ضوئيات بو شربل

ورقتي البيضاء

بطّلت اكتب..ليش..ما بدّي..!!
حبري غفي زعلان
أكتوب ..ومحّي قصايدي بإيدي
عفت الورق...هربان
والقلب عم يغفا ..عا تنهيدي
تا تطلع الردّة
وسافر مع النسيان...
عا مطارح بعيدة
وأيدي على خدّي..!!

بطّلت أكتوب...قاعد لحالي
وناعوستي ..صورة
بتغفا بدفا عيوني...وما بقدر نام
ها القد مقهورة
يمّا حبر..رسّام
مجنووووووون خلّوني
الرسام ..!!والصورة..؟

ها القد... زعلاني...؟
يا ورقتي البيضا
تركتك ..عليي تعتبي ..مشغول..!!
لا تلعّبيني ..بجن..غميّضة
العالم شو بدّا تقول..!!
بطّلت اكتوب ..شعر وغناني
جرح..انفتح..عا طول؟
وبعدو البحر ..مشغول
Me

شاعر ..وجرح

جرّحي سألني ..ليش جرحك
نزّ
فتّقت روحي وجرحك
بيوحي
وقتلت حالي متل دودة
قز
وحررتك من الذنب
بجروحي
... وكلما القصيدة بدهشتك
تنهزّ
بشوف السما عناقيد
عا سطوحي
وضوّ السهر بيمزمز
بروحي

ووف أووف أووف

لوّ ضل كلمة لوّ ..!!فيها
لوّ
بيلعب خيال الضو
وبيحلوّ
وجّ المسا الهلكان
عا الدفتر

بتطلّع قصيدة نازلي
... من الجو

هيدا الوحي ..بيحب يعمل
جوّ

يعني الما عندو من السما
ألوان
بيطرش بيوتو تراب
تا تضوّي
وبحر الما عندو بالشعر
أوزان
بيصير هوّه شعر مش
هوّي

وما في شعر بيعيش
بالقوه
.
وتا تشع برا ...طلاع
من جوّا
ولوّن بحبرك لوحة
حروفك
بتشوف عطر قصايدك
ضوّى
وشوق القصيدة ضل
عا كفوفك

لعبة الواو انتظروا الدرس القادم

بطلّت حبّك..لأ
ما بدّي
سخّر قلامي للغزل..!!
ردّي..؟
عم دقّ صرلي شي
ربع ساعة
وعم حس انّك قاعدة
حدّي
ولا تقنعيني راييحة
تنامي!!
... هههه
بطلّت اكتبلك غزل
زعلان
منّك ما قادر يوم
انساكي
الفيبر معك بيقطّش
وتعبان
وبتعرفيني جبت
سلّولير
وما دفعت غالي الخط
لولاكي

حبّك مرض شاعر
متا إدمان

وهيدي القصة كلا هههه

عيونك بتحكي بضو ما بيحكي
وشردة خيال بعالم الزرقا
وكلما انرسم عا صورتك ضحكة
بتعرق جبين الشعر ..عا الورقة

انتي قصيدة ..وبحر..بالمحكي

وخايف يصفّي دمّك وما تبوح
صرّخ وعلّي الصوت عبّي الكون
نبني وطن..عملاق مش مسموح

... نحنا معك يا جيشنا بالروح

خوفك علينا ..بحكمتك منشاف
بتخاطر بروحك تا تفدينا
وبنعرفك مغوار ما بتخاف
... بتموت ..كل نهار عا الجبهات
للموت متعرّض تا تحمينا

بعرسال شفنا الدم منك سال
معلّق على عنق المجد سلسال
منفخر اذا استشهدت عا الجبهة
بنحزن اذا اغتالوك بعرسال

غدروك ..بس الغدر ما عرفتو
ضليّت حامل هم أرزتنا
الدستور لا حرقتو ولا حرّفتو
ووقفت حتى تصون عزّتنا

بس المصيبة اليوم هزّتنا

من وين بدّك يامسيح الشرق
تبلّش تهد الهيكل وتبني
ما شفت حتى بالخطاياالفرق
بيتقاتلو تا يقسمّوا الجبنة

حكّامنا بها الشرق بدهن حرق
ولولا كفرت.. بالدين حاسبني
للقتل والتهجير عندن طرق
وكل يوم عا الشاشات يا ربّي
ما بشوف الا ناس منغبني

كل عيد .عم بنعيّدو بالنار
وحكّامنا بعيّدو بوسكي
والقتل والتهجير موضة صار
ما بيعطفوا عا الدير! والحسكة..!!
بدال الورد بكفوفنا المسمار
بزلعومنا عم تعلق الحسكة..!!
ومن كتر ما في بالشرق كفّار
شو قيمة البخور والمسكة
وعا ديارنا كلما شي مجرم زار
بيشوف باب الهيكل المنهار
مخلوع...قفلو وضايعة المسكة

زجليات

1

مرّقت كفّي..فوق جمراتك
فزّوا إيديكي يبعّدوا كفوفي
وغطّوا إيديي بخوف ورداتك
وقرّبت ضمّك بس تا تشوفي
قدّيش حبري بيعشق حروفي

منقاد طيّرك يبرم بإيدي
وياخد خيالي ..عا دني جديدة
وكلما الروح تزت تنهيدة
قبال الحلا ارمي انا سيوفي

وشيطان فكري يفك بالتفكير
زريّن كانوا لعطرك نواطير
وكلما تشدّيلي عا ديي كتير
حسّك عليي كتير ملهوفي

وتقاوميني وترجعي تشدّي
تقولي جبيبي ..فل...ما بدّي
وتمرقي كفوفك على خدي
وتمتميلي يا بحر لا تشد
انتي الوحيد بتعرف ظروفي
...

طلعة روح

جرّبت محّي..وما قدرت محيّت
لَون الفرح من صفحة عيونك ..
مدري انا عا هامش الليا ريت
مدري انا عا هامش ظنونك
شو ما عملتي البحر ممنونك

طفيت وهج عواطفي وضويت
قنديل عمري عا شواطيكي
رفعت المنارة !! بالشعر تا البيت
كلما كتبت الحرف يرشح زَيت

ندرت شمعة وآمنت فيكي!

جوجلت كل قصايدي تا شوف
أيّا قصيدة بتشبه عيونك
لقيت الحرف خارج عن المألوف
والحبر عم بيجف من دونك

فتّقت جرحي...بعاصفة اشواق
ودوّقت روحي طعمة جروحي
وغفيّت همي عا الورق تا فاق
فيي طموحي والحرف يوحي

طلعتي قصيدة مطلّعة روحي

2

عليّت سقف قصايدي وضليّت
حلّق مع الأحلام ..باليا ريت
حسيّت تعبت بالسما روحي
من بعد ما برمت الدني ..بالبيت

هزيّت ورد عواطفي ولوّنت
جرحة حنيني...طلبتها وتلفنت
ردّت حبيبي مين..هيدا إنت
قلّتلها ..بحبك ..وشو حنيّت؟

قالت اعتقني.. كلهن بالبيت!!

سكّرت خطّي ..واكمشت دفتر
شفت الورق عا غيبتي مشفتر
والضو بقلام الوحي ..أفتر
من قبل...مش قدران اكتوب بيت

لميّت حالي ورحت بخيالي
اسهر معي ...؟وما اسهرت ل حالي
وفضيّت قلبي تا أنشغل بالي
وعيّطت عا حالي..وما رديّت

مدري انا هربان...من حالي
مدري ..الشعر هربان منو البيت

1

همي كبير

ويلك إذا تأكدَّت.. خنتيني!
بالحلم وب شردات عَينيكي
ببطَّل غزل بحلفلك.. ب ديني!!
... بمطلع قصيدي إسأل عليكي

لا.. تشنقي حروفي بايديكي

عوّدت قلبي ..يصبّر عيوني
عا صورتك ..!! ما ضل عندي صبر
ومن كتر ما عم كذّب ظنوني
... بكسّر !! حروفي بخابية من الحبر

لا تجرّبيني..بفلت جنوني..!!

وينك..ما بعرف غايبي .وموجود
عا النت ناطر شوفك قبالي
جمّر جروح الضو ..والمقصود
تحسّي بجمري وتشغلي بالي

وتا ضل ناطر هيك مش حالة

ياها القصيدة .ضجرت وراقي
والحبر نشّف دم عا فراقي
يا بتكتبيني عا وراق الروح
يا بكتبك عا وراق اشواقي

متلي ما فيكي شاعر تلاقي

بحر الحب

واقف عا مفرق غربتي
وقلقان
وخابف جروحي تلتقي
بروحي
وطيّارتي ما تروح
عا لبنان
وارجع بروحي هرّب
النسيان
ل مطرح ما جرح العاطفة
بيوحي
ضيّعت حالي بعد
ما لاقيت
جرحي سبقني ولوّن
دموعي
وعلّقت أحلامي بصدر
البيت
وكسرت إيدي وشحدت
جوعي
وضليّت خايف تنأذي
وتوعي
حطيّت وردة وشفت
بكتابك
موضوع ..شلتو من
مواضيعي
وشميّت عطري الضل
عا تيابك
وتاما تحسي مشيت
عا السكيت
وما يحس فيي ولا حرف
بالبيت
مشيت السطر عا روس
صابيعي

فتّحت لون قصايدي
تا شوف
لون الوجع بعيون
محبوبة
ضليّت ضوّي حروفها
بحروف
من شمس فكر الروح
مسكوبة

وضيّغتها بالشعر
عا دروبي

دوّرت بركي بشوفها
وبختار
شكل الألم بغيابها
قاسي
والجرح فيي صار ينزف
نار
ومركب غيابك عا الوعد
راسي

ومن كتر ما عليكي برمت
صفيّت
آخد لقلبي حبوب
مش راسي

...بحر الزجل

ايّا مرا..بيوم المرا بتشوف
أنّو المرا حرّة
وبشرقنا بنشوف عا المكشوف
رح تفجر الذرّة
وبعدن بيقولوا حقّها مخطوف
مفروض نتحرّى؟
شوفوا ..!!الظلم برّا

الرجّال..!! مــــــــا لو حقوق بالمرّة

... عنّا المرا بتفيق عطر ولون
تا تفيّق هدابا
وجيرانها بتدق عا بابا
وبالغرب شوفوا الظلم عنّا هون
بتنيّم كلابا
عا سرير احبابا
ورجّالها معتّر ما عندو عون

وبعدن بيقولوا في ظلم بالكون

أيّا مرا ببلادنا بتعيش
مع شخص بتحبّو
تحت الدرج وتقول بتحبّو
والله ...!!اذا ..؟ما عاشت على الريش
بتصدّقوني ...!! يمكن تكبّو
رجّال عنا بالغرب درويش
رح يكفر بربّو
ونسوان كل الليل سهراني
بالبيت ما انضبّوا..!!

حقوق المرا ببلادنا تدخين
ولت وحكي عا الناس ليل نهار
وبعصرنا قولوا الحقيقة مين
بيزرب مرا بالبيت ..!!هيدا عار

اليوم المرا متعلّمي وما زال
فيها توصّل عا النيابي قال
هيي بتطلع تجمع الغلّة
وبتقول متلي متلك وحلّي
أرتاح ..دشرني..!! ما بدي عيال
انتي عليك بغيبتي تجلي
وما في مرا عم تحترم رجّال

وحقوقها بعدن بيقولوا قلال
ههههههههههه

مين منكن بيطالب بحقوق المرا بس يقرا القصيدة...
هه

.رثاء جريئ

حبّوك ..بس الحبّك تركتو
يغرق بدمع الشوق تا يشوفك
عا الظلم شهدوا كلّن وسكتوا
عن حق ضاع..ومسمروا كفوفك

حبر الوجع عم يشرب حروفك

خلفك شعب..مظلوم دشّرتو
... بيصرخ يا الله ليش حلمو مات
وانتي بخلاص الروح بشّرتو
الجنّة قريبة والوقت ما فات

ويالصوص قال الشعب بغيابك
تا ترجعو..!! عا الهيكل فشرتوا

من كتر ما بكيوا الفقرا عليك
شربوا بغيابك دمعهن هوغو
كل الزرعتو زهّر حواليك
شوف البشر ..محروق قلبا عليك

برّد قلوب الشعب يا هوغو..؟

ما كنت حبّك..بس ما تجنيّت
وعنّك قلت ما حب شعبو كتير
حاولت تعطي لكل عيلة بيت
وما عطيتها..!! كان الفساد كبير

ومن كتر ما قاومت ما استسلمت
لآخر حياتك يا بطل ضليّت

جرّبت تعمل شعب ما توفّقت
كل اللي كانوا حدّك ملاعين
سرقوك ..حتى خيّك..!!وما اسرقت
القتلوك هنّي بمكرهن تخمين

واعطيت وقتك للشعب مسكين
ل صحتك ما ضل عندك وقت

شعبك تا تنجح ثورتك قسّمت
وما بزلت حتى توحدو جهدك
وموقف أخدتو..من الفساد الصمت
وما قدرت تحبس فاسد بعهدك

حاولت بس الحولك ملاعين
وضليت تؤمن بالوطن مسكين
وبكرى بتجي الايام يا هوغو
وبينكشف سرّك للملايين
القتلوك هنّي بحقدهن تخمين

بحر الحق

chavez

عملاق مسرح شرقنا خلّد
وعاش بعصر ..اعلامنا العصري
تخلّا عن التقليد ما تقلّد
وقلّو يا عصر شراب من عصري

وسكرت بعلبك من نصر نصري

ضويّت فينا مغارة الأحساس
تا صارت النغمة طريق الضو
وصوتك سكرنا متل خمرة بكاس
... ونهرك جرفنا وحطنّا بالجو

وبقيت متل بعلبك بها الجو

غيّرت فينا .الذوق صرنا نحس
بطعمة الصوت الما ألو طعمة
وهمس الحكي لو كان عنا بس
كنا ما قلنا عصرنا معمي

لكن انت الله عطاك الصوت
نعمة ال بيعصرك عاش ها النعمة

لمتلك ما ماتوا خلّدو وعاشوا
فلعة عليها تشوهروا الأمجاد
وكل اللي كانوا يعيّشوا اعتاشوا
لعنة وطن والكرّموه ولاد

تجار فن وموتهن عاشو
غش الصحافة بذمة النقَّاد
يا شمس دين الفن ما بتنعاد

كل من شرب من صوتك تلبّك
واحتار شو بيكتب عن التاريخ
اللي بيكرهك قديّس..والحبّك
شيطان ..عاشوا مجد ما بيشيخ

يا مجد انتي مرافق بعلبك

تلاتين شهقة عطر ساكبلك
تلاتين دمعة شعر كاتبلك
وبتختصر بالفَّن يا نصري
ال بعدَّك إجو واللي إجو قبلك

لروح العملاق نضري شمس الدين

قديّش صرلك ..ما كتبتيلي
لا تقنعيني ضاغطة ظروفك
بعرف نسيتي ..وما اشتقتيلي
وبتعرفي ..!!بدنّق على حروفك

وقديش صرلي؟ بعيد ما بشوفك

جمّرت احساسك عا جمر الّو
وما شفت غير النار بجروحي
وعلّقت صورة مبروزة بالجو
... تا كل ما اشتاق ل روحي

عمّد عيوني بجرن احساسي
وامسح جبين القافية بالضو
ههههه

بلا عنوان ..

حاسس عليكي ..عايشة من الموت
ومتلك انا ميّت بهاالعيشي
وكلما صرختي .آخ ...!!بسمع صوت
روحي..بيقلي لازم تعيشي

قررت اني فلفش وراقي
وخلي الحبر يشرب من الريشه

فكيّت زنّار الوحي.. وشديّت..!!
خصر الخطيّة بين صابيعي
وبلّشت اعصرلك شموعي زيت
تا نلتقي وما ترجعي تضيعي

وضبيّت شنطتة غيرتي وما لقيت
متلك سما بتفهم مواضيع

وطقس القصيدي من سما الإلهام
نازل من عيونك متل دمعة
آمنت.. فيكي وقلت حقا قام
زعلان منك بس ما بنلام
ان ضويت عمري بمدبحك شمعة

نقيّت فيكي ..شو شفت علّه
وشو مغيّرة عليي ..وشو فيكي لو
تاري عليي كل ما تطلّي
بحس الوحي عم ينزل من الجو

مكسوف ..؟ يمكن .. مستحي من الضو.!!

ضبي المسا بجزدان
زاكرتي
لا تسألي عليي رح
كون مع مرتي
ما تجرّبي تدقي ما فيني
رد
المكالمة بتجيب آخرتي
ههههههههههههههههههههههه

وينك..ما قادر شوفك..
بعيني
وردك بلا جنيني
ما عندو سياج
وتا ساعدالمحتاج
من عيني
بعطيه تاج
العطر بجنينة

وما في حدا بالكون
... يا جنّي
بيقدر يفرق بينك و
وبيني

بحبك..

جنيّة وبحر

حردان ..منها....!!
مزعّلتني كتير
تركت بروحي ..تنزف
جروحي
وخلّت الشوق .يطــــــير
من روحي
شو قولكن ..طير الفرح بيطير
وبتدلف سطوحي
... ..
عرقان وجّي..من الخجل محمّر
والقلب عم بينط
كلما خيالك مرّ
لا تروحي
انتي القصيدة العايشة بروحي
ومهما الورق ينحط
تا تكتبيني بريشة جروحي
دبل الحكي بسجرة حياتي
وهر
وبعدو ربيعي مزّهر طموحي
وعم حبها بالسر!!
جنيّتي...!! بتوحي

خرطش عا حيط المحكي

عم تسألو ..؟
عليها!!
راحت..!!
مع النسيان..
عا جناح ...عينيها
وهربت ضباب ..جروح
وحملت عمر ..
عا كفوف إيديها
... لا تسالوا ..عليها
الفرحة حلم
بيروح.

جوع العمر

عريّت حلم قصايدي
بريشه
ونتّفت جنح الليل
بالشمعة
طيرك مرق عا قصايدي
غرّد
جوعة حرف موجوع
أكلو الجوع
... بالعاطفة تفرّد
مارق عليكي العمر شغلة
بال
محتااااااال ما عم يقدر
عليكي
حامل همومو
جبال
وعم يرتخي
عليكي
ويشرب عذابو بكف
إيديكي..

ب
حّرت فيكي ...وما قدرت لاقيت
صرحة دني
طلعت غصب عني
مرقت عا جرحي ..مبللة بالزيت
تا تمسح العنّة
العم تنخلق مني
بواب الوجع عم تنفتح بالبيت
والهم طمّني
عم تكبر العنّة
والوقت عم يمرق على السكيت
وعا دروبها جنّي
وموعود بالجنّة
يا ها القصيدة حرفك استحليت
وبلوزها البنّي
العم ينتحر عنّي
ومغروم بعيون الوحي والشعر
كل البيبقا معلّق بجنّي

حيط الوقت
M

حيط المجد

فضّيت بحري سكرت مواجي
بكاس المجد .تا جن
قلّي ..!! يا بحر الفن
صرلي عمر ناطر على دراجي
تا التقي بالفن
وتتربع صحابو ..وسلّم انا تاجي
الا الهاتف رن..!!

... مينك انت تا تربّع ...وتختار
شعّار .تتخلّد
والمجد تتقلّد
ما الكل صاروا بمرتبة شعّار؟
وقلال لحقوا الكار
وتا عد ..!!بدي صدّق مجلّد
ومين الما عندو حجار...
يرمي الخطية بعار
شاعر ما فينا نقول عنو صار
تا الرب يتقلّد

يا بحر انتي مركب الغياب
وموجك سفينة نو
كلما غمرت ل غياب
بتحبل خوابي الجو
وبينفرط سجرة ورق بكتاب
بتطلع قصيدة ضو

هوني يا شباب اعتزلت النقد وتركت المجد يقيم مين بدو يستقبل
وبعدني ضايع عا دراج المجد

ألشاعر سليمان طراد
بحبك يا مقصوفة الرقبة

..حبّي البحر عا شرط لا تجنّي
بحري بحر أسرار
شيطان!! متخّرج من الجنة
وعندو حواري ..؟كتار
وبيموت بالجنّي

حبّي ما فيكي غير ما تحبّي
قلبي ملان كتير
... ولا تكرهيني وتنكري حبّي
قلبي فرح بيطير
حبة ورا حبة

يتبع
..

ألشاعر سليمان طراد
طقيّت وحدي..بعجقة
الغربة
ومعلق بها الجو
عم بحلم بشربة
وناطر يا نسر
الضو
..
تا حس فيك وصلت
عا قربي

ضوي

Wissam Salameh ***
سليمان حرق النار
بدو نار

والعمر لو شروال
ومفلت

خبي جروحك
تا تدوق الغار

بكرا العمر
بتشربو
متلت

ألشاعر سليمان طراد
شربت العمر ..ونسيت طعم
النار
ما النار عم بتعيش
بجروحي
والغار لما صار مني
يغار
صبيّت همي نار
بجروحي
وانتي الوحيد بتعرف
اللي صار
لما شلحنا الحظ
بالغربة
صار الوجع ل حروفنا
بيوحي

Wissam Salameh ***
سليمان...شوف

الهجر

سماوي

معقول؟؟؟ قلي

نسيت مسبحتك

شو الجرح

غير قشاط غلاوي

لوما ب كلمة

تنحتو

نحتك
ألشاعر سليمان
طراد شفت الهجر ..بس القهر
ما راح
تأكّدت انو الموت
سمّاوي
وتا فيك تصبر عا الجرح
يا صاح
بدّك طهارة قلب إلّاوي

ما انت عارف طبعنا
من الديب
والّلي ما عندو من الغدر
اطباع
بيكون ثعلب مكر أو
وواوي
هههههههههههههههه

Wissam Salameh ***
يا بيدبا !!! التعلب

إلو أفضال

وإبن المقفع

كللو

ب دمنة

ولولا المشقة

كان إبن

الضال

لا دام بالكلمة

ولا

1

ألشاعر سليمان طراد
لوما الأبن والآب
ما كنّا
وما كان عنّا للحقيقة
ناس
وضو القداسة بقلب
يوحنّا
غير العتم بمخيلة
يوضاس

والقلب لما يحب
من قلبو
بيفلش بحور محبتو
احساس

.نهر...وجع
أمري لألله ..حامل الاسرار
وبضحك بعبي..كلما بشوفك
وبشلح عيوني عا سرير نهار
بركي الصبح بيطل عاحروفك

وبحب جنيّة ورق وبصير
شوف اللي جايي وبفتح كفوفك

بلاقي الزمن عا دفاتري سهران
والحرف واعي ..والسطر عرقان
... بفتح كتاب الحب بركي بشوف
جنيّة وراقي مع الشيطان

بسكّر الدفتر ..بعد ما اقرا
ب بحور عينيكي البحر غرقان

بطق الوجع وبطيّر السدّة
وبشد عا جروحي تا تطلع آخ
وبحس حالي واقع بشدّة
وجنيّتي بتزرع بقلبي سياخ

يا ها الوجع تا توصّل لقلبي
قص المسافي البينا وفشاخ

نهر ..الوجع

.جيب مورانو

مرقت عليي...شفتها من بعيد
بالجيب..عم بتسوق ..مورانو
وسيّارتي كيّا ..وعامل عيد
جديدة اشتريتا مفيّمة عا العيد

بس العجبني جيبها النيسان
ما في ولا دخنة بأكشمانو

... ضليّت ماشي خلفها ومدووخ
شو ست ملّا ست ها الحرمة
وما قدرت الحقها متل صاروخ
والجيب ماكن متل شي قرمة
ههههه
شو جيب يغزل العين ملّا جيب
بيقبّع الزفت بفرد برمة

ضليّت داعس خلفها ومحروق
تا شوف مين السايق بلاقي
وما كنت اعرف مين عم بيسوق
تا شفت شعرا الناعم الناقي

قرّبت عشر متار يا ويلااااه
هيدي المرا جنيّة وراقي
هههههههههههههههههههههههه

بلّشت ضوّي زمّر وطفي
تا تنتبه انو البحر موجود
وتا توقّف على الدرب ما تكفي
لا حسّت بسيّارتي الكيّا
ولا وقفّت عا دروب فاريا

ولا تطلّعت صوبي تا تقشعني
عويناتها كانوا كبار وسود

ههههههههههه قصة حقيقة لا تمت للخيال ههههههههههههههه

» وينك يا بو شربل
» روحانيات بو شربل وبو علي
» أبو شربل والاستقاله
» ابني شربل
» ارتجاليات بو شربل بحر الزجل