تكرم عيون الشباب و خينا ابراهيم

قالت يا هاني ليش ساكت يا ترى
سكوتك صفي لعنة ابد بالمقبرة
خلي القوافي تخزق كمام القميص
و تمرق على التلات تشبع كزدرا

مازال شعرك يا ابن ناصيف هيك

كنز اللآلي وكل شطر بجوهره

لا تضل ساكت ضل رفّ بجانحيك

يا نسر طلاّتك طبيعه معطّره

شرقط وحي وخلّي البلاغة نار
ودشّر دموعك عا الصخر تسرح
بها المنتدى قديّش رح تفرح
صار الزجل أجيال صح زغار
بس الحلا ما في ألو أعمار

أهلا بالشاعر هاني ناصيف اتحفنا

مرة قصدني خوري بليل الحلا
قلّي يا هاني حاج عايش بالبلا
تعقل و صلّي و صوم تا تحصل على
حلّة لخطايا انت وحدك عاملا
الخمرة يا هاني طيبي و من حللا
لاكن انت بحالتك ما منقبلا
و هند و ليال و ساندرا و ليلى و حلا
و كتر التنقل بالهوى من و الى
هيدا زنى و مخالفة رب العلا
تعقل يا هاني و توب تا قلك هلا
قلتلو يا محترم لا تكملا
قصة بريق الزيت قلبي ماللا
فروضي تجاه الرب مني هاملا
و رح قلك القصة و انت حللا
البوسة يا بونا فوق شفة شاعلي
بتسوى الي مليون ساعة من الصلا

هاني يا هاني الحب مش كفر وحرام***وأكبر حرام تقول قدّام الكرام
بتسوى ألك مليون ساعة من الصلا***ساعة مع المحبوب ودقيقة غرام

البوسة غذاء الجسد،والصلا غذاء الروح، والجسد بيشد الانسان للإرض، والروح بتعلي الانسان لفوق، وينو الشاعر ليفضل الروح على الجسد، هاتو لنشوف، شو يا سليمان?!

تكرم استاذ سليمان رح جاوبك بالطريقة ذاتها

هالحلوة اللي شفتها بين الملا
فيها حلا فتان لا حول ولا
فيها حلا و من كتر ما فيها حلا
انشافها ابن تسعين بيشبشب الى
و لو شافها الخوري بديرو عم تمر
لا يترك الانجيل و يسيب الصلا

خليّك...!!! مؤمن بالمسيح وبالنبي***ولا تروح...؟ تلعب بالديانة يا صبي
خبز الجسد عا الصّاج فوق المصطبة***وخبز البلاغة...؟بينوجد بالمكتبة
ان قررت تدخل...!!!معهدي بلا تجربة***ما بنقبل...!!!ان ما كان عندك موهبة
برهّوم يمكن يرحمك لكن أنا***زردة قشاطي نـــاعمة ومدهّبي

بعرف يا ابن طراد كلماتك تقال
و موهوب بفن الشعر و الارتجال
لاكن معي مجبور تا تخوض المجال
تستقرض من السبع قوة و انفعال
و مجبور من منبر الزجلي باعتدال
تختار موضوعك معي ببحر الخيال
و لا تجيب زردة و بكلتين مدهبي
الرجال وجه لوجه بيجابه رجال

الغدّاك قتلة مبكّلة بها المنتدى***بدّك شي عشر سنين...؟ تا تنسا الغدا
ما بيرحمك لو رحت توقف عا حدا***عا البحص لازم ...!!!تركع من المبتدا
سبع الزكرتو كان...؟ سبع وبالودا***واليوم عصر النت مش عصر الحِدَا
التاريخ متلي صار موقع بالزجل***وبتعرف ...؟التاريخ ...!!!ما بيرحم حدا

مجبور يا سليمان تمشي ربربي
مع شاعر مرجف نسور المرتبي
يا خجلة التاريخ بعد التجربي
من شاعر معقد عديم الموهبي
و يا ابن عصر الفنطزة و الشقلبي
و عصر الفشل و البهورا و السرسبي
ناوي تركعني و انت منك غبي
بركع ركوع النهر بالوادي ربي
بركع ركوع الراهب بديرو الابي
بركع كذا ركعة تا صلي عالنبي
و بركع متل ما ركع بيك من زمان
وقت الندم عا هيك خلفي متعبي

يا حب ركّع شوكة الفتنة أمام***حكمة أمن ممسوك ...؟ضدّ الأنتقام
بيّي ركع...!!!وقت الأبانا والسلام***بكنيسة المصلوب ...؟كرمال السلام
لـــــــــــــكن أنت عا البحص...!!!راكع يا غلام***قدّام رب القافية...؟ وبيّي الكلام
وبالمنتدى ممنوع راسك ترفعو***تا تصير شاعر عبقري تحكّ القلام

الحب بدو يركع شواك الحرام
شو المشكلة يا شاعر اختل النظام؟
يما على هالبهورة و كتر الكلام
صاير يا ابن طراد مشروعك خصام
بوطي الك راسي يا بهورجي امام
نعشك الليلة بكل حكمة و احترام
بوطي الك راسي يا بصرات المنام
كرمال حتى علمك تضرب سلام
و بضل قاعد حد نعشك يا حزين
ومع بيك بصلي الابانا و السلام

ضليّت سقف بكوخ ما فهمت الصفير***وعايش فقير المعرفة وعقلك فقير
المرحوم بيي كان في عندو ضمير***صلّى الأباناوبالسما حدد مصير
لكن انت يا شويعر البعدك زغير***مجبور تركع نصب قدّام الأمير
وتبوس ايدي بالزجل وج وقفا***منشان تمضي شهادتك عند المدير

بيكفي تبجح عا كبار الموهبي
يا صفر شعرك ما مرق بالمكتبة
ببوس ايدك عيب تغلط يا صبي
ما ببوس ايد الكافر بهالتجربي
و شهادتي من الرب خدتها مدهبي
من رب منبر شعرنا الحر الابي
مش من رجل بيقول كلمة مبهبطا
و امو تقلو بالشعر انت النبي

أول شهادة خدتها أنك سريع***لكن في عندك مشكلة منّك ضليع
وتاني شهادة مذوق وساهي ومطيع***وما فيك سعر بضاعتك عنّا تبيع
وتالت شهادي بحسدك خطّك رفيع***وعندك تحمّل عا البحص راكع فظيع
بس الشهادة ...!!!بالزجل يا حسرتك***ما بتنمضى ...!!!مرفوض بعيون الجميع

ما بنقبل معلوم حكيك مش بعيد
ما بنقبل بين السخافة كون سيد
ما بنفبل انّي الملك بين العبيد
و ما بنقبل اني انا القرم العنيد
وعيبي عليي كون عم غني معك
ولا بتعرف تغني معني و لا قصيد

صحيّت..!!! بعد الكف عا سلامة هلا***جايي لعندي تسمع أصول الصلا
ميـــــــــــنك انت...؟؟ تا تقبل سباع الفلا***وترجع متل يوضاس لعيّب الكلا
بحري هجم عا اليابسة وخافو الملا***وسطلك من الألهام لسّا ..؟ما انتلى
جمّع سواقي المعرفة وانزل نزول***بركي يـــــا ملح بتشرب بحور الحلا

بنزل على الميدان نزلت ابو علي
بخلي الضحايا عا ركابي متلتلي
بنزل على بحرك بهيدي المرحلي
من وهج شعري بقلبو لمرك حلي
و بنزل على القداس تا صلي عليك
و ترجع عا مهل تنام بديار البلي

شو باك راجع متل هم الأرملي***بلسان منّو السم عم يغلي غلي
تهذّب يا هاني وشوف شعري المخملي***البيقول بالأبداع يا شمس نزلي
صدّقت حالك صرت متلو البو علي***بفرح ..!!اذا عن عن جد صح المسألي
لكن يا حسرة منين ..حلمك مستحيل***التشتوش متلك ما بيتشبّه ألي
ههههههههههههههههههههههههههههههههههه

هاني الزغير على المنابر لو علي
بتشوف من تحتو الاراضي مزلزلي
ما بريد اتشبه بشاعر مبتلي
وشعرو سخيف كتير بالنسبة الي
من صغر سني طلعت هزيت العروش
وشلت الملوك و صرت جدك بو علي

بدّك يا هاني بالزجل تعصر مخوخ***تا تهزّ عرش الموهبة وترضي الشيوخ
سليمان قاسي بس ....!!قدّام الفروخ***بيخاف بسكب خمرتو تا ما تدوخ
بعدك متل ما بعرفك مسيّح جوخ***وما فيك توصل للملوك بلا رضوخ
الأرزة انا ...!!جرّب بايدك هزّني***وكلما تهزّ الأرز بينقّط صموخ

يا ريت يا سليمان بتصفي اديب
بتحكي شعر مجبول من نفحات طيب
هاني انا اسمي هنا وكلما بطيب
بصفي متل خمرة عتيقة يا لبيب
وثورة نبوغي هزت بعيد و قريب
وتفرفضو النجمات بالجو الرحيب
ومازال صوب الارز عم بتسن نيب
الهيئة يا شاعر صار لازملك طبيب
منشان تشقى من العلة بداخلك
وما تعود تحكي بارز لبنان الحبيب

كلما السما تهدر حلا بنفنافها**بتشلح الأرزة حرام فوق كتافها
وما في قصيدة بينشبع من آفها*** لوما الحلا بِيبوسها بشفافها
لكن يا هاني ردّتك ما شافها***ألا جماعة متل فضلك تافهة
ومن كتر ما بلّشت تسكر بالزجل***خربت القصيدة وحرقت سلّافها

مازال بتعد القصايد تافهين
بيكفي يا شاعر نفسك قبالي تهين
لا تظن رداتك يا قلبي مضمخين
من عطر وردة او بزهر الياسمين
بعدك يا ابن طراد للفكرة سجين
بتعلك بهالردة على مر السنين
الله يجازي خيينا من بت ياسين
اللي دلني عا منتدي للفاشلين
يلي بيحقر شاعر من الحاضرين
بيكون اوطى بجاه كل السامعين
بيكفي يا ابن طراد تحكي يا جنين
وضحت الفكرة و القوافي شاهدين
لابس اسم ريس عليك مبهبطو
تعلم يا ابني الياء ما بنتقال سين

» طق يا ابراهيم !!!
» من جديد وين ابراهيم ؟
» ابراهيم و ثناء
» وقفة مع ابراهيم وهاني
» جولة تحدي...ابراهيم و هاني