يللا يا شامخ.......... خطط طريقك...

انا اتحاورت معك قبل بمرة بمشتانا قصيد وكنت بحر وسيييييييع
هات لنشوفك بالمعنى من بعد اذن الجميع طبعا....
*********
شِفْت الشِّعِر مِن فُوق هَالمِضْمَار مَار = مِن فُوق بَرْحِليُون عَ الأقْطَار طَار
مِش كِل ضَارِب فَنْدَلِة قَصَّار صَار = وْلا كِل شَاعِر مَنْبَرِي المِقْدَار دَار
عِنْدَك مِن النَاس إللِّي مِنُّو الغَار غَار = وْفِي نَاس إلْهُن تَسْمِيِة شُعَّار عَار
جَايِي تَ حَوّل لَيْلَك بْشِعْرِي نْهَار = خَطِّط طَرِيقَك لِلْنَصِر وِإْبْدَا المَسَار
حَيْثُو إللِّي بِتْحَاوَر مَع مْحِمَّد خَطِيب = أكْبَر سَبَب تَ يْكُون حَقَّق إنْتِصَار

اهلا بميمو جيت من بعد الغياب....تهاجم نسور محلّقة بقرص السحاب
يا بن الجليل سماع منّي ها الجواب***ولا تضل عايش كل أيامك سراب
تا تصير شاعر روح اغطس بالعباب***واسرق جواهر من حضن الله المهاب
لمّا بمشتانا تركتك عا التراب....وخليّت دمك يسرح وسكّو الركاب
والله العظيم تشوشو فكاري عليك...كنت افتكرتك رحت روحات الغراب

بِيجُوز إنِّي اليُوم غَيِّر مَوْقَفِي = حَيْثِي إْعْتَبَرْتَك شَاعِر وْأمْرَك خَفِي
بِيجُوز شَمْس الكَوْن إنْهَا تِنْطِفِي = وِتْغِيب مِن بَيْت القَصِيد الفَلْسَفِة
وْبِيجُوز إنُّو يِنْتَسَى الخِلّ الوَفِي = وْبِيجُوز إنُّو الطَيْر يِنْسَى الرَفْرَفِة
وْبِيجُوز نُقْطَة تْعَكِّر البَحْر الصَفِي = وْتِتْجَرَّد حْرُوف اللُّغَة مْنِ المَعْرِفِة
لَكِن بِدِنْيَا القَافيِة مْحِمَّد خَطِيب = "طْوِيلَة عَلَى دَقْنَك" يرُوح وْيِخْتِفِي

مجبور منّي تختفي بعد السلام.....ومتل الجبان الشايف القرم الهمام
شامخ بشعرو صار عا المنبر إمام.....وبتضل خلفو مختفي وهوّي أمام
شامخ امير الموهبي ورب القلام***وبالبلفلسفي والذوق عندو احترام
بدك نصيحة روح يا مغرور نام.....نومة أهالي الكهف وطيور النعام
وشايف اذا عا الشمس بنفخ يا خطيب.....بتصير بفلسطين تشعر بالظلام

هَالردِّةْ إللِّي قِلْتْهَا وْذَلَّيْتْهَا = رَيْتَك مِتِت وِبْدَاخْلَك خَلَّيتْهَا
بِالنَّوم رَدَّاتَك مَعِي قَضَّيتْهَا = وِسْيُوف شِعْرَك لَيْش مَا سَلَّيتْهَا؟
يَا نَتَنْيَاهُو إللِّي القُرَى هَدَّيتْهَا = عَ أهِلْهَا وِالنَاس دَاخِل بَيتْهَا
كَاسَة مَرَارَة للبَشَر صَبَّيتْهَا.. = الام الحَنُونِة مْنِ القَهِر بَكَّيتْهَا
عَنَّا اليَهُود اليُوم قَطْعُو الكَهْرَبَا = وْإنْتِي الشَّمِس يَا صَاحِبِي طَفَّيتْهَا

وهبت الدّني بشعوبها و ملّاتها........بيوت الشعر و سكبت من ابياتها
حليت كاس المرّ من مزّاتها.......مسحت الجروح الزادت بعنّاتها
سنّيت سيفي من قهر امّاتها........وحتى السما بتركع يا ميمو بزاتها
وعن ساحتي يا دل دلو الفاتها...بيرجع مكسّر من وغا وقفاتها
طفيت الشمس بالجو ياشويعر زغير.........تا النّاس متلك تنطفي عقلاتها

مِ شَان ألله سْكُوت حَاجِي وَلْدَنِي = تَ كّسِّر شْمُوخِك شُمُوخِي رَدِّنِي
مِثْل الذَهَب وِالمَاس بِلْمَع مَعْدَنِي = وْكِيف إلْتَقَى شِعْر البَلاغَة مَع دَنِي
حَتَّى لَو شْوَيْعِر قَزَم بِتْعِدِّنِي = كِنْت البَطَل وَحْدِي يَ خَيِّي وْبَعْدنِي
تَ جَاوْبَك هَالرَّد رَدَّك شَدِّنِي = وْلَوْلا طَفَيْت الشَمْس يَاخِي بَدِّنِي
قِلِّك الشَمس إللِّي إْنْطَفِت فِي غِيرْهَا = نُورِي بِكَفِّي كِل أقْطَار الدِّنِي

يا ابن الخطيب سماع من شامخ دروس......الشعّار صوبو سافروا متل المجوس
حسّان جعفر بو زكي و راجح و روس...........كسّرتها و حطيّت عا مجدن أوكوس
و يابن الجليل لهون جايي تا تبوس..............ايدي متل شحّاد من يشحد فلوس
طفيت الشمس من نفخطي و صارت تنوس.......و بلشّت تبرم متل امها للعروس
فيوزات راسك شرقطو و كبلك حمي.......فكّرت حالك صرت شمش من الشموس

إْنْ شَبَّهِت حَالِي بِالشَّمِس نِيَّالْهَا = عَم تِفْتِخِر فِيِّي وْشَافِت حَالْهَا
دِيوَان شِعْرِي لِلْشَّمِس مِشْعَالْهَا = وِإللِّي مِثِل فَضْلَك بِينُوس قْبَالْهَا
وِبْهَالدِّنِي وِدْيَانْهَا وِجْبَالْهَا = مَوْضُوع شَاغِل لِلْخَلِيقَة بَالْهَا
مَا بَيْن عُلَمَاء الدِّنِي وْعُمَّالْهَا = بْعِلْم وْعَمَل أفْكَارَك إتْنَقَّالْهَا
وْبِالمَعْرَكِة كُون العِلِم تَ جِهِّلَك = وْكُون العَمَل تَ شَغّلَك عَتَّالْهَا
*\/*\/*\/*\/*\/*\/*\/*\/*\/*
رَحْ عِيدْهَا.. وِجْيُوشْنَا بْأبْطَالْهَا = نَوْيِت عَ حَلّ القُنْبُلِة وْإبْطَالْهَا
لِلْمَوْهَبِة شِعْرَك بِجَرِّح بَالْهَا = وْشِعْرِي بَكَر مَعْنَى بِجُر حْبَالْهَا
يَا شَامِخ إْتْحَدَّا الدِّنِي بِإْهْوَالْهَا = حْرُوب التَحَدِّي مْنِ الصِّغَر بِهْوَالْهَا
بِنْت الشِّعِر يَا شَامِخ وْرَسْمَالْهَا = مِن بَعِد حَكْيَك أصْبَحِت رَاْسْ مَالْهَا
*\/*\/*\/*\/*\/*\/*\/*\/*\/*
بِنْت الشِّعِر شِلْحِت عَ جَنْبِي شَالْهَا = وْرَدِّت عَلَى صَدْرِي شَعِر شَلالْهَا
إْنْ شَبَّهِت حَالِي بِالشَّمِس نِيَّالْهَا = عَم تِفْتِخِر فِيِّي وْشَافِت حَالْهَا
دِيوَان شِعْرِي لِلْشَّمِس مِشْعَالْهَا = وِإللِّي مِثِل فَضْلَك بِينُوس قْبَالْهَا
وِبْهَالدِّنِي وِدْيَانْهَا وِجْبَالْهَا = مَوْضُوع شَاغِل لِلْخَلِيقَة بَالْهَا
مَا بَيْن عُلَمَاء الدِّنِي وْعُمَّالْهَا = بْعِلْم وْعَمَل أفْكَارَك إتْنَقَّالْهَا
وْبِالمَعْرَكِة كُون العِلِم تَ جِهِّلَك = وْكُون العَمَل تَ شَغّلَك عَتَّالْهَا

قالولنا الخطّاب شاعر اصمعي.......وحدو دعا للشمس يا شريكة طلعي
تفلسف نشر بيتين طقطق اضلعي.....من ضحكة الافراح سرحة مدمعي
بين العمل والعلم يا بلطة فلعي......اغصان شابت عا مشارف مسمعي
وحدك يا ميمو ختار يا بتعمل معي......فلاح تحصد ارض و تعيش بنعي
يا بتشتغل استاذ علم و معرفي.....تا تصير يا حمّود خاتم بأصبعي

بْشِعْرِي يَ زَهْر إلْ فَاح جَايِي قَلِّمَك = وْإبْعَث وَحِي شِعْرِي النِيَابِي يْكَلِّمَك
بْعِلْم وْعَمَل رَبِّي وْإلَهِي يِعْدَمَك = خَيَّرْتَك وْصَعْبِة عَلَيِّي فَهِّمَك...
خَلِّيك عَامِل؛ إطْلَع عْلَى سِلَّمَك = أحْسَن مَ لَ لْ يُو أنّ وَألله بْسَلِّمَك
هَالمُنْتَدَى، مُشْرِف عَلَيْنَا سَلَّمَك = لَكِن بِهَالعَرْكَة مَ رَاجِح سِلَّمَك
مِن حَيْث إنِّي مْعَلِّمَك يَا صَاحْبِي = وْخَلِّيك "مَاشِي عَ طَرِيق مْعَلِّمَك"

عذرني يا ميمو كنت برات لبلاد...........و ما كان في عندي جلادي للولاد
استاذ صرت بغيبتي و عندك عناد.........جاييك حتي طق راسك بالبولاد
الشغيل متلي عاش ايامو جهاد...........و اللي تفلسف متل فضلك عا حياد
ابليس متلك كان يخدع بالعباد.....و ربك خلق هالكون حتى نستفاد
و لوما سبع تيام يعمل يا.... ذكي.........ما كنت شفت جبال و بحور و وهاد

مَعْذُور يَا شَامِخ يَ شَاعِرْنَا الوَدِيع = يَ مْقَلِّم الزَهْرَة بِهَالمَرْج البَدِيع
طَل الرَبِيع وْآآآآه مَا أحْلَى الرَبِيع = مَع دَنْدَنِة عُود وْتَقَاسِيم الرَبِيع
مِنْ دُون عِلِم مَا فِيك تِحْكِي مَع طَلِيع = ومِن دُون عِلِم مَا فِيك تِسْتِمْع لْ وَدِيع
وْمِن دُون عِلِم مَا فِيك أشْعَارَك تْذِيع = وْمِن دُون عِلِم مَا فِيك تِحْكِي عَ السَرِيع:
كِيف بْسَبِع أَيَّام هَالكَوْن إْنْخَلَق = مِن دُون حِكْمِة رَبّنَا وْعِلْمُو الوَسِيع

تركني جفت صياد مستني الطيور.......تركني مزارع شب عنفبرك عطور
تركني جوانح نحل و بعين الناطور.........شغيل فاعل فالح بشم الزهور
تركني بحنان الام حضرلك فطور............اعمل بسرعة برق ما بقلك نطور
و ربك عمل ساعات عا مر العصور...........و بعدو لحد اليوم عالكوكب غيور
لوما تشّغل فكرك بنظم الزجل...............قلي بربك كيف صفصفت لسطور

موضوع: ختام الجمعة مايو 23, 2008 8:58 pm

يَ شَامِخ فُوت مَع شِغْلَك تِجَارَة = وْقَوِّي حَالَك وْزِيد الخَسَارَة
بْإدَارَة وْإسْتِشَارَة وْعَم بْتِخْسَر = كِيف إلْ فَايِت بْلا إسْتِشَارَة
ألِف شَاعِر قَبِل مِنَّك تْنَسَّر = عَلَى قْبَالِي يَ شَامِخ، وِبْجَدَارَة
كِل وَاحِد رِجِع دَفُّو مْكَسَّر = عَ رَاسُو كِل مَا شَنَّيْت غَارَة
أنَا عِلْمِي كَلام الرَّب فَسَّر = كُل جُمْلِة وْكِلْمِة وْكُل عِبَارَة
وْمِن الدِينَيْن فَسَّر كُل مْعَسَّر = دِين المُسْلِم وْدِين النَصَارَة
أنَا عِلْمِي لْ كِل شِي صِعِب يَسَّر = وْبَنَى تَارِيخْنَا بْأرْقَى حَضَارَة
وِإللِّي مِثْلَك بْجَهْلُو تْحَسَّر = عَلَى حَالُو وْعَ هَالعِيشِة بْمَرَارَة
العَالِم وِالنَّبي "مِن فَرْد جَوْهَر" = بِجَنِّة خَالْدِة مِش مُسْتَعَارَة
وِإللِّي مِثْلَك بْهَاليَوْم يُحْصَر = بِنَار جْهَنَّم يْذُوق الحَرَارَة
الشَّاعِر لَو عَلَى الدِّنْيَا تْجَسَّر = وْقَابَل كِل كِلْمَاتُو بْجَسَارَة
بِضَلُّو وَزِن أشْعَارُو مْكَسَّر = إذَا مَ تْعَلَّم الوَزْن بْشَطَارَة
وْبِهَالدِّنْيَا الوَسِيعَة لَو تْعَمَّر = بُرْج وْمَعْبَد وْهَيْكَل عِمَارَة
لَو مَ مْهَنِدْسَك عَ الشِّغِل أشَّر = بْتِبْنِي الطُوب مِن بَعْد اْلِقْصَارَة
وْتَ نِفْرِض كَان فِي بِالشِّغِل أكْثَر = مَصَارِي مْنِ العِلِم تَارَة وْتَارَة
بِرَبَّك هُون قِللِّي يَا مْعَثَّر = شُو فَايِدْة الدَرَارِي وِالمَصَارِي
أذَا مَا كَان فِي عِنْدَك أدَارَة

اختم الحوار واطلعلك بردة موشح او قرادي ل نكفي او عتابا مثل ما بدك خيي شامخ!!!

يا ميمو مين دفشك عا مجالي......السبع عن يرجف بزاتو ما جالي
و انت ما بتعرف تغني عا منبر........لانو شغلك معلم مجالي
انا شغيل صوب الكرم بكر.............تازرع عاطفة بقلب الحقالي
و انت استاذ عا صفو تاخر.............لانو بواسطة عندك كفالي
انا شموخ ياما روس كسر.............بمشتاوي و بمشتانا العدالي
و نقلنا محاورتنا علمكبر...............سالوا عمار رب الارتجالي
انت موظف توظف استّبشر..........بأخر شهر يقبض لا مبالي
انت عا البرطلي عايش مستّر........لأنو عشت عمرك أتكالي
انا هاوي تجارة يا مشحتر..........تركت لبنان والواجب دعالي
وانت ماضي وعد بلفور زوّر............لأنك كنت متعلم عمالي
و يامتعلم اذا المحتل اكعر............اساتذة المعاهد بالليالي
تتواطأ بامضا و صرت تفخر......بدعسة راس من كعب النعالي
مينو الكان عن يقصف بيخيبر.......معامل طاقة الناس الحثالي
ما في غير المقاوم هيك اجبر.......جحافل جيش تتمخطر عا معبر
هريبي تروح من هزّت خيالي

mouhamad kh اختم الحوار واطلعلك بردة موشح او قرادي ل نكفي او عتابا مثل ما بدك خيي شامخ!!!

لا ولو يا اخي انت فتاح الردي للي على ذوقك

اووووووف اووووووووووووووووووووووف اوووووف اوووووووووف

عَ المِيج يَا بُو المِيج يَا بُو المِيجنَا = مَوْج البَحَر مَ بْيِعْتِلِي عَ مْوَاجِنَا

-*/\*-*/\*- = -*/\*-*/\*-

صِدْفِة أنَا وْعُودِي وْعَلَى جَنْبِي بَحَر = قَلْبِي لَمَح حِلْوِة وْبِعَيْنَيْهَا بَحَر

الدِنْيِي بَرِد كَانِت صِرِت أشْعُر بِ حَر = وْصَار القَلِب يِعْزُف عَتَابَا وْمِيجَنَا

-*/\*-*/\*- = -*/\*-*/\*-

يَ حِلْوِة إللِّي البَلَد طِفْتِي وْبَحَرْتِي"اخترتي" = بَيْت بْأوَّل القَرْيِة، وْبِحَارْتِي
مُحِيط عْوَاطفِي إْجْتَزْتِي وْبَحَرْتِي = لَ صَوْب القَلِب تَ تْغَنِّي عَتَاب

مدير المنتدى بقتلة حصالو***طلع مديون من عركة حصالو
وما بعرف ليش ميمو وشو حصلو***متل شي فار هاجم عا العقااااب

و عفوا على التاخير شغل يا اخيييي

المَوَاهِب غَير مِن شِعْرِي مَ غَارَت = وْهُجُومِي بِالشِّعِر وِدِّي مُو غَارَات

النَبِي طَه سَكَن قَبْلِي مَغَارَات = وْعَلَى مُغْرِي نَزَل وَحْي الادَب

» ركبت عوجا و عا بالي شوف حكمت شديد شو وضعو هيك هيك شامخ هرب
» شعار بالغربة
» جبهة الفايس بوك ضد شامخ حرب
» صفحة التعليق على العركة الزجلية(حسان&شامخ)
» صفحة التعليق على المحاورة بين شامخ ومحمد الخطيب