَع، يعني بدك تقللي انو قصدك تقول: سليمان رح حييك يا شاعر تقوى؟؟؟؟؟؟
المفروض ينقال وِرِع مع {كسر} الراء عشان يصير معنى الجملة: سليمان رح حييك يا شاعر تقي....
===
"ضرع كمان مع الفتحه وتعني خضع"
انا شكّيت من مضمون الجملة بانو يكون هيك معناها بس هيك بصير في بُعد كبير بالمعنى يعني بدك تحيي سليمان وفهمناها وشو علاقتها بخضوع الدهر على عتابك؟؟؟؟
===
"برع من البراعه والدقّه"
م انتي قايل: سهامي معاني قوس افكاري برع.. سهامك المعاني وفهمناها هوينة.. وبما انك بينت شو هيي سهامك المفروض منك انك تبيين شو هوي قوسك.. ومش انو قوسك بارع.. {هذا رايي الشخصي اللي بيتقبّلو عقلي مش اكثر}...
===
"ملمّات السرع - سرعة الضوء والصوت والروح والخ من السرع الكونية"
انتي قايل: سفر السما حاوي ملمّات السرع.. ومكملها ب: وإيمان حلمي كتير حاوي لو زرع... هون حطّنا الجمّال.. اول شي مصطلح ايمان حلمي ماني شايفلو اي معنى.. الحلم عندو ايمان؟؟؟؟؟؟؟؟؟؟؟
وثاني شي... ما في مجري للحديث والفكر بين الصدر والعجز...
===
"بالحرب الإنسان ما بيكون حافي ت يدعس ع قشّه كيف ع العقربه "
بهاي معك حق.... فاتتني...
وبهالبيت انتي جاوبتني ع شغلة وحدة بس من اللي انا حاكي عنهن، وباقي كثير ما شرحتو...
وهذا اقتباس ل نقدي بخصوص هالبيت:
" هالبيت ماني عارف شو بدي قول عنو.. الغموض موجود وبكثرة، وهاي الابيات اللي ما قدرت افهمها ممكن اكون انا مسطل الليلة ومش فاهم اي وممكن الابيات بالحقيقة غامضة "ما بعرف"
ي مشحتر النيّه بزفت المصلحه - جايي أنا بريح التحدّي مصرّحه - حربك دخلت بدون فرض ومسبحه...
وبرضو بيت "تا ادعسك يا عقربة ونتف لحى" اذا بتدعس ع العقربة بتقرصك...
وهالبيت "وما كان يعطيك العباره مسلّحه = بالفلسفه لو سميك راس ل م استحى" فيو انقلاب كبير... اذا بتتمعن بالبيت مليح بتطلع انتي اللي ما بتستحي... او انا مش فاهمو..." هون بخلص اقتباسي....
وانت ما شرحت غير قصة العقربة.. طيب والباقيات؟؟؟؟؟؟؟؟
===
"سارق اشبهي المقصود عن الرد بنفس القافية"
القافية بعمرها ما كانت احتكار ل حدا... حتى قوافي العتابا اللي لازم يكون فيها جناس تام مش احتكار ل حدا.. من هيك ما في تقللو سارق.. هاي من جهة.. من الجهة الثانية انا ما سالت ع كلمة سارق انا سالت عن مصطلح "سارق اشبهي".. هذول الكلمتين مستحيل يلتقو مع بعض... سارق ذم واشبهي مدح... وانا وضحت كلامي لاني قلتلك: كيف اتفقو كلمة سارق وكلمة اشبهي مع بعض.. على حد علمي اشبهي للمدح مش للذم.. ممكن يكون علمي غلط بس هيك بعرف.. وبعرف برضو انو كل كلمة باللغة العربية الها اتجاه؛ اما سلبي "ذم" او ايجابي "مدح" وكلمة اشبهي شايفها مشوطة للايجابي.." انا سؤالي عن المصطلح مش عن كلمة سارق...
===
"رح فركشك تنزل وتغرق بالسهي اي من هول الضربه يصاب الخصم بأزمه نفسيّه"
يعني كلمة السهي معناها ازمة نفسية؟؟؟؟؟؟؟
وبرضو بهالبيت في بعد شغلات ما شرحتها واللي هيي:
لكن براقش فيك عوره بتزدهي - ي حروف بمجامر نبوغي تأوّهي..
وبرضو هالبيت " لكن براقش فيك عوره بتزدهي"
اخر كلمتين "عورة بتزدهي" نفس مشكلة مصطلح سارق اشبهي... عورة ذم وبتزدهي للمدح...
===
"عبارة يا شكسبير اجت عن مسخره"
اها هيك توضّحت الصورة اكثر...
وشو مع الابيات هذول:
بحر الوفا والتضحيه المتلي خبير - ما فيك تصبح لو حملت جنزير زير - مش حلم ماحل للأمل تجمير مير..
===
"طبعا هي غلطه مطبعيّه اخي ولازم تكون عن دروب الموهبه ومش عا"
كنت متوقع هالجواب منك...
بس شو مع باقي النقد اللي انا كتبتو؟؟ انا كتبت:
"بهالبيت على عامر ارتكب خطيئة بحق الشعر والشعار.. كيف الك عين تحكي ع الزغلول وتقول عنو بشقلب الافكار.. لك يا ريتني خشخيشة بدف الزغلول..
وبرضو انك تشبه سليمان بالزغلول.. هذا فخر ووسام بعلقو ع جبينو بين كل الناس.. لانو انتي وانا والكل بعرفو مين هوي الزغلول.. اصلا عيب تحرك لسانك وتخليه يحكي ع الزغلول.. انا اذا لساني بدو يغلط بحق حدا من الشعار الكبار بقطعو قبل ما يتحرك..."
انتي تركت المهم ومسكت الغلطة المطبعية اللي كانت واضحة...
===
"امّا في البيت
م بيشمخو من كل شعّار الزجل = الا اذا نزلو بعركة ملعبي
قصدت ع كل حال وكل نتيجه من النزله بيشمخو لانن تلاقو معي
وما هم كان ربح - خساره او تعادل"
المعنى واضح.. النقد ع الصياغة.. انا قلت:
" وم بيشمخو من كل شعّار الزجل = الا اذا نزلو بعركة ملعبي.. بهالبيت في خطأ مبيين وواضح.. وهو انو م بيشمخو من.. لازم تكون وراها اللا اللي نزلو... مش اللا اذا نزلو.. لانو في من معناتو لازم تحدد من شو... وشو لازم يعملو ت يشمخو.. بتمنى تفهم قصدي..
او فيك تقول م بيشمخو شعار عالمنبر معك = الا اذا نزلو بعركة بملعبي..
او تقول م بيشمخو من كل شعار الزجل = اللا اللي نزلو بمعركة ع معلبة.."
وما سالتك عن المعنى انا حكيي ع الصياغة... المنطق بقول انو صياغة جملتك مش صحيح واللا شو رايكو يا نقّاد ويا شعّار...
===
"متعبه تعني ظروف قاسيه"
مش لهالدرجة ثروتي اللغوية ضعيفة.. ومش بحاجة لاعرف شو معناها الحرفي بس ما الها محل هون..
انتي قايل " منرجع ع ذات القافيه ت المسكبه = بالعطر تمسح كل همّ ومتعبه" بتظبط معك بشكل واحد ووحيد بس.. وهوي انو يكون تشكيل كلمة "ومتعبة" بهالطريقة {وْمَتْعَبِة} وهالكلمة مش موجودة او عالاقل انا ما بعرفها...
===
"تهمتو بالزعل للاستفزاز نوعا ما"
ما اقنعتني كثير بهالجواب.. لانك انتي قايل "وزعلان من حيث القوافي ملهلبه" القوافي عادية وما فيها شي زيادة...
ولسا ما جاوبتني ع نقدي بخصوص البيت الاخير:
"وعا قد م تعلّي وشموخك يخدعك = بخيّطلك الأكفان م بخيّط عبي"
ولسا ما اعرفنا شو جاب تخييط الاكفان والعبي للموضوع...
===
"بين مهمل وهامل ما في فرق وما فيها لغم اذا فكرك شرد خيي محمّد"
لا ما تخاف فكري ما بيشرد.. بس كلمة هامل انت اكبر قدر الها بُعد سلبي وفهمك كفاية...
وكمالة النقد لهالبيت ما شرحتلنا اياها...
ما كان لازم ارد عليك.. لانو هيك رح تبيين كانو انا مستقصدك لا سمح الله ومن جهة ثانية انا ما بحب آخذ واعطي بالمواضيع كثير... بس بشرحك ل بعض الابيات زدت الغموض اكثر واكثر وما اقدرت ما احكي... بتمنى ما تزعل مني.. وتجاوب ع كل شي انطلب منك

تحياتي وشكرا كثير..... محمد خطيب

يا عَلي بوجودك المنبر عٍلي
ومحروس من عين العٍنايي والعَلي
ما في علي ما اعّتزْ ب وقفة حسن
وما في حسن ما اعتز بوقفة علي

الأخ العزيز علي
أول شي لازم تفكر شو بدك تقول قبل ما تبلش با الكتابي
بعدين استعرض القافيي اذا مناسبة للي بدك تقولو
ابتعد عن القوافي العويصة لأن اذا ما عرفت توضفها بطريقة صحيحة بتفقد معناها
لأنو هيدا الغموض نا تج عن تداخل هيدي الأمور ببعضا
وخاصة أنو سليمان تركلك مساحات تختار بكل ردي قالها
حدد موقفك من ردة خصمك وابني ردتك على ها الأساس
وخلي المعنى والقوي باخر الردي مش مطلع حلو ونهايي ضعيفي
تحياتي حسن[center]

خيي حسن يا شاعر باوسع مجال = وفيك النبوغ اعتز عا درب الكمال

وشهادتك يلّلي العطر مضمونها = من ورد قلب تعمّد بسرّ الجمال

الاخ المبدع حسن كوثراني

اشكرك لهذا المرور الراقي

والتشجيع

دمت بخير وشعر

لما علي بيمشي على دروب الخَيال
بفية خيالو كلنا منصبح خيـــَــال

ومازال بيتك عامر واسمك علي
بتبقى البلاغة وحدها محكْ الرجال

لا داعي للشكر خيي علي وبلا مُبدع أفضل

"حسن كوتراني"
لما علي بيمشي على دروب الخَيال
بفية خيالو كلنا منصبح خيـــَــال

ومازال بيتك عامر واسمك علي
بتبقى البلاغة وحدها محكْ الرجال

لا داعي للشكر خيي علي وبلا مُبدع أفضل

يا شعر لو شفت الدّني بأسود سود = وحدّ القمر سرّ الوحي موجود جود

عا منبر التعبير دخلك طلّ جود = واشهق مع الدمعات بالكاس الودود

النكهه بتواضع كوثراني كالورود = رهجة مزايا الطّهر عظّملا وجود

وع حدود مملكة الزجل وبوابها = الشعّار عندك يا حسن أوفى جنود

تا تصير يا عامر علي جندي نشـــيط ... دَوِي الصرخة من خليجك ع المُِِحيط
ما بحب أنو يكون شعرك من خليـــط ... زهور وزنابق عاطرة مع أرنــــبيــط
كبْ العويصة وهات بالمعنى البسيط ... ووعي الفراهيدي على البحر البسيــط
ولـــمـا بتــتــرقـــى منعمل اءفتِتـــــاح ... وعمـــّار وسليمان بيقصو الشــــــريط

تابعو... بس انا لسا ما اخذت جواب عالباقيات خيي علي...... انا ناطر جوابك....

اهلا بحسن وشروط خمّرها الصواب = وجايي شاعر حربجي كلّو شباب

بالهمس عامل ع المجرّه انقلاب = وباللمس فارض ع الشمس نار وعذاب

وللخطر عندو عيون عا مدّ السحاب = بترعب شياطين السقر هفوة حساب

ووقت الغزل ع فروض شعري الحد طاب = برقّه وفدا سحر الندى غذا الحباب

وشو ما رح بيطلب الإبداع قوت = بكتّف الدهر بخيط زنّار الضباب

ولي عوده اخ محمّد

اهلا بحسن وشروط خمّرها الصواب = وجاييك شاعر حربجي كلّو شباب

ليش ما في مجال للتصليح
المشكله بلوحة المفاتيح تعبانه شوي اعذرونا

وشو ما رح بيطلب الإبداع قوت = بكتّف الدهر بخيط زنّار الضباب

علي يا ريت تشكللنا هالبيت.......بعرفك ما بتكسر........ بس ما ظبط وزنو معي ممكن انا ما اعرفت اقراه مليح...

تحياتي..... محمد خطيب

المشكلة بصدر البيت.........................

عامر علي خليك صاحب أنــتــبــاه ... وأوفي الشـــروط بدون شك وأنتـــــباه
عصام يوسف كان بــــعالي ســماه ... بجنبك خمس ردات ضييع مــســـــتواه
وخيك أبو شربل مدا الأرحب مداه ... باالكاد غنى الأربعة وعاالدرب تـــــاه
وخيك حــــسن لولا وصل للتالتي ... وفهمك.رح بيمشي بعكس الأتـــــــــجاه

حسن كوتراني كتب:: عامر علي خليك صاحب أنــتــبــاه ... وأوفي الشـــروط بدون شك وأشتباه

عصام يوسف كان بــــعالي ســماه ... بجنبك خمس ردات ضييع مــســـــتواه
وخيك أبو شربل مدا الأرحب مداه ... باالكاد غنى الأربعة وعاالدرب تـــــاه
وخيك حــــسن لولا وصل للتالتي ... وفهمك.رح بيمشي بعكس الأتـــــــــجاه

» بحر الزجل وعلي جعفر
» شحرور الوادي وعلي الحج
» محاورة سليمان وعصام يوسف سألنا على سليمان
» صفحة التعليق على صفحة "صيف الضيعة"
» بين هولو وعلي