خبز السما ..!!!

موضوع: خبز السما ..!!! السبت مارس 22, 2008 11:12 pm

مرّه شفت عصفور ..
شو مهموك
مسلطن ..
و عم يخطب و يتجلّى
يقلّو لَ إبنو..
طير و تعلّى
فتافيت خبز قلال
بقدّوك
بس السما ..!!!
رح تلزمك كِلاّ

سعيد عقل
خدهن صناديق
الدهب ..
خُدْ رهجتن
عنّي ..
تركلي..
شي منجيرة
قصب
إسكر معا ..
وغنّي

ميشيل طراد

موضوع: رد: خبز السما ..!!! السبت مارس 22, 2008 11:14 pm

الرُّوح
مُشْ نسمِهْ .. حِلِمْ مَطْبُوبْ

عاقِرْنِة الْفِكْرَة

مِتْل الْبُخارْ

الطَّالِع وْمَكْبُوبْ..

قْزاز الْجَسَدْ

بِيْبَورْدُو ذِكْرَى

بِيْنَقّطُو

مِتْل الصّبِحْ

حامِل هْمُوم اللّيلْ

ماشي جْنُوبْ

وْمَحْمول عابُكْرا

الرُّوح ريحْ

- الريح مالا دْروبْ -
وْنـار..
وْلَمَّا التّراب بْيِنْطِفي

بِتْهِبّ بالْجَكْرَة

مِتْل الْحِزِنْ

لَمَّا بْتِجِي

تَ تْبَنّجُو بْمَشْروبْ

بِيْفِيقْ بالسَّكْرَة

د إيّاد قحوش

موضوع: رد: خبز السما ..!!! السبت مارس 22, 2008 11:16 pm

محبّه
*********
كبيره الشمس ..
والبحر - ل محبّه -
عند الغروب بينطرا
بيفكّرا حبّه
بيفتح بتمّو بيبلعا ..
..
يا كبير ياربّي
..
فاض البحر صلبان
ودلدق من القَبّه
..
بطرس
غرق بالمي
شَكّ..
..
السما قِبّه
بتوسع نبي .. واتنين
وبتغص
لما يفوت "متنبّي"
..
بالبحر مافي حدا
بيلبس تياب
..
المي
مابتقبل تخبّي ..
..
البركان.. جايي بنار
عمبيفور ..
مرقت عضهرو المي
طفّيتو
تركت باسم الحب
حردبّي
..
شو كبير ياربّي
..
لك فوت ..
يامجنون
يامجنون
البحر انفتح
عبّي
..
هالدهر بحر كبير
بس العمر
غبّه

إياد قحوش
منقول عن موقعه

موضوع: رد: خبز السما ..!!! السبت مارس 22, 2008 11:17 pm

سكران
**

سكران!
شالح هالدني خلفي
وماشي ورا رهجة امل
مقفي
كيف ممكن أوصل، وسكران؟
والدرب برم
ومشيتي….
وقفه!….
سكران مطفي منهنه ، وتعبان…
ماشي…
وعرض الدرب ما بيكفي
ياما سندت كتفي على حيطان
وياما سندت حيطان..عاكتفي!..
ت وصلت ع الباب
وأنا ..هلكان!
تكيت نتفه
وتكيت النتفه!..
ما كان يفتحلي حدا، ولا كان
يبين حدا…
مدري ال حدا مخفي
مدري الامل ميت وصرلو زمان
ع الباب تاكي وساند الدرفه!
كيف ممكن يوصل الانسان؟
والبيت مطفي!
وقاصدو…
مطفي!…
____________________

ايليا ابو شديد

موضوع: رد: خبز السما ..!!! السبت مارس 22, 2008 11:19 pm

يــاء ..

د. إياد قحوش 8/3/2008

يــاء

إلى قلب جولييت الشاعر .. الحزين أحياناً

لمّا العمر
بيْصير ع غْصونو تْقيل
وبِيْحِفّ كفّ الوقت
فانوس الرّحيل
بْيِرْكُد حْصان الصّمت
صوب الذاكرة
يْخبّي الليالي خمر
بِ خْوابي الصّهيل
وبْتِزْحَط نْجوم الزّمان
النـّـاكرة
مِلْح السّهر بالبحر
وِبْيِغْفا النّخيل
وْبيصير موج الموت
يِعْلا .. مْجاكرة
وْكلّما بْ تِحْرق بالشّمع
حتى تْعيش
كلّما بْيزْغر بالشّمع
طوْل الفتيل

موضوع: رد: خبز السما ..!!! السبت مارس 22, 2008 11:26 pm

فيروز.. صوتِك" – إلى الأديب حنا نور الحاج

د. إياد قحوش 20/2/2008

صوتِك عصير الرّيح
بالوديان
بْيِطْلع غْطَيطَه
عاجبل لبنان
بِتْزَرِنْقو تَلْجه
بْتِمْحي الزّيح
لْ بَين الْبِكي
وْمِنْجَيرْة الرّعْيان
**
صوتِكْ .. مسيح
قْيامْتو
تِلْميح
بْتِمْرُق شَبَح بِمْرايْة العِمْيان
وْلَوحِة سفر
عِرْقِت مِنِ التّلْويح
عالشّط
حتى تْشِرْدْقو الألوان
**
الضّو لْ بِصَوتِك
سِنْديان
وْشيح
طِلْعوا بِصَحرا الصّمْت
والألحان
بْنَهْر الحكي
بِتْغرّق مْراجيح
بْتِحْرُق عَتِم
بِتْبَورْدو بستان
متل للّي نازل بالبرق
تِقْديح
والغيم بيْعبّي السّما دخّان
**
صوتِك
الميّ
مْن الأرض بتْصيح
نَبْعِةْ شِعر
بِتْشَقلِب حْكايات
بِتْغِلّ متل الرّوح بالانسان

***************

لفيروز .. من قلبي سلام

حنا نور الحاج

شعر الدكتور إيّاد قحوش
[/center][/b]

**
د . إياد قحوش
الإهداء: إلى حبيبة هنري زغيب - لبنانه
***

بْ يِِنْبَحّ لَون الضَّوْ

كِلْما مَرَقْ
عَ مْرايْتِكْ وِجِّكْ

يامْغَرَّقَه بالْغَيب ..

مِنِّك لَو

ال جِمْعَه العَظيمِه بْتِنْسَرَقْ

ألله مابيْهِجِّـكْ

***
أيَّا عدن فيكي؟

وْإذا

بِيْطُوف وِجِّـك صَوتْ

بِتْصيري

مِنْجَيْرْة قْيَـامِه

بِ تْقِبّ بـاط المَوت..

تَ تْطيـْري

مُوَّال .. شافُو نُوحْ

وْجايِـي يْلاقيْكي

***
السَّجْرَه

إذا وِجِّكْ ضِحِكْ

بِتْصيرْ تِرْكُدْ..

بيْن البْساتيـنْ

بْتِرْسُم بْدَمّ الْعِنَبْ

صِلْبانْ

فَوق التِّينْ

وْبِتْصير رِيْشِةْ صَلا

بْيِشْهَقِلْها التّلْويـنْ..
***

بَدِّكْ تْضَلِّي طالْعَه

تْرابِكْ عجين الرُّوح..

والْلَّيل

طَوَّلْ بَسّ

لابدّ إلاّ يْرُوح

اْنْ دَقِّ السَّما وِجِّكْ

بِتْكَهْرِب الْجَنِّه

وِبْتِنْطِفِي جْهَنَّمْ

وْبِيْضَلّ يِنْدُف حَلا .. باب السَّما الْمَفْتُوح.

د. إياد قحوش
**فيروز
زِقّ المدى
يا صوتها .. وعلّي
عالريح حتى تزرزب السّلّه ..
حكايات نهر المجد والتلميح ..
الا الشعر بالليل م يخلّي
يا لونها فراشاتك مراجيح
بتطير .. من تلّه على تلّه
وطفله اجت تتنطّ فوق الزّيح
وزحطت وركعت حدّها تصلّي ..
الأحلام
وتشعّل شمع وتصيح
يارب خلّي العطر بالڧلّه
فيروز تلجه نازله تجريح ..
بجلد السهر خابي وعمتملّي
زرّ و شي ٳنّو شقشقو التّڧتيح
باسو الفجر: قلّو
عمتقلّي
شفاف الشمس يا زرّ حمرا مليح ..
وبدها من شفاف النّبع بلّه
فيروز بي?فّي بقى تلويح
قوس القزح عمينطر الغلّه
كتف الدني مركي على طراريح
صبحك صباحك خير
ياطلّي
يا شعشعي
من كونك مصابيح
من بعد ما غبتي .. العتم سلطان
والفن صار بلاد محتلّه

اياد قحوش

بغداد
ساعِةْ خَيَالِكْ مامَرَقْ
عَ المَوت .. المَوت
فَكّ كْرافْتُو .. وْزَخُّو العَرَقْ

وْطاف المَجد نَهْرَين
انْلَفُّو عَ خِصْر الصَّوت
النّازِل مِتِل سَيفَين
تاوِجِّكْ بَرَقْ.

********

إنْتي صَداكي نْهـار
بيْهِزّ الْجَبـل ..
مابْيِِنْقِبِلْ
يِمْرُق لْسان النَّـار
يِمْحِي دَفْتَرِكْ
كُوني دَهَبْ مابْيِنْحَرَقْ.

******

التّاريخ بدُّو يْشُوف
فيكي رِيْحْتُـو
..بْصَنْديْحْتُـو
كْتَبْتي الحَضارة حْرُوفْ
ضَلِّـي اكْتِبـي
عاقَدّ ماعِنْدِكْ حَكِـي
عِنْدُو وَرَقْ.

*****

وِالزّهِرْ
مِنْ تِمِّكْ
زَحَطْ
رِمْش النَّهِر
شَمِّكْ
مَسَـا
طْلِعْتـي صِبـِح
طَقّ وْشَرَقْ.

****

وْبَدِّك تْضَللّي مْجَهْجهه
وِمْطَفَّحهْ أحْـلام
تـَ يْهِجُّو الْهَمَجْ
مَجْدِكْ .. بِمَجْد الشّـام
لمّا بْيِنْدَمَجْ
بْتِعْلا بْواب الْمَمْلَكِي
وْتاج العَرَبْ مابْيِنْسَرَقْ.

اياد قحوش
الله الخلق هالأرض

شافا متل حجره

عمتقلب بهالكون ..

قلبه بعد قلبه

وحتى ما هيي تدوخ

شكّا بجذع شجره

وتحتا قعد.. يرتاح

وكانت الدلبه
**

الدلبه ع خصرا الريح

مربوطه

شال القمر .. عالشال ..

غط ونام

الدلبه براس الدني عرزال ..

محطوطه

من تحت باطو بتمرق الأيام

و شو الدهر حدا طفل دحبى ..

قطف ورقه

وخرطش ضحكتو للشام

**

هي دلبة التاريخ ورقاتا

حكايات ختياره

بعتم كانون

مجد السما تربى ع ديّاتا

وبتهز حتى تنيّمو الغصون

هيدي وطن للشمس قصر الصوت ..

البيدقّ موسيقى الأبد قونه ..

بعنق الجنون

لازم تنعبد متل الشعر ..

فايض ب جن العاصفه .. ومسكون

**
الدلبه عروس الكون الضو ..

الها بينغزل فستان

ما في ملك ..

الا ومرق من هون

و حوّش غصونا للعرش تيجان

شو عاليي الدلبه علم

غطت عليها حمامة الطوفان

شو فايتي بالأرض

بطن الأرض

مكمّش فروع شلوشها ومليان

**

الدلبه عمر منمرّ حدّا ..

جيل يلحق جيل

ومنروح .. لكن باقيه

ومين فيه يشطب حرف بالانجيل

وبتضل .. متل الأم عولادا

تغطّي الولاد بشرشف تراتيل

الدلبه أسد .. رابض ع كتف المجد

وشواربو بيلبقلن التفتيل

**

هونيك سجره
انحرمت بمشهد كئيب
من العندليب و دمعتو
وصارت صليب
ورجعت لذاكرة الخشب
لمّا بكي
الكف الجريح
دموع صوت العندليب
*
السجره .. الصّليب الحامله
حمل استوى
بتعطي دوا .. ومش لاقيه إلها دوا
وحنّ الخشب للرّيح
تاصار الهوا
يتمردغ عْلى جرح مش قادر يطيب
*
اشتاقت السجره للتلج
خلف الغياب
تلبّس صلاتو .. الكون
طرحه من التياب
و غصونها
كتبت لهالعالم كتاب
قصة بياض
يبورد بصمتو اللهيب
*
ياما ع هالسجره
الربيع السرمدي
طرطش عطر
وبعبّها غطّ وهدي
وعاقدّ مااشتاقت لحبّات النّدي
سقسق عليها الدّم
من جنب الحبيب
*
كانت السجره
تخاف يحرقها حدا
وتصير دخنه
عمتشوبر عالمدى
وهلّق الخشبه بين بخّور الفدا
و شمع الخلاص
بتحترق تتفوح طيب
*
السجره للي كانت شكل
عن كل النّبات
وتحلم تصفّي يوم
مركب للنّجاة
اليوم
حملت فوق خشبتها الحياة
وصارت منارة حبّ
للبحر الرّهيب
*
الانسان يللي
عميدوّر عالحنان
و خايف بصحرا العمر
من حرّ الزّمان
ومش عم يلاقي
فيّ تحت السنديان
بيقدر يخبّي قامتو
تحت الصّليب
كبير وسع الفيّ
والمطرح قريب
==========
شعر د.إياد قحْوَش

منقول عن موقع مرمريتا

نغمشي

شعر ميشال طراد

قديش ه الوردي عمتكتر حكي؟!
وبتضل هيي وه الكنار بوشوشي،
مبارح غمش عنقا بضفرو الليلكي،
واليوم بقح صدرها من الغرمشي.
شو باك، يعني، شو؟ وانتي شو بكي؟
حسيت دخلك هيك متلي بنغمشي؟

الشاعر عصام يوسف

يا بيتها
لْ دايب عَ غيّابو
و عا شجرة العنـّاب
عَ جنابو ..
قدّيش ضيـّفني
أنا و سهران
من كل
عـِنـّابات عـِنـّابو

كان الكحل
عا لوحة الأجفان
يْرَوتش
بـِأهدابي و بـِأهدابو
و عا قوس قنطرتو
الشتي النعسان
بقوس القدح
يعزف عَ نـَشـّابو

و بابو متل
دفتر موسيقا كان
و كل مَ الهوى الشرقي
فتح بابو
عود الحطب
بيدوزن الألحان
و متل القصب
بيدق مـِزْرابو

و شبـّاك
من تلج الدني بردان
يا ما قزازو
غـَزْ بخشابو
متل اللي بعدو
من الصِبا عشقان
و صورة حبيبو
بْـتـِجرح جـْيابو

و مَمْشى ..
على غـْياب القمر
زعلان !!
ضْفافو
متل نهر العمر شابوا
كل ما دعس
بالذاكره النـِسيان
بتبكي نـِدي بالبال
أعشابو

و يا سَـقـْف شو حملوك
هالحيطان !!
متل الجرح
مَ بيحمل عْذابو
يا ريت متلن
يحمل الإنسان
بس الفنا
مَ بيحمل ترابو

رجعت بشهر كانون
من نيسان
إتزكـّرو
و إسأل عَ أصحابو
قلـّي يا شاعر
"كان يا ما كان"
كل اللي ضوّيتن
بقلبي شموع
عا شمعدان
الذاكره دابوا

انا وحالي عصام يوسف

على الشاطـــــي مراكب بيض كانوا *** بدي يْهب الهوى و تسكر جـِنانو
مركب يطــــــلع ومَركـب بـينـــــزل *** كأنـّو البحـــــر عم يعزف بيانو

و على كتاف الشمس في شال مَخمل *** دايب عالوهج آخــــــــــر أوانو
و قمر مفطـــــــــــوم عن إمّو بيسال *** عَ هاك الشال شو عضـّوا سْنانو

صِرت إمشــي و عَ وجـّي العتم يتقل *** تِقل تاج الحـــــقيقه و صولجانو
كأنـّي خـــــــــيط شاف الموج مغزل *** صَبغ لونو بـِحمرة إرجــــــوانو

إذا قوس القدح بيصـــــــــــير أطول *** و إذا بيقصر شــمع عا شمعدانو
أنا متل التلاشي بْصـــــــــــير أجمل *** إذا الرسّـــــــام رَوْتشـني بْحنانو

أنا شــــــــــــو بْحب إبدا بس أوصل *** عْيوني شْـــــــقد بالقمّه استهانوا
متل شــــــــــــي نهر عالمنبع تحوّل *** شـــــاف الكــون عَم يبرم مَكانو

مَ بدّي عيش وجـــــــــــــداني مقلقل *** و عمري ضــــايع بْعجقة زمانو
خايف بعد ما جــــــــــــــنـّيت إعقل *** و بعد ما كنت إضحك عالطبيعه
إبكــــــــــــــي عَ الربيـــــــــع و بَيْـلســــــانو

عصام يوسف

يا قاعدي بجرن الحكي
بتتحممي بضو السمع
من كتر ما صوتك زكي
شهقه .. اخترع
من يومها نسينا الحكي ..؟؟!!

الحلو بهل المنتدى إنو بكل صفحة في لون مميز من ألوان الشعر، ومع كل لون في متعة أدبية ومتعة فلسفة مميزة، خلينا نقول هالمنتدى العريق بستان مشكل.

بِخْيُوط الوَحْيِ مْشِكَّل = أجْمَل بُسْتَان
وْصَاْر عِنَّا مَرْج مْشَكَّل = عِطْر وْألْوَان
===
سْلَيْمَان الوَرْدِة الحَمْرَة = كِلْمَاتُو دَجّ
وْبِحْرُوفُو طَفَّى الجَمْرَة = وِخْصُومُو فَجّ
سْلَيْمَان بْيُوتُو عُمْرَة = وْقُصْدَانُو حَجّ
وْبِحْرُوفُو تْحَدَّا السَّمْرَة = شِعْر سْلَيْمَان

وهيـك اللـه بلـّش التصويــر
وحلمو صبيه غير شكل تصير
قالب الطين لكـان حدو ردّ
ومـــد إيـــدو عَ الشمـس بكّيـــر
من خيال إيدو شال هاك القد
ّ وتــا يحط لـون بحلـم العصافير
جَرْوَح الورد وشـال منو خدّ
وتـا يحط غمزة بتجرح وبتطير
بوّس السيـف وشـال منو حدّ
وتـا يرفّع الخصر لبيحبّو كتير
كان انقطع لـو بعـد نتفي شـدّ
وتــمْ المقطّب متـل جرح زغير
لوما انفكــو قطبتيـن.. انسدّ

الشاعر ألبير حرب

وما زالت ألوان الشعر تضفي ليلكها في هذه الصفحة.

خليل روكز

وصار البحر للشمس يغمزها نزول
ويد السما متعلقة بشعراتها

والموج هادي لا يحول ولا يزول
يضحك بعبّو وينحني لملقاتها

ولما كمشها البحر كمشة عالاصول
وشدها ,,,,,,,,,,,, وراحت معو من ذاتها

هون السما شو بعد حجتها تقول
انقبعو جعود الشمس في دياتها

ورجعت تضوي سرجها بهاك الحقول
وخنقت أسفها وحزنها جواتها

جميل جميل جميل

قصيده للشاعر الرااااائع : خليل روكز ..... الله يرحمو

إلى ,,,, ســـمرا

مـن بعد مـا كـنت القمـر حـاكي

....................... وإضحك على الشاكـي وعلى الباكـي

وعالهوا ســـكـرت شــــباكي

........................ ما عرفـت كيف علـقـت بهــواكي

........

.............يمكـــن بعيــني الحُبّ حلاّكي

................. خبز السما ..!!! Syriaroses-0136566df7

ولما أبتسمتيلي وســـــنّـك بـان

.......................قلت هـيـدي عــوايــد النسوان

ولّما وداعــك بالأيـــــادي كان

....................... عرفت عنـدك عاطـفــي وتحـنـان

........... من سـرّ نهدة قلـبـك الـشـاكي

.................. خبز السما ..!!! Syriaroses-0136566df7

درجـــة وســـط منِّك جميله كتير

....................... لكـن لطيفــه وبنـت بيـت كبير

عشقتك ونفـسـي عِشقــت التفكـير

.........................وقلبـي هتفلك مـتـل طفـل زغير

............ ومـن بـين كـل الناس نـقـاكي

.................. خبز السما ..!!! Syriaroses-0136566df7

بنظــرا وبســـمه وكلـمتين رقـاق

..........................ومحـرمــي ومن هيك صــرنا رفاق

والمحــرمي بـشـرع الغرام فـــراق

........................ لكن أنــا طلعـت معي أشــواق

............... وتقريـب ملقايــي بملقـاكي

.................. خبز السما ..!!! Syriaroses-0136566df7

قــدرتّـهـا تعليقـتـك فــيّــي

...................... عن صفــا قلـب وحُـسـن نـيّـي

وكـلّ شــي معـي محّبــه وحنّيـي

......................... هودي لكــي مــن شـاعر هـديّي

............ عـا شـرط بتضـلي عا مبداكي

................. خبز السما ..!!! Syriaroses-0136566df7

إنتــي وأنـــا مــن يوم مـا خلقنا

........................ كـنــا تـراب وبعضنــا عشقنـا

خلقنــــا وعلــى دبق الـهوا علقنا

........................... مـدري بليلــة قــدر خـالقنـا

................. للحـب ودّانـي وودّاكــي

.................... خبز السما ..!!! Syriaroses-0136566df7

فتحــت عيـــني عالدّنــي بكـير

........................ وكنت بــهوا الحلويــن غــطّ و طير

وكـنـت إهــوى وكنت إنـسى كتير

....................... وهلّــق مـعـي بالعكس بـدّو يصـير

.............. لا .. تفزعـي مـا عـدت إنساكي

........... خبز السما ..!!! Syriaroses-d0f86a99ae

__________________

انتي مرا من الشرق

إنتي مرا من الشرق
عمرك عا مزاج
أهل العشيره ..
لا رفض .. لا إحتجاج
بيطلبوكي ..
بيوعدوكي بالعسل
بيخطـّبوكي ..
بيعملوا عليكي سياج
بتتزوّجي ..
بيطالبوكي بالحَبَل
و سر الحَبَل
علـّة وجودك و العِلاج ...
قبل الزواج
بيقتلوكي لو حصل ..!!
و بيطلّقوكي ..نْ ما حَصَل
بعد الزواج !!!!!!!

الشاعر نبيل خوري

من روايع البسطاطي

لو كنت مطرح إيل
بخربط .. بْحط .. بشيل
بْزوزق عَ مهلي الكون
من دون ريشي و لون
و بنحت بلا إزميل
"لو كنت مطرح إيل "

و بختصر من هالدني أعوام
و إيّام بتبكّي
و يلّي بقي عليهن سبع تيّام
بخلقهن بتكّي .
بشعشع بلا شمس و بلا قناديل
"لو كنت مطرح إيل "

بتلّي الدني حلوين
يشعّوا حلا
و بلغي الصلا
و بقول .. ما بدّي تصلّولي
صلّوا قصايد شعر للحلوين
و تلّوا الدني مواويل
"لو كنت مطرح إيل "

بنزّلكن أحلى سما
بتستاهلوا إنتوا يا هالشعّار
عطيتوا الحلا منكن غمار .. غمار
و بفهم عليكن بالوما
ما كنت بنطر "تطلبوا تا توجدوا"
بعطيكن عيوني
و عمري و حلا ظنوني
و ما بقلّكن ليّي تعوا
لعندكن وحدي بجي
ووقت اللي إنتوا بتتعبوا
عنكن هموم بشيل
" لو كنت مطرح إيل "

إيل القديم بحاكمو
و بحاسبو .. عا كل أعمالو
و بلغي جميع مواسمو
و بحط شاعر عبقري بدالو
يغنّي الكحل و الميل
يتلّي الدني مواويل
" لو كنت مطرح إيل "

الشاعر .. الرسّام .. الخطّاط .. حسّان بسطاطي

لو كان مطرح ايل، ومش رح يكون مطرح ايل.. القصيدة فيها ابداع.
ولمزيد من المعرفة أن ايل كان إله الكنعانيين، أي اللبنانيي، وهي أول ديانة توحيدية عبدت الإله الواحد. كان كاهنها الأكبر يدعى ملكيصادق، وقد التقى هذا الكاهن بابراهيم عندما جاء من كور في العراق بأمر من الله، فعرفه كبيرالكهنة ملكيصادق وباركه وأعطاه أرضا سموها أرض السلام، ثم أسماها النبي ابراهيم على اسم بلدته كور وقال هي " أورشليم" ما تُعرف بالقدس اليوم. قال الكتاب المقدس عن مليصادق اللبناني الكنعاني " أنه مبارك" وجعل الله كهنوت ابنه الوحيد على رتبة هذا الكاهن اللبناني التوحيدي.

» جبين السما
» شبابيك السما
» مصروف السما
» جبين السما
» شبابيك السما