عادل خدّاج وبحر الزجل

لحوار اللي صار بموقع المنبر بين الشاعر عادل خداج منبر ودف .و ألشاعر سليمان طراد .
غربلتو ونزلتو بلا التعليقات انشالله ينال اعجابكن .
سليمان افتتاح
يا خدّاج يا خفقه بصميمي
انت للشعر والإبداع قيمه
ولأنك شاعر الجيلين بدي
عليك النار افتح بالعزيمه
انا ما جيت قلّك كم رده
تا تمضيلي على الرده اليتيمه
انا من زغرتي شاعر تحدي
جديدي بيشهد عليي وقديمي
ولأني ما مسكت خنجر بيدّي
الخيانه والغدر ما حملت شيمي
لأني بعرفك انسان جدي
فلشت بيوت اشعاري وليمي
ولأنو في إلك عندي موده
ومثالي المنبري سرّحت ريمي
ولأني متابعك من قبل مده
وسامع كل حفلاتك...عظيمي
مثّقف محترم ضد التعدّي
عنيد ومر ..حبيّتك غريمي
طلبتك عا الحوار ومش تعدّي
على مجدك يا بو مدين لأنو
التواضع فيك عم يعطيك قيمه
وانا من غربتي ببعت سلامي
إلك يا عادل الكلك شهامي
لأنك صاحب الكلمه الجميله
الما فيها غش وبترشح كرامي
انتقدني البعض من مده طويله
ليش عملت عن عادل محامي
انتقد بالشعر قالو ولاد جيلي
ونقدو كان قاسي بالعلامي
قلت عادل بنقدو ولو تقيلي
بدّي قولها ..مع احترامي
لشعّار المنابر عا القليله
عادل ضل عادل انتقادو
وبعمرو ما بتعنيه الأسامي
ولأنّك صاحب الطله المهابي
انا تجرأت ..افتح عا حسابي
كتبت الإفتتاح وما استشرتك
لأنّي بعرفك اغلا حبابي
قادرتعتذر لولا حشرتك
بوقتك..حر ما ترد الاجابي
ويمكن حجّة ولادك ومرتك..؟
ما عندك وقت..!! حتى للكتابي
بدرب السيم بتزكّر نطرتك
ورحت تا شوفك وشفتك صلابي
وندمت كتير ع بيتك ما زرتك
وشربت الشعر من اطيب خوابي
ولأنو ما احترق بالشعر كرتك
ونشيط .وكنت لولا اغترابي
سحبتك ع صدر دافي وغمرتك
وقلت ما في نقابة شعر إلّا
ما انت تكون ريس عا النقابه
عادل افتتاح
انا بحّار يا بحر القوافي
سمحلي غلّ بعبابك مسافة.
وعلى الاعماق اغطس شيل جوهر...
من الاخلاق وكنوز الثقافة
انت يا بحر.. بحر كنوز مرمر..
ودراري لمجد تيجان الخلافة..
وبدك بالادب شاعر مخمّر
متل خداج. شوقي والرصافي
عرفتك بحر بالاوصاف عبقر
برواقك خمر عشق وقلب دافي..
واذا مغرور عا مواجك تعتنتر..
وطلعلك شي ولد جهل وصلافة..
بيصير البحر موجو دمّ احمر...
من جروح العدا بسيف الرهافة..
انا عا كتاف زين طلعت بكبر...
بشهادة بوعلي قيمة مُضافة...
وتواضع زين علمني ما ازغر...
وبكبر مع بحر من غير جيلي..
عند ما البحر شيلو عا كتافي..
.......................
ما بحبّ الكتابة يا غوالي..
انا بحبّ الحوار الارتجالي
بلبنان نطرت يا بحر شوفك
َبليلة تكون من أحلا الليالي
بدرب السيم ما سمحت ظروفك
ولا ظروفي نخلّي الجمر غالي
يا ربي تعود عابلادي وكفوفك
يخشّو الدفّ وبشوفك قبالي
ودفوفي يولعو وتولع دفوفك...
وخوابي الخمر تضحك للدوالي..
التحدّي يكبر بلمعة سيوفك.
وتقطّع عا بو زيد الهلالي
بيشرفّني على جنبي وقوفك
متل ما انت فيي شفت حالك
انا يا بحر فيك بشوف حالي
.......................
تحيّة من القلب أوّل وتاني
لروح المنبر وصفحة مُصاني
لرجا يونس لشاعرنا المبجّل
ولكلّ الشاركو قيمة ومكانة
انا من فجر عمري خلقت اسأل.
عن المضمون عن خمر المعاني
ولأني بذوب عالكلمة البتشعل
صرت عا منبري سيّد زماني..
الشعر اكدّ قوانينو وسجّل
الخلق تاني ما فيه يكون أوّل.
الخلق أول ما فيه يكون تاني.
.....................
وعلى ذكر النقابة شو بقلّو
لسليمان هالصدق البجلّو.
النقابة مجد تاريخ ونباهه
برياستها كبار الشعر حلّو
خليل شحرور ب عصرو غناها
شعر أخلاق ليه الناس دلّو
رجع بعدو فكر يرفع لواها
مواسم جورج بو أنطون غلّو.
وانا بحبّ النقابة مستواها.
يكفّي نهج ما يغيّر محلّو.
بعمري ما عشقت كرسة ووجاها.
انا بيهمّني تبقى النقابة.
حصن يحمي زجل لبنان كلّو.
.............................
سليمان معنّى
بعرف يا عادل حامل المنبر صليب
انشالله بتوصل للنقابه عن قريب
لكن انا بطلب لرأيي تستجيب
وتفهم عليي بالوما بظرف العصيب
بدها النقابه بعد ما يفل النقيب
من دون زعل رح قولها ويمكن غريب
عنصرشبابي يجدد ورأيي أنا
يكون التنافس بين رامي وبين حبيب
سليمان اعادة
من بعد فترة حظر يا عادل سماع
مفروض تدعي ها النقابه ل اجتماع
وتقلهن في جيل عندو اندفاع
وانتي نقيب جديد بزاتك تجيب
بعرف يا عادل حامل المنبر صليب
وبتحب توصل للنقابه عن قريب
لكن انا بطلب لرأيي تستجيب
وتفهم عليي بالوما بظرف العصيب
بدها النقابه بعد ما يفل النقيب
من دون زعل رح قولها ويمكن غريب
عنصرشبابي يجدد ورأيي أنا
يكون التنافس بين رامي وبين حبيب
عادل
يا بحر نحن للكبار مرافقين
قطعنا الحدود وبالمناصب زاهدين
ورامي وحبيب وقفت مهعن من سنين
بمعزة ولادي انا بحلف يمين
والبي البيقشع ولادو ناجحين
عن فرحتو تا يعبّر بصدق وحنين
اول ولد رح يغمر بايد الشمال
وتاني ولد رح يغمر بايد اليمين
عادل اعادة
يا بحر شرّف انت عا بلادي رجاع
ما بين حبيب ونعيم انحتد الصراع
ريّس انت بتكون تا نحلّ النزاع
البيهم انو الناس يبقو موافقين
سليمان
مع احترامي البعض شعار كبار
من جيلكم مفروض نطلب اعتذار
الإعلام كان بعصركن عامل حصار
يضوى على شعار يتناسى كتار
من هيك اشكر جيلنا تمرد وثار
وحارب فساد المنبري والاحتكار
وعبّد طريقو للنقابه وانسحب
وخلي الشباب بايدهن اخد القرار
سليمان اعادة
ما زال صدرك واسع وقلبك رقيق
ليش التعنت افتح لغيرك طريق
ما جيت حتى اجرح الجيل العتيق
جايي تا ضوي عا الخطايا بها الحوار
مع احترامي البعض شعار الكبار
من جيلكم مفروض نطلب اعتذار
الإعلام كان بعصركن عامل حصار
يضوى على شعار يتناسى كتار
من هيك اشكر جيلنا تمرد وثار
وحارب فساد المنبري والاحتكار
وعبد طريقو للنقابه وانسحب
وخلي الشباب بايدهن اخد القرار
عادل
الزغلول روكز زين يا نبع انفجر
وموسى وطليع الناس شالو من الضجر
يا جيل بو درسين لغرورو انأجر
الإعلام كبّر روس ضاربها العجر
وجيلي مشي بدرب الكبار وما هجر
عبّد طريق المجد نزعوها الغجر
بوجودنا مشيتو بطريق معبّدي
ولولا انسحبنا رح بتمشو عالحجر
عادل اعادة
مافي شعر فاسد فسد فيه الخمير
غير جيل ما بيعرف الخام من الحرير
يا جيل عبد الشعر لا تهجي الأمير
غصنك طري وما فيك تشمخ عالشجر
الزغلو روكز زين يا نبع انفجر
وموسى وطليع الناس شالو من الضجر
يا جيل بودرسين لغرورو انأجر
الإعلام كبّر روس ضاربها العجر
جيلي مشي بدرب الكبار وما هجر
عبّد طريق المجد نزعوها الغجر
بوجودنا مشيتو بطريق معبّدي
ولولا انسحبنا رح بتمشو عالحجر
سليمان
ما زال ما بيفسد عجين ولا خمير
رح جاوبك عا شرط ما تحمّل ضمير
يا جيل وزن وقافيه ومعنى فقير
انتو فرشتو الشوك ما فرشتو حرير
جيلي بخيالو طار عا جناح الأثير
وجيلك بسجن القافيه بعدو أسير
ولما لقينا دروبكن فيها جور
تركنا الطريق وبالسما صرنا نطير
سليمان اعادة
ما جيت اتجنّى ولا اعمل عدا
بحب التسامح بالدني ل أبعد مدا
لكن اذا تجنّى ع موهبتي حدا
بفتح جهنم بالزجل شاعر غزير
ما زال ما بيفسد عجين ولا خمير
رح جاوبك عا شرط ما تحمّل ضمير
يا جيل وزن وقافيه ومعنى فقير
انتو فرشتو الشوك ما فرشتو حرير
جيلي بخيالو طار عا جناح الأثير
وجيلك بسجن القافيه بعدو أسير
ولما لقينا دروبكن فيها جور
تركنا الطريق وبالسما صرنا نطير
عادل
يا بحر كنا صحاب صفيّنا عدا
ما زال راسك فجّ بعدو ما اهتدا
نحن مع كبار النفس قطر وندا
وشوكة بعيون زغار غدرن عالهدا
ويللي حفر جورة لخيو واعتدا
فيها وقع خرجو البحيشة والردا
وكلما غلط شي زغير وتحدا الكبار
صوب السما بوديه ما برحم حدا
عادل اعادة
سليمان حاجي بفلسفاتك تدعي
انبلشّت فلفش بالثقافة والوعي
يا بحر نقطة انت ما بتطلع معي
لا بالخبر شفتك ولا بالمبتدا
يا بحر كنٍا صحاب صفيّنا عدا
ما زال راسك فجٍّ بعدو ما اهتدا
نحن مع كبار الخُلق قطر وندا
وشوكة بعيون زغار غدرن عالهدا
ويللي حفر جورة لخيو واعتدا
فيها وقع خرجو البحيشة والردا
وكلما غلط شي زغير وتحدا الكبار
صوب السما بوديه ما برحم حدا
سليمان
لولا رميت البحر وتضرّج دما
إلا بسهم الشعر مش رح تنرمى
جيلك وجيلي كبار منبر إنمّا
في فرق بين المخمره والسينما
لا يوم شفتك غيم عم تروي الظما
ولا جناح فكرك بالسما طار وسما
ريحة سما منشمّ كنا بكلمتك
لو كنت شاعر قادر تطال السما
سليمان اعادة
يا سمكة البالنهر ما بتعرف تطير
وحلمت تودّي عالسما باشق كبير
غيم السما للباشق فراش الحرير
وبيشوفكن من فوق أصنام ودمى
لولا رميت البحر وتضرّج دما
إلا بسهم الشعر مش رح تنرمى
جيلك وجيلي كبار منبر إنمّا
في فرق بين المخمره والسينما
لا يوم شفتك غيم عم تروي الظما
ولا جناح فكرك بالسما طار وسما
ريحة سما منشمّ كنا بكلمتك
لو كنت شاعر قادر تطال السما
عادل
بعلم الفلك يا أرض مبرومة اضحكي
تحت.. السما وواقف عا راسك يا ذكي
بواشق نسورة وين يا كتر الحكي
جيلي الصنع مجد الزجل حاجي بكي
جيلي عصر رنّ الذهب والتكتكي
وجيلك عصر دقّ التنك والفذلكي
وكلما طلع خنفوس حافظ كلمتين
بدّو مع العملاق يفتح معركي
عادل اعادة
من المخمرة والسينما جيلك صنيع
وجيلي انا من عصر فيروز ووديع
يا بتعقل وبتضب حالك عالسريع
يا بعملك للناس عبرة ومضحكة
بعلم الفلك يا أرض مبرومة اضحكي
تحت.. السما وواقف عا راسك ياذكي
بواشق نسورة وين يا كتر الحكي
جيلي الصنع مجد الزجل حاجي بكي
جيلي عصر رنّ الذهب والتكتي
وجيلك عصر رنّ التنك والفذلكي
وكلما طلع خنفوس حافظ كلمتين
بدّو مع العملاق يفتح معركة
سليمان
جيلك يا عادل إنت ما منّو نوا
تربّى بفيّة جيل قدّملو الدوا
عملاق موسى كان مفعم بالقوى
ومتلو طليع الشعر صوت ومحتوى
ولازم بعد ما فيهن العمر استوى
تطلع عا منبر إبن جيلي الما هوى
تا نشوف كيف العملقة والخنفسة
من جديد جار العمر واجتمعو سوى
سليمان اعادة
انشالله يا عادل عمرك بيطلع طويل
وتضلّ وصلة بين جيل وبين جيل...
موسى وطليع وأسعد وزين وخليل
لو كان صوتك عا منابرهن دوى
جيلك يا عادل إنت ما منّو نوا
تربّى بفيّة جيل قدّملو الدوا
عملاق موسى كان مفعم بالقوى
ومتلو طليع الشعر صوت ومحتوى
ولازم بعد ما فيهن العمر استوى
تطلع عا منبر إبن جيلي الما هوى
تا نشوف كيف العملقة والخنفسة
من جديد جار العمر واجتمعو سوى
عادل
بجيل السبقني مشيت وربحت السباق
َوجيلي عا فلسفتو مجد لبنان فاف
ومالي الشرف مع خنفسة جيل المعاق
غنّي وما همّو الشعر بيهمّو الخناق
واحد بيسرق شعر من مجد العتاق
وواحد بيقرا عالهوا تف والوراق
وواحد عن التهذيب عامل انعتاق
وواحد مثبّت عن ضميرو الإنشقاق
من هيك الله جابني شاعر كبير
ضربة كبيرة عاللصوص وعالنِفاق
عادل إعادة
بالعمر بدعيلك يا بحر مسوكرة
بطول العمر لكن نصيحة مجوهرة
إيّاك تقرب عالبلف والزعبرة
في ناس بدهم رجم من طير البُراق
بجيل السبقني مشيت وربحت السباق
لا تزوّر وتكذب وتحكي حكي عاق
ومالي الشرف مع خنفسة جيل المعاق
غنّي ما همّو الشعر بيهمّو الخناق
واحد بيسرق شعر من مجد العتاق
وواحد بيقرا عالهواتف والوراق
وواحد عن التهذيب عامل انعتاق
وواحد مثبّت عن ضميرو الإنشقاق
من هيك الله جابني شاعر كبير
ضربة كبيرة عاللصوص وعالنِفاق
سليمان قصيد
أنا يا /منبر /بإسم /الخوابي/
بشكر ها الرعايي المستجابي
ولأنك يا رجا غالي عليي
جيت وجبت عا الموقع حبابي
وياعادل بالدفوف المنبريه
انت مش عادل العادل جوابي
كلامك افترا وكفر وخطيه
بأنك داعم الجيل الشبابي
القصب ما بيدعم الارزه الفتيه
الشلل ما بيدعم صعود الروابي
انت شو خصّك بجيلي وفيي
وشو خص الحصرم بخمر الخوابي
وعلى قصّة هواتفنا الذكيه
ليش بتنتقدني مع صحابي .؟
لا تتذاكا.على عقول الزكيه
الكتابه هم مش متل الخطابي
ولأني ابن جيل الشاعريه
الما بينا وبين الله في قرابي
صرت ان قلت رده فلسفيه
ألف شاعر يفرّخ من جيابي
ولأني معلّم بلا معلميه
وشاعر رغم هجري واغترابي
اذا بغني قصايد عاطفيه
البنت بتقول يا مصدر عذابي
النحت بالحبر بدو عبقريه
وقلم رسّام مبدع بالكتابه
ما بدو بهورات وعنتريه
وفكر فاضي وحكي نابي ورتابي
انت عا صخر قلعه موسويه
وعا ضهر قلاع جيلي غبار رابي
همزة وصل لا صارت قضيه
ولابين سباع غابي سبع غابي
قبل جيلك ألف قامه أبيه
أسامي تتّوجو ملوك الإهابي
وما شفنا بجيلكن واحد عا ميه
علامه فارقه وقامه مهابي
واذا فكّرت مرّه بطيب نيي
اعلن للنقابه إنتسابي
وعليك توافقو بالأكتريه
نقيب تصير ..وتسجّل إصابه
تا يبقى ربّنا راضي عليي
بدي قود ثوره جهنميه
عا شعّار المنابر والنقابه
عادل قصيد
غلطت يا بحر والفكرة معادي. ة
هجيت الحبٍّك وصرت المُعادي
انا ما بزعل مقرقح معوّد
على قلال الأدب والأمر عادي. ة
انا تواضعت تا شيلك وتصعد
لمجدي ومرنّك عا هالأيادي
طلعت غدّار حامل قلب أسود
مرض نفسيّتك بدّو عيادي.ة
من الدوتشي وفوهرر ظلم عربد
من الفاشيست حامل فكر سادي
يا نكّار الجميل عقال واجمد
كلما هجيتني بكبر زيادي
بدك ألف جيل وجيل تولد
تا غبرة تكون من دعسة جوادي
وعلى مقياس ريختر يا مشرّد
إسمع هالضجيج الإرتدادي
القراءة مع زجلنا فكر مُقعد
نَشاف الذاكرة وضعف وبلادي. ة
لحتى الناس ما تشمت وتحرد
انا من واجبي وجّه ولادي
قبل الخليوي في جيل خلّد
بشعرو وظلّ سيّد عالنوادي
الهواتف مش ذكيّة يا معقّد
الهواتف غشمني وكذب وتمادي
إجوعالفايس بوك بكمّ مقْعد
ثعالب مطرح سباع البوادي
وقصيدك هالكتبتو يا مجلّد
شو عرفّني إلك او للأعادي
انت مش شاعر شويعر القلّد
بسيارة انكنت عالشغل غادي
بتفتح بوق تمك بوم نكّد
عا احساس اللي ذابو بالشوادي
بعض جيلك إلو بالعين مرقد
لأنّو مهذّب وشاعر وهادي
ويللّي بيشبهك متلك تشرّد
عن الشعر وعن اللون الودادي
انا عا جنب موسى كنت فرقد
والزغلول يعبدني عبادي
وشهدو بوعلي فيي وأسعد
وسيّد مصطفى نعم السيادي.ة
اللي شهدو نجوم الله فيه يسعد
من الأقزام ما بدو شهادي.ة
وجيلي مين جيلي يا مبغدد
جيلي للزجل مجد وإفادي. ة
م شعر الياس خليل للعلم مجّد
وفكتور وعلي وطوني سعادة
والياس داغر السلطن وغرّد
الله يرحمو غرّيد شادي
ورفيقي الياس بوراشد الأرشد
وداني صفير للمنبر قلادي. ة
وسميح تريّس القلعة وجدّد
وعا بسّام وعلى الصايغ بنادي
َورجا يونس فتح منبر تمرّد
أغلا خي ذوقَو عطر نادي
وموسى جعفر وشعبان أكّد
غريزي الفارس وضوّ المنادي
ونبيل فرحات بالكلمة تعمّد
وسعيد وطارق شهيب وفادي
وغصون الزين الشعيبي المولد
والعسيلي والحميدي الارادي. ة
وجوزف عون والملاح أرعد
وسليمان جوني رفيق زادي
وحسن بنوّت بوفواز معهد
وديمتروس وبوشهلا بمرادي
وجورج ومنذر وبوالزور مقصد
والعبيد واسامة وجو هادي
وشربل كاملة من الجود اجود
وحبيب وجريس وشرح وإعادي
واذا كلّ الأسامي القلب ردّد
بيوعا الفجر عا حلم الوسادي. ة
دحشت اسم النقابة انت مقصد
بفتنة الخرّبو فيها بلادي
وما زالو جورج بو انطون مرصد
النقابة بصفّ وحدتها الريادي. ة
عرفنا ثورتك دولار يُعبد
وانت منباع فاشل انقيادي
بعد طول الحوار يا كوْن إشهد
عا هالمنزوع طمّو بكعب وادي
البداية والختام بفرد مشهد
طلع مأجور حقّو ربع ليرة
لا صدق ولا ضمير ولا مبادي
...........................
ياحبايبنا بدي خبركن شغلة الشاعر سليمان طراد اكتر شاعر بحبو وغالي عا قلبي وهو بيعرف والقلوب عند بعضا بس نحن اتفقنا نهاجم بعضنا بقوة تا نعيشكم عا اعصابكن ونحمسكن َانشاللة كنتو مبسوطين ومنعتذر تنينا باسمي واسم البحر عن اي كلمة كانت شوي قاسي ويلا ودو غيرو وسلام وتحية لكل اللي تابعونا وانا بعتذر عن اي اسم ما ذكرتو او نسيتو