حوار بحر الزجل وهيفا العنداري

Haifa Andari Zaidan

جنّ فييّ متلما بالزّيزفون
بِتْجِنّ نسمات الْهوا بْليْل الْسّكون
شو همّ شكلي لوْ كِنِتْ كِفْما بْكون
ما زال عندي عيون بِتْفجِّر عيون
وْإنت اللّي شِفنا كلّ أشكال الفنون
... بِجْنونَك وْطيشَك وأنواع الْمُجون
ما زال روحَك بالخطايا متقّله
تْرهْبن وصللّي بْديْر تتسِدّ الديون
.ألشاعر سليمان طراد

ديني قمر عم إدفعو كل ماالمغيب *** بيصير صينيه وبيقلي شعر جيب

وبسهر معو عالسطح متل العندليب *** القاعد عم يغني لخصلات
الزبيب

... وعندي حبيبه شوقها بقلبي رهيب *** وبحر الزجل بيحبّ يسكر باللهيب

وعّيش أنا مجنون بالحب الحلو *** طقّي حسد مازال ماعندك حبيب

بحر الزجل


Haifa Andari Zaidan

عندي حبيب وما إلي عـــــــنو بديل
وعالقلب نازل متل مي السلسبيل
الله الخلقني بالشعر ....مالي مثيل
من هيك ما تلاقيت بالنصف الجميل
وإنت اللي عمرك عايشو متل العطيل
... النظرات تشحذها من الجفن الكحيل
مع كل نظره بعينك بتفلق حجر
ومع كل هزة خصر عقلك عم يميل

.ألشاعر سليمان طراد

الكون طابه بس قلبك مستطيل *** كل مابرم عالحب عم يقتل قتيل

من حيث بالأوهام ميزانك تقيل ** بس بكلام الجوهري سعرو قليل

وقلتي بعد عم تبرمي وبالك طويل ** تاتلتقي بنص الجميل المستحيل
...
يعني شوهالنص للي عندك يامدام **تيكون بدو من الزلم نصو الجميل

بحر الحب الكامل

.ألشاعر سليمان طراد ياهيفا خلص بيناتنا صلحه ونحنا سوى ضد مملكة العتم
وانت عندك كهربا وما في داعي نضبطك بتعليق الشرايط وسرقة الكهربا خخخخخخخخ

خلصنا ياهيفا من حكي الكوميديا *** وهلق فتحنا للغزل موبيليا

... نصك ملاك الفيزيا والكيميا *** الغنى بعرس الضو هللي لوليا

يانصّ بيحلّي بحور الشعر يا *** نص انسكب مجد وكرامه و كبريا

يانص لويشلح حنانو بالدني *** بيدوب نص القطب عاسيبيريا

بحر التجديد

يا ريت الكل بيتعلمو منك الروح الحلوة


.Haifa Andari Zaidan

فكّرْت خصْمي منْ رجالات التّقال
دعسة حْروفو تحتْها بْتغرق جبال
لكن قبالي شايفي بحر الدّلال
بخصر يلوي شي يمين وشي شمال
وْمعروف عنّي بالجمال وبالكمال
... آيه بْخيالي ضاقت حدود الخيال
وْمن وقت ما كْتبْت القصيد المرتجل
ما اعْتدْتْ إتغزّل بأنصاف الرّجال
.ألشاعر سليمان طراد

مارح تقعدي عاقلة هههههه

عنك تردّ العين عم دوّب رصاص *** وارسم خيالك تاج بقلام الرصاص

لكن تقلك ليش عم نعمل قصاص *** بنسوان منهن ماعم نلاقي خلاص
...
لما المرا صارت تحشّي بالقراص** *وتطعّم التفاح بغصون النجاص

صفّى الزلمه كتير عاشقفة مرا *** وصرنا لنسوان الحشو نبعت نصاص

ههههههههههههههه
بحر الطبخ قلتلك لا تستفزيني ههههههههههههه







Haifa Andari Zaidan

يا ضرس فاضي مْن الْحشو عمْ يِنهَشو
السّوس وجراثيم القوافي عشّشوا
وْيا مْخدّتي يللّي عليكي تْوشْوشوا
الأحلام وِسْرار الزّهور تْفلْفشوا
ويا مرجله يللي على دربك مشوا
... وكانوا على كتاف الغيوم يعربشوا
ما ضل منهم لا رباع ولا نصاص
كل البقي طاسات ما فيها حشو
1.ألشاعر سليمان طراد

الكون طاسه فاضيه وفاضي الخيال *** والبال فاضي وكيف مابتفضى يابال

وكل مالشمس بكير عم تمرق قبال *** وجّي بفضّي الضو من وجي خيال

وانتي ياكبّه مطفّحه بحشوي حلال *** ومحمّله همومك على ضهرك شوال
...
شو رح يفيدك تقل راسك يامدام *** مـــادام بابو مسكّر بستين غــال

ههههه
قلتلك اقعدي عاقلة خخخخخخخخخخخخ اسطفلي خليكي تاكل بوكسات خخخخخخخخخ
بحر الزجل