حوار بين سليمان طراد وطوني شلهوب

جايي يا إبن طراد طوني لساحتك

تا يشوف شو بتطلع حدود مساحتك

يا زمّ روحك واحصرا ببيت القصيد

يا بالمعنّى تمدّد على راحتك

يا ولاد لمّا بتدخلوا عا ساحتي***بحرق هشيم الولدني بقدّاحتي
وما زال يا أنطون حابب راحتي***أربع شطور كتوب هيك رياحتي
وتا تفوت متل الفلسفة عا واحتي***خلّي بيوتك بالبلاغة ناحتي
اووسّع مساحة لايقة عا فيس بوك***حجم السما والأرض ربع مساحتي

حسبتك ببيت الشعر ساكن ... إنّما

قصدت الحمى وما في حدا بهاك الحمى

حجم السّما طفل وعلى ديّي ارتمى

وحجم الأرض شامة على خد السّما

السّلطان عندو جيش بعروقو دما

والطفل عندو جيش لكن من دمى

وهاك السّما المن شمسها نور الحياة

غير السّما العا ربع ورقة منرسما

شمس الحياة بتنأخد وبتنعطا***وشمس القصيدة خيوطها متل الغطا
عندك سما الشعّار فيها معرْبَطة***وعندك سما فيها النجوم مفرفطة
ومش كل سابح موجة الغيمة امتطى***بِيصير فوق النْت ثابت بالخطا
واللي رسم بالشرق خارطة الطريق***شوّه سما الجغرافيا بها الخارطة

لمّا الجشع بالنّاس حوّلهن دياب

رسموا خريطةْ حرب عا وراق الخراب

ولمّا الوحي للأنبيا الإلهام جاب

لكلّ ملّة دشّروا بعدن كتاب

وهالعمر درب بآخرو يوم الحساب

وحتّى ما نوصل عا جحيم من العذاب

حكيني بخريطة خطّها وحي السّما

وخزّق خريطة خطّها إبن التّراب

كنّا انا ويّاك صحبة وخوش بوش***ومين الخلفنا غير خدعة جورج بوش
أبن السما هد الزعامة والعروش***وابن الفنا باع الطهارة بالقروش
وفجر الحقيقة بالغرب وجّو بشوش***وحكّامنا بالشرق شجرة بلا شلوش
هنّي ببيبيعو ترابنا...!!! ونحنا الأمل***نحفظ وطنّا بالعيون وبالرموش

وسعوا الساحات والمسافات اللي ضاقت بشاعرين كبار من حجم المسافة

وين البلاغة والأدب ؟! زهّقتني

وذكرتني بأوّل زمان الولدني

****

سليمان حتّى محاورتنا تغتني

لا تكون " بوش " بحقّ منبر موطني

الريشة البإيدي بدير شعري مرهبني

وحنية قداسة عا وراقي بتنحني

وحتّى وطن الحروف كلمة ينبني

صهيون جهلك لازم نشوفو فني

بتحكي معي وعا منبري بتطمح تكون

من واجباتك تخلق بحجم الدني

مررت من هنا لحظة سرقتها من الزمن، لحظة خطفتها من وقتي الذي ضاق في بعد أن وجدت الدقائق تتسارع في حياتي وكأنها لم تعد ملكي.
منتدى برحليون منتدى يرفع الجبين، ويجعلنا نحن البرحليونيين نفتخر به، عالمين أن البرحليوني كان وما زال معطاء في الشعر والأدب والتاريخ. في الدين وفي الدنيا... وكل شاعر في هذا المنتدى لنا فيه وله فينا المودة والمحبة وحسن الجوار ولو على هذه الصفحة الإلكترونية العريقة.

أعجبني تعبير للآستاذ طوني شلهوب في ريشته التي ترهبنت في دير شعره، وأخذت الأصالة المنشودة في العطاء الشعري، فسكبت " حنية القداسة" على الورقة، حيث جسدت الفكرة أنغاما وشعرا تطرب له الاذان، وتتوقف عنده العقول لتتأمل في معانيه.
جميلة كلماتك يا طوني.

kbir ya tony kbir

يلّي بيخلق أرز...؟ما بيطمح يكون***حبّة ندي عا وراق زهر الزيزفون
بترسم سما..!!! بتخلق دني ...بتعقد جفون***بالمستوا..؟بتضل يا أنطون دون
وما زال طالب فلسفة يا أفلطون***ركّز على موضوعنا وحاجي جنون
واللي بيخلق كون متلك عا الورق***غير الرسم بالشوق عا وراق العيون

[

b]حتّى تواجه شاعر عيارو تقيل

غوص بغياهب كون إسمو المستحيل

*****

تركني قلم عا وراق أشعاري بميل

وبرسم حلا .. بيشبه حلا .. رسْمو الخليل

وخلّيك يا سليمان فوق الجفن ... ميل

ورسوم عتم ينوّر الطرف الجميل

عندك حلا خالد ... بيبقى ألف جيل

وعندك حلا فاني ومدى عمرو قليل

عمري بعمر الحبر عا سطور الورق

وعمرك بعمر الكحل عالجفن الكحيل[/b]

أكتب بموقع شعرنا وحاجي شكوك ***نوع الحبر عا النت مش رح يسألوك
عمرو الحلا ما كان يا حبّوب لوك***وما في جمال بها الدني من دون توك
وان كنت متل الحبر بكتاب الملوك***ما فيك تخلد عا الورق لو ألّهوك
محّايتي بتمحيك ما بتترك أثر***تا تحل لون قصايدك عا الفيس بوك

أنا والرّيح بذكر بالبداية

شقاها كان يلعب مع شقايي

ولمّا كبرت دشّرتا لأنّو

مداها صار أضيق من مدايي

وعصف فيّي جنون الصّرت منّو

إهدي الكفر عا شعاع الهداية

ولا تسألني إذا الأرياح جنّو

أنا ما اعتدت أتطلع ورايي

**

محّي قصايد الورقات حنّوا

ومحّي من كتاب الدّين آية

إذا الشّاعر بجهلك خاب ظنّو

بألله كفرك بيعمل نكاية

**

كل ما النّاس من طوني تمنّو

بلاغةْ شعر مكتوب بعناية

بلمّ دموع إمّات البحنّو

وندي المن شق فجر الصّيف جايي

وبملي الجرن بجروح البإنّو

وفيه بعمّد حروف القراية

**

حكم هالمنبر الشعري وفنّو

عا قلبي وطيبتو بفعل الجناية

إذا بقبل معي المتلك يغنّو

جريمة بحقّ قدري ومستوايي

عيب عليك فكرك ما تسنّو

وَلا يهمّك رجا الكلمة ورجايي

وكل شي يهمّك بهالحرب إنّو

طوني بموقعك مرّة يغنّي

حتّى لموقعك تعمل دعاية

مقابلة موفقة لطوني بين عمر الحبر على الورق وعمر الكحل على الجفون.
قابل هذا الهجوم محاية سليمان.
رد موفق لطوني وتفاخر جميل حيث قال أن مداه جاوز الأرياح.
ولكن كيف سيكون رد سليمان بعدما أدعى طوني أن وجوده في المنتدى يزيد المنتدى قيمة وليس العكس?

يا حبر الريح نشّف عا الصحاري***ويا كحل الليل خلّي العتم جاري

ولا تفزع لو محيك الفجر مرّة***تا يطلع صبحك...!!! تكحّل نهاري

يا بن شلهوب موقعنا مدّرى***ما فيك تسوّق القمح البزاري

انا عواصف عتيّي مستمرّة***وقصيدي كحّل الشعر الحواري

وتا نرجع للتحدي ومر مرّا***عا قبرك قبل ما كحّل حجاري

وتا محّي قصايدك جوّى وبرّا***عملت محّايتي ريح التباري

انا شاعر خيالي الليل عرّى ***ما كان عليك واقع أختياري

ومداري عرّق جبين المجرّة***انتبه يا ليل ما تخط بمداري

انا ان جريّت فوق الريف جرّة***الجمال بيظهر بمظهر حضاري

وانت حبر انسرق من نفس حرّة***رخيص بيندفع حقّك مصاري

يا عارف علقتك بالشعر مرّة***شو جابك للسباع وللضواري

المواقع نقشتي والنت طرّة***ولحد اليوم ما تسجّل فراري

انت دبّور عايش للمضرّة ***سرقت الشهد من نحل البراري

انت لو حامل من الذوق زرّة***ما كنت بتكتب بمنطق تجاري

الدعايي مش ألك لا تبر برّة***وعلى الفيس بوك لا تكتب حزاري

لأنو بينّا انكسرت الجرة***بحبرك بعت قمّتنا العتيدة

ولحد اليوم نهر الدم جاري

سليمان يعطيك العافية. وبدّي أشكر كلّ الإخوان الكان إلن مداخلات مهضومة خلال الحوار، حنّى وكوبيلو، والأميرة ليلى وهاني حبيب القلب.
تحيّاتي

انطون بو علي معك و عتلان هم سليمان تقلو ما تعتل همو الدوى تبعو عندو انت كسور و انا بكسر الكل

سليمان يعطيك العافية. وبدّي أشكر كلّ الإخوان الكان إلن مداخلات مهضومة خلال الحوار، حنّى وكوبيلو، والأميرة ليلى وهاني حبيب القلب.
تحيّاتي

طوني وبو شربل كانو***ملوك النت وفرسانو

وهاني حابب يا أنطون***نكسّرلو الليلة سنانو

*******************
طوني شلهوب المحبوب***بنعتز بشعرو وفنّو

وكلماتو من القمح حبوب***رب الكتبوا والغنّو

شو قولك نبعت مكتوب***لهاني تا نسأل عنّو

بركي بيرجع يا شلهوب***بيدخل عا موقع هيّوف
حتّى نقصّرلو لسانو

رجاع عا الفيس يا هاني حاج تتغنج هههههههههههههههه

تكرم عزيز طوني، أنتو بتستاهلو لهل الأشعار الحلوي، فتطرب لكم الاذان، وألوان شعركم اجمل من الألوان.

» حوار بين شادي موسى وطوني شلهوب
» حوار بين فادي فيـّاض وطوني شلهوب
» شادي موسى سليمان طراد موضوع العنصرية والأنسانية
» اشتراكيه ورأس ماليه حسن كوثراني وبحر الزجل سليمان طراد
» اشتراكيه ورأس ماليه حسن كوثراني وبحر الزجل سليمان طراد