اهلا بخي فادي فياض

هلق يبن فياض عالساحة نزال
اشتاقو المنابر للمعارك و القتال
ان ما كنت قد الحمل يا فادي استحي
الرجال وجه لوجه بيجابه رجال

بجرحك يا هاني بعد ما انفكوا القطب
من سيف فادي اللي على جبينك كتب
بالشعر في وقت الفراغ بلعّبك
متل الرياح العم بتلعب بالقصب

مش انت بتلعب امير المنبرين
مسكين يا فياض حكياتك منين
بعدا كفوفي عا خدودو معلمي
و صارو عا خدو مطبعين الخمستين

خدي وخد الشمس ذات الإرتفاع
ما بتصفعوا إعقل وعن حكيك رجاع
وهي أول المرات بتصادف معي
بيزت حالو الأرنب بقبضة سباع

الحجة يبن فياض منطقها كعي
بعلو خدك عم بتجرح مسمعي
و هاني الملك صفا بعينك ارنبي
محلا العما قدام شاعر مدعي

العميان يا ناصيف مش رح يقبلوك
قالوا بطه حسين عيب يشبهوك
ولما اللي متل حكايتك يعمل ملك
يا خجلة التيجان من هيكي ملوك

يا خجلة المنبر اذا المتلك اكيد
على ملوك منبر شعرنا بتمد ايد
مليون مرة كون اعمى بلا بصر
ولا شوف عا مجال الملك نزلو العبيد

يا ريت أعمى كنت وسنينك ظلام
ولا تكون لزقة عالشعر من كم عام
من ميل بتريح نظرنا التاعبوا
ومن ميل رحمة للوراق وللقلام

رحمة يا شاعر روّق و اشفق بقا
تعبتنا يا فادي من الحكي و الحرتقا
مش رح بريح هالمنابر يا حلو
الا ما علق رقبتك عالمشنقة

بالشعر جولات المنابر لعبتي
وبيوت أشعاري ذخيري بجعبتي
وبالشنق كيف تا رقبتي بشّرتها
وإنت يا هاني أماني برقبتي

الك يا منتدى مني تحية
تحية من القلعة الكوسباوية
جمعت ملوك عا منبر منمر
تا يتلاقو بفسحة شاعرية
و يا فادي الشعر مش لعبة تذكر
و لا حروب و قذايف للاذية
الشعر من ارض الله كنز جوهر
بعيد كتير عنك مش شوية
انا هاني انا الفارس الاسمر
بكفي عالعمر تعمل مطية
تذكر كيف يا فادي عا منبر
محيت كبار و بطحت المنية
قبلك بالحكي شاعر تقهقر
بقلب القصر قدام الرعية
و بدك انت متلو بكل محضر
تقعد شي سني عندي يا فادي
تا حتى تنحت الفكرة القوية

fadi fayad كتب:: يا ريت أعمى كنت وسنينك ظلام
ولا تكون لزقة عالشعر من كم عام
من ميل بتريح نظرنا التاعبوا
ومن ميل رحمة للوراق وللقلام

رائع يا فادي ومعليش يا هاني جواب حلو لا تزعل ههههههههه

الك يا منتدى مني تحية
تحية من القلعة الكوسباوية

اخخخخخخخخخخخخخخخ يا هاني زكّرتني بدير حنتورة انا طالعلو مشي النشالله الشباب بتعزمهن عا الموقع الرائع بالصخر يا شباب ما بتوصل سيارة
من اجمل المناظر

خيي سليمان فادي استاذ و انا ما بزعل من شاعر بيرصني بس بزعل من شاعر ما بيحكي مزبوط و بيساير
غلبني فادي الايام بيناتنا و الو نهار شولحو كلو سوا بالشعر
و انشالله ىالشباب كلها بتطلع على هالدير و بيشوفو الروائع و المناظر اللي بتمجد الخالق

حلووووو يا هاني بدي ضلني رصك تا تصير متل بو علي أووووف أوووف أوووف

يا شعر من كوسبا ومن الكورة
من أرض بالزيتون مشهورة
يا ريت متل حبوب هالزيتون
أفكار هاني تكون معصورة
بتحبل غيوم مواهبو بكانون
بتمرق ما بتشتيلنا صورة
من واجبي حدو عند ما كون
إزرع وحي بشعار مغمورة
بس اللي بيغطوا على الطيون
ما بيطلعوا عا مجال لنسورا
جايي تا تتمرجل عا بحر فنون
وإنت حد البحر نافورة
وعا سيرة النحت وحفر مكنون
الكلمة اللي محفورة عا رمل الشط
غير البفكر الناس محفورة

يا فادي روق لا تخبص معاني
بعدك قاصر بصف الحضاني
بيكفي تظن حالك انت عنتر
لانو بحقك بتطلع جباني

انت شو انت يا فادي تذكر
عا بيدر شعرنا انت الزواني
انت لزقة على هالشعر الموقر
و بحق الشعر يا فادي اهاني

وانا كانون هاني تلج اطهر
بشتي بس عالمؤمن عياني
ولانك انت من الكفار اكفر
حرمتك يا حبيبي من الاماني

وعلى ذكر النحت يا شب اسمر
حرام تعد انك مرجلاني
و ما بدي تظن انك فوق منبر
قادر فوق هاني تقب راسك
يا قزم الما وصل عالسندياني

يا هاني سنود طيشك عا ثباتي
وجوهِر شعرك من معلقاتي
وما تبقى مع عمالقة المنابر
نايم عا شكل شب السباتي
مهوشل عا دروب الشعر عابر
مفرع والطقس عاصف وشاتي
وبجسمك في كسر ما كان جابر
عطفت عليك وعطيتك عباتي
ولما دفيت بتياب الأكابر
كبرت وصرت تنكر مكرماتي
وعا دقنك بعد ما صفيت شابر
وصرت تذمني بلهجة شماتي
بهالحالي كفرت ما عدت صابر
وقلت هي آخر المرات بدي
ساعد شخص متلك في حياتي