الليل - هديه الشاعر اياد قحوش

الليـل

هديي للشاعر الدكتور ماجد سطاح

***

د. إياد قحوش

بينزل ع كل الناس

بيبلّش غياب

بيكبر عتم

بيفيض

ع الأربع جناب

بتجنّ فيه الأرض

بتجيب القمر

نقطة دلع

بتبقّع ب نصّ التياب

*

وبتركد نجوم البعيده

ع السّهر

وبيزرزبو

حبّات من بين الجياب

متل الكأنهن مسبحه

بجرن انكسر

وتفرفطو الخرزات

ع وراق الكتاب

*

في ناس قالو

الليل

خمر من الحجر

في ناس قالو

رْماد .. من صوت الدياب

وفي ناس قالو

كتر مَ بيخطو البشر

بيمرق ضباب الروح

ع تراب الجسد

بيرطّبو

وبيروح لبعيد الضباب.

الليل (2)

هديي للشاعر الحواشي عدنان حلاوي

د. إياد قحوش

الليل خوري

عم يضوّي نجوم

بكنيستو

ولابس العتمه هدوم

وكانت قبالو

شعلت القبّه

لوما من البخّور

رشّ غيوم

منّو القمر

بيطلّ عالجبّه

قونة دهب

فيها السهر مغروم

كل ما ضحك

بتعوم لِ مْحبّه

وكل ما بكي

مرْكب زعَل بيعوم

الليل بيفضّي

وبيعبّي

حكايات لو بتّدوم..

ما بتّدوم..

قدّيش قلبو

سرار بيخبي

وقديش بيخبّي

بقلبو هموم

وبيعرف القشّه

من الحبّه

وبيعرف

الظالم من المظلوم

وبتفكّرو مرات

متنبّي

وبتفكّرو

عاكتر ما بيحسّ

بيعرف بالقيامه .. قبل ماتقوم

***********

قال لي شاعر كبير بعدما قرأ قصيدتي "الليل": إذا بتكتب قصيدة تانية عالليل وبتطلع ما بتشبه الأولى بحسبلك ياها.

وهيدي محاولة نشالله تعجبكون وتعجبو وماتكون بتشبه القصيدة الأولى.

الليل (1)

خطوط الطول والعرض

هديي لابتهال

د. إياد قحوش

نْشَرْت الغيوم

عْلى خطوط الطّول

.. مريول

من تقل الشتي المحمول

انشقّ منّو قطبتين .. زغار

صارو متل قطبين بالمريول

نْشَرْتهم بالعرض

عادوّار

جسم الأرض

صارو يكرّو نزول

ووقفو ع خط الإستوا .. زنّار

ومن يومها

والأرض عم بتهزّ

ومع كل هزّه .. يهرّ منها نْهار

النـّـوم (هدية محبّة للفنان الشاعر جوزف أبي ضاهر)

أضيف بتاريخ : | الكاتب :إياد قحوش

النـّـوم

(هدية محبّة للفنان الشاعر جوزف أبي ضاهر)

إياد قحوش

النّوم .. موتِه فاشله

وهيّي

عم تنخلق

بتموت بِبّـيّي

متل الشَّكَل

حسْكه بمحّايي

وعبّى الورق

بحْروف ممحيّي

النوم

تقْل العتْم..

بردايي

بتنزل عَلى شْبابيك

مطفيّي

وبيصير

سطح اللاوعي

مْرايي

بينطّ منها ألف جنيّي

أوّل مَ آدم نام..

الحْكايي

بتقول

نام بْفيّ الخْطِيّي

ومن يومها

صار في إلو نْهايي

معلَّقه بحْبال سريّي

النوم مش غايي

إلو غايي

وتاتعرفو الغايي الحقيقيّي

النومه الطويله عالأرض

جايي

ومنشان ماتستغربو بكرا

عالأرض نامو شوي

يوميّي

زنّـار السّمـا

أضيف بتاريخ :12/04/2009 | الكاتب :د. إياد قحوش

زنّـار السّمـا

د. إياد قحوش

هديي لحنان وبنتها بفنزويلا.

* حنان صبيّه غرّبها الطقس.. وبنتها الخلقت بفنزويلا البتحب أمها كتير

بتحب قوس القزح، وبتتمنى تقدر أمها تعربش ع قوس القزح وتنزل بالجْديده.. هالضيعه يللي بتشبه ميس الرّيم

***

قوس القدح

مش بسّ هوّي قنطره

بين البحر والمطرح العالي

هوّي حلق للشّمْس

بيلالي

وبيجوز لما البدر

كان هْلال .. وبعدو ع قد الحال

وكانو الكواكب حد مِنّو طْفال

وعم يركدو شمالي

وعم يلعبو بالجوّ

فات الهِلال بقلب هالة ضوّ

وانبَلّ بالهالِه

وشي مدّ إيدو بالهوا

وعيّط

بْخيال صابيعو.. الفضا تخَيَّط

ألوان

سرحت شال

فوق الريح

و حطّ الشتي

من تحت منها زيح

ولمّا مضي

إسمو على جْبين الشرق

برقت غيوم لْ بالسّما

ومن يومها صار البرق

إمضا الشتي

وقوس القدح بصمات صابيع الهلال

في ناس قالو لَء

قوس القدح

هوّي

لا ضهْر ختياره عم تصلي

وْ لا سيف خيّاله

ومش أكتر من خيال

ضوّ انعكس من مملكه

" لَ " سْراج فِعّالِه

عنا بيسمّو الحشرة ل بتضوي وتطفي وبتطير بالصيفية: سْراج فِعّالِه

يعني ضو الشغّيله.

مظبوط ياحبيب؟

جدّوله

د. إياد قحوش

بنتي عمرها أربع سنين ونص.. إجت ستّها لعنّا.

ومره بعد الحمام قعدت وجدّلتها شعرها الأحمر.

****

جدّولتك

حبل الجرس

يمكن أدان

طالع عم يشعّل سما من شمعدان

*

يمكن عتابا

تلات معاني بْقافيه

نزلو

متل إصبع بِقلب الكشتبان

*

متل الشّتي

بْوديان

كانت غافيه

وتجدول نْهورا بغابة سنديان

*

جدّولتك لبنان

دمعه صافيه

نزلت ع خدّ الشام .. نشّفها الزّمان

*

أو متل إيد

بقلب جيبه دافيه

أو شمس .. غسّلها البحر عند الغروب

وسرْحت مْواجو

محمّلِه بالأرجوان

شعر رقيق وجميل.