عركة قرادي عال FaceBook

طوني شلهوب :

بهالموقع غادة وهنـّود
أوتار العود البتجود
وجايي بريشة شعر الحبّ
تا رقـّص أوتار العود

*

شعري لقمة روحيّة
بتاكل منها ما بتشبع

وفضل الحلوين عليّي
فضل الآخ عْلى المدمع

حكمت شعرو بكميّة
متلـّي صفحات الموقع

ورغم وجودو يوميـّة
متل المعنا مش موجود

حكمت شديد الحلو :

هَيّوفا وغادا وهنود
أوتار العود البتجود
وجايي بريشة شعر الحبّ
تا رقـّص أوتار العود

طوني كيف بدّك ياني
بْمَوقع واحد حَدّك كون

بيوتك كِلاّ تعباني
وخِسعا متلك يا أنطون

بخلَق كَوْن بقصداني
وشعري بالنّهدي معجون

يا قاصد تتحداني
بَدّي عا شَكلَك مَليون

مرَبّي نمور الهفياني
ومْرَكَّع شَلعات أسود

طوني شلهوب :

المتلي بيعشق شقر وسمر
عيونو شباط وصدرو آب

مرتين بيخلق بالعمر
مرّة تراب ومرّة كتاب

لكن حكمت تاني أمر
بيتعامل مع أهل الغاب

ركـّع سـبع وربـّى نمر
ولعـّب سبع تمان قرود

حكمت شديد الحلو :

جْمَعتْ قرود الفهمانين
ولِمْ عِلَّمتُن بكتابك

من شِعرك صارو مجانين
وكِلُّن نالو إعجابك

تشوفن تِعرق بكوانين
ويديقو عليك تيابك

وحِكمت أشعارو الحلوين
للي عيونا عسليّات
وِلْ يَللي جداديلا سود

طوني شلهوب :

أشعارك لـلحوريـّات
رقيقة وحـلوة بأبـعادا

بيغـفـا حبرك بالـكلمات
يوعـّي الورقة بـأمجـادا

ووقت البتـحزّ الحـزّات
هـيفا وهنـّود وغـادا

قالوا حكمـت بالعركـات
حبـرو دمع ... وراقـو خدود

حكمت شديد الحلو :

لولا نتهكو الحريات
وعبلادي جيوشن جابو

مش بالدمعة ... بالدمعات
منكتب عا صدر ترابو

تا شكّل صدر الحلوات
ورد... ويفرح عنّابو

من دمعي بسقي الشوكات
تا يطيبو ويصيرو ورود

حكمت شديد الحلو :

بدنا هيفا وسليمان
والزيتوني وبستاني
ورمزي قطاف الرمان
منبساتين الملياني
وين براهيم الفنان ؟
ووينيي مراجل هاني ؟
وحرف اللي شيخ القصدان
وبو عبس اللي تحداني
وهنود وغادة وسوزان
تا المنبر أمجادو تعود

ناطر هاني يا مسكين
الجولة مع هاني صعبة
هاني يا شيخ تشارين
عالمنبر هوي الكعبة
ضلك غني للحلوين
واعمل للسمرا لعبة
ولا تعلق مع كعبة دين
عالمتلك بابا موصود

شربل بو عبس :

بو عبسِ لْ حدّك جايي
حتّى يحِطّك عا حدّك

أفكارو بْتِنزل آيه
ومن ورطاتك بتشِدّك

هندِستو لِ مهدّايه
هالعمران الِ حدّك

عطيه اقلام و محّـايه
بيرسُم للميدانِ حدود

حكمت شديد الحلو :

يسلملي هاني وبو عبس
تنيناتن شعار كبار

أشعارن أحلى منالدبس
وأنعم من شوك الغزار

أشكالن خريجة حبس
وإمتالن بالدنيي كتار

الليلي رح إكبسهن كبس
وأعصرهن متل العنقود

هيفا العنداري :

عطر زهورك غطّى مشاع
وعطّر نص المعموره
وكلماتك بالعتمه شعاع
الاعمى بيقشع من نورا
طراد ببحر فكارك ضاع
وبيّن نقطه زغيّوره
لكن طوني وهاني سباع
وللقرادي هني جنود

هاني ناصيف :

الله يساعد يبن شديد
عقلك لش صاير الوق
بحكيك بكعبة و تنهيد
بتحكيني بمنطق اخرق
والليلة انصارت تهديد
تراجع احسن ما تعلق
بسحب رقبة عبس بايد
و بالايد التاني نمرود

شربل بو عبس :

تَ تعصُر لازِم يا شْديد
تْشِد زنودك وِ ركابَك

والدِّبس مكثّف تِعقيد
أحلى من صِنفِ شرابَك

لا تْصنّف فينا ما بريد
عِد ذنوبِ العا حسابَك

ساعِتها هروبَك تأكيد
ضبطك بالجِرمِ المشهود

حكمت شديد الحلو :

هيفا لِمْ وصِّتني فيك
قالتلي ما تقسى كتير

صرت تْعَرِّم متل الديك
وحَسَّبلتلِّي حَاَلْك زير

يا هاني بَدّي رَبّيك
بعدك بالأشعار زغير

عندو حدود الأطلنتيك
وبحري ما في عندو حدود

هاني ناصيف :

هيفا عالراس و عالعين
لاكن انت يا ختيار
لا تدخل ما بين بين
ممكن تلعب فيك النار
وحاجي تطهوج عالميلين
وتحكي عن نفسك اخبار
حدودك خشبة و مسمارين
محمل فوق تمان زنود

حكمت شديد الحلو :

حكمت صار كبير كتير
يا ريتك متلي تكبر

بتعمل بالكون مشاوير
وبتصير الدنيي تزغر

لم بطلع وحدا بتصير
تركع خشبات المنبر

حطّلي بديي مسامير
متل الفادي فوق العود

يا حكمت فادي الكونين
ما بيتشبه بالكافر
وينك انت و هوي وين
لا تحكي الحكي النافر
والليلة انقلبت عالحالين
رح روح لعندك سافر
وقص من لسانك شبرين
تا تبطل عالكفر تعود

» عركة قرادي عا الفيس بوك مباشر هههههه
» قرادي بدون ازعاج
» عركة ارتجالية عا موقع زجل بين الشباب
» عركة زينب حماده طوني شلهوب وغسان شديد
» شميلة موشح facebook