ضوئيات بو شربل

مراية...وبال

صار الشعر..متل المراية قزاز
مين ما قصد... بيكسّر حروفو
والديك ..قرقة والسنونو باز
وصرتوا عا ها الصفحات بتشوفوا
الشيطان عم يتبغدد بقنباز
وبالشعر عم تتيسر ظروفو
يمكن اذا بنروح عا القوقاز
بنكسر مرايا البال ومنعتاز
الشاعر ..الشاعر يشهر سيوفو

وفي بنت طلعت من مرايا البال
كومة قزاز مكسّرة ..وما زال
عبّت بحور الشعر بالسلّة
كل الحكي اللي نقال ول ما انقال
يا ها الصبيّة تعلمي صلّي
وطلّي عا شير قصايدي موال
هونيك واقف صوبك بدلّي
يلّا اطلعي دروب الخيال طوال
لا تطوّلي عم اجمع الغلّة
والحبر ناطر يدفق الشلّال

بحر الزجل صاير قصير البال

بحر الشعر

انا والنت
دوّرت بين دفاتر الباطون
مطرح ما كنت قصايدي شتّي
وعا حجار ما عتقت ب برحليون
مطرح ما كانت قاعدي ستّي

دوّرت..بركي نسيت قصقوصة
كاتب عليها ...شعر ...يا نتّي

يا نت شو موفّر علينا وراق
وناقل دني احلامنا بكبسي
ان عوكر بحر افكارنا أو راق
ما بتعرف الدمعة ولا العبسي

وجنيتك شبّاكها مكسور
ومرسال موسك ضو ل حبسي

يا نت انتي مركب الأحساس
السافر عا شوق التارك بلادو
مفضل صرت يا كيبور على الناس
واحباب قلبك طوفنوا وزادو

وحابب معك ابعت ل كل الشرق
انشالله بسلام تتمّ أعيادو

اعياد مجيدة


يا قلب همّك زيح ..جايي اليوم
تتغنّج بفستانها الزهري
طلّق عذاب الروح قبل النوم
ريحة قبور الخوف ما زهري

وانتي عبيرك طالع من الضو
وعطر البلاغة طار من زهري

بحر الزجل


يا حامل الزيتون والزنبّق
شفّي بمنجل فرحتك ونشار
الشنبوق بالسجرة اذا تشنبّق
بيصير شعنينة ولاد زغار

بتزّكر الضيعة ...سما وقمار

بتزّكر الزيّاح ..عجقة روس
وزينة وبالونات .منفوخة
وولاد ..كنا نحمل الدبوس
تا نفقّعن ..لما البشر قدّوس

تصرخ ..وكنا بوقتها فروخه

طفّي يا ها الأيام أحلامي
وضوّي سمايي وشعشعي سنيني
ويا نجوم .صلّي قبل ما تنامي
اليوم بوطنا عيد شعنيني

جمر الغياب رماد عا جبيني

بحر الزجل



بعدو زماني ..بيعتب عليي
متل الوجع بيفيق..يوميي
بيفتح بواب الهم عا جروحو
وبيحطّني بالواقع شويي

وقديّشني بنسم..يا بيي..!!

واقع ...تركني جر بسنيني
ونسّف حبال الشوق عا جبيني
وعلّم بقلبي ضربتو سكيّن
ونشّف حليب الطهر من ديني

واليوم... قلي عيد شعنيني

من وين جايي ها السنة يا عيد
من شرق أو من غرب يهودي
ومع مين قلّي ضارب مواعيد
مع ناس ...بالتحرير موعودي
مع شعب نام وقام عا التنهيد
وما كان يحمل يوم بارودي
مع مين..؟ لا تقلي مع التجديد
ما تترك الأحلام موعودي
بكرى بيجي عا الشرق رب جديد
بيحكم وطنا بقهر حتى نصير
نشعنن بدبابات وفرودي

بحر الزجل كل شعنيني وانتو بخير



حالف ما خلّي بغبتي بصبوص
ضو ..وما طفّي كل احلامي
تقلان همّي بغربتي ومقروص
وخلفي البحر والموت قدّامي

وعمري خلص عم عد أيّامي

رح طق جسر مصايبي وارتاح
وامرق بوادي غربتي صاروخ
واقطع على الرمان والتفّاح
اعمى وبلا ما صب روحي دوخ

وتحت الارز تنزل دموعي صموخ

بحر الوعد


رايح..وقلبي حاملو بإيدي
عا الشغل..عم صلّي مواعيدي
بمشي الفزع بتسلّق الأوهام
وبعرف دروب الخاطر بعيده
بشرب نهيدي بنفّخ الأيام
ودخان أسود لون تنهيدي
برجع تا صلّي من قبل ما نام
بلاقي سمايي مشعشعه جديدة
وقطعة ببالي ..والنظر رسّام
مرّة بيخلّي لونها عابق
ومرّة بيخلّي لونها نبيدي

بحر الزجل


قديّش قادر احمل سنيني
ولون التعب بيحل عا جبيني
تعبان من هم السفر تعبان
ويامين عا شحّاد يهديني
واقف محلّي متل شي بركان
ثورة غضب عم يحترق ديني
وناطر حنيني بمركب النسيان
بركي بيجي تا روح عا لبنان
جمع المصاري ما بيعنيني

بتصدقوني هههه



مرة الحرامي فات عا بيتي وخرب
وقلي اعطيني وقبل ما احكي ضرب
ومن قبل ما عا عيلتي الحلوة اقترب
فكيّت إيدي وقلت رح فصو إرب
ولما هجمت عليه دشّرني وهرب
والخوف منّو نهر عا تيابو زرب
السرّاق والمجرم جبان بلا ضمير
وما في فرق بين الحرامي والعرب.




القرّاء لما من الجواب بينعسو
الشاعر بنعرف بالزجل ما اتعسو
ولما تحس الشعر ما حرّك شعور
من تحت دقنك حط فردك وافقسو

بحر الزجل


بعرف عليي كتير بتمونوا
ووين ما رحت بالقلب بتكونو
وبستان قلبي الريحتو بخّور
زهر القصيدة ضل عا غصونو
لا تعاتبوني بغربتي مقهور
التاجر تا يقدر يدفع ديونو
لازم يركّز ع الشغل مجبور
حتى القدر ما يقدر تخونو
يا شعر ودّي قصايدي ببابور
يوصل على بيروت داخونو
وفيّق حنين حبايبي ببنجور
وفرّح وطن عم تاكل شجونو
يا ريت قادر غير الدستور
صار الوطن عم يخسر دهونو
تا حط بالدستور خمس سطور
وامنع الهجرة واجبر السايح
ينسا المضافي وياخد عيونو
بحر الزجل


لا تسأليني ...تعبت قلامي
شغل الورق تعيّب
والحبر متل الضو قدّامي
حامل الي مكاتيب
وبابك مسكّر ..!!بدّك تنامي
قبل الشمس ما تغيب

لا تفزعي..عم يحرقو دواليب

بحر الشعر



قطوع ..ومرق

لا تسألوني .اسوّدت قلامي
مبارح ..مرقنا بتجربة وقطوع
والله سترنا ..وربّنا الحامي
ومريم العدرا وابنها يسوع

موجوع قلبي بغربتي موجوع

يا عمر ..منّك ورد شو باقي
تشرن ربيعي وهرت وراقي
وجرحي نزفني عطر عا فراقك
تا صار يعزفني على فراقي

وسّع نهيدي وضيّق خلاقي
بحر الزجل


راح العمر ..واختنقت الضحكة
خمر الجمر سكران...ما بيحكي
وسيف الوجع مطعوج..عا جروحو
والشاعر بينساق من روحو
تا يضّحك الكلمات ..ويروحوا
عا عرس قانا شعرنا المحكي

تخرطش


هي اول المرات با امي
ما بعيدك يا غالية بضمه
عشتي معي بالغرب عشر سنين
تقلت الهمّه ..وحاملي همي
..
وتا روح شوفك ناطر الايام
ايمتين..بدي حس عا دمي

ضلّي ازكريني بكل صلواتك
ولا تغضبي عليي..الضهر مكسور
ابنك تربّى بين ديّاتك
وبتعرفي الغربة عتم مش نور

كبرت العيلة ..كتير يا امي
لا تعتبي عليي ...انا معزور

عم اسرق من الوعد باقة ضو
تا عرّم بعيدك سلال البال
وعم اسرج من الشوق غيم الجو
بركي حنيني بعملو خيّال

وبحمّلو من الشوق روحي سلال

يا ناطرة ..همّك لا تهتّمي
الا بحالك ..دشّري همي
همي قتلني بغربتي مواعيد
وحرفي وجع وقصايدي تنهيد
مشتاق ليكي ..وحابب من جديد
ضمّك عا صدري وقلك بها العيد
كل عيد وانتي بخير يا امي

بحر الزجل يسرق الوقت


ضياع

مليان قلبي ..وقولكن بيساع
هم الوطن..عبّى تلات الرّباع
وهون الوطن فزعان منّا يضيع
ولوين... فينا نروح لولا ضاع
معروف عنّي مكبّش وفزيّع
وموعود انّو تظبط الأوضاع
بترك الغربة قولكن وببيع
ما بلادنا ضايع لأنّو انباع

عقلي بيقلّي ضل بالغربة
وقلبي بيقلّي بكل دقة رجاع


مخنوق غير الآخ ما بلاقي
ومحروق قلبي عا وطن محروق
ورح طق مش عم توسع خلاقي
معصّب عا حالي قال بركي بروق
شح الوحي من خاطري وباقي
شلّال حبري عا الورق مدلوق
رح فل من حالي على وراقي
ودوّر على قلام الوحي بالسوق

فيي الحلم ..مجنون عم بيسوق

يا ها العمر ..قديّش فيك جروح
واحلام ..عم بتضلّها بعيدي
بتبقا عتيق ..وكلنا بنروح
وحامل وجعنا ..عا دني جديدة
جروحك مساكب ضو ما بتفوح
بتشهق بعرس اللون تنهيدة

خدني معك ...لا تشدّني بإيدي

بحر الزجل

يا حبر جامد غيّر القمزة
ولا تنط فوق السطر بالهمزة
علّق حروفك عا مرايا البال
ولا تضيع بين الخصر والغمزة

يا بو قلب متل الفحم ما زال
ما بتزعلي من المطلع الرمزي
ليش تا حردتي من عطر خيّال
وعم تبدلي الافراح بالطمزة

بقيتي شهر تبكي على الأطلال
وبعتي البحر مع عاطف وحمزة
ومرسال وديتي بضهر مرسال
حكيتي بضهري ووصلت اللمزة

وبلّش حنينك ينتحر عا ديال
روح القصيدة ودهشتك كمزة
يا لابسي وجّ الشعر شروال
عيب الأرانب تدهن الضافير
و تقول جايي فزّع الحمزة

ملاحطة
- كمزة : ما أخذ بأطراف الأصابع
الطمزة الزعل
اللمزة الاستغابة


ل ستين عمرو لا بقا يرضا
ل شعر الهجا رح نتركوا عرضة
هوّي مريض وصاحبو عدنان
مخنوق يعني تنينهن مرضا
ههههه
بالنشر لو زنتن على القبان
كيلو نحاتي! وشي رطل خرضة
ومن دون حرج حدّث عن الأوزان
من عهد جدي نوح منقرضة
هههه
الدعمي بدر بيقول يا رحمن
عليي جميع الناس معترضة
مجروح من عدنان يا اخوان
عّض! الجرح بنروح تا نراضيه
بيشفتر. وبيقول ما برضا

بحر الزجل