حوار ربحر الزجل وفراس عبيد بين اللغه العاميه والفصيح

محاوره ارتجاليه صارت
لا ازكر التاريخ

عبيد

شَعرك اذا هر العطر من وصلتو
وساقب وصولي ع حنايا وصلتو
متل الدريئة بكون تا سهم العيون
استقبل بصمام قلبي نصلتو

انا
متل الدريئة بكون تا سهم العيون
لرمي السهم وبروح ازهر على الغصون
ومع كل نحله طايره ببعت سلام
عا محل ما في حقد او صيبة عيون

ما بحس حالي غير عم فبرك كلام
وابعت لعشّاق المعنى بالسلام
بعيش الحروب المنبريه بكبريا
وما كنت اعرف عيش يا عبيد السلام


عبيد

سهران غصن الروح ع حفاف السمر
وسهران غصن الريح ع حفاف الثمر
وسهران غصن الشاعر الحامل حنين
وسهران غصن الليل متلك ع القمر

انا

سهران غصن الشاعر الحامل حنين
وليش دخلك ما بيحمل ياسمين
كنا ولنّو بالرقاب بنحملو
بدال ما نحمل سلاح المجرمين

عبيد

يا شاعر الوجدان يا نبذة بكي
يا حامل من العز حمل البرمكي
يا ريت لو جيلين منك يستقوا
اجمل ما كاتب كاتب وشاعر حكي


انا

يا ريت لو جيلين منك يستقوا
كان الشعر والشاعريه بيلتقو
لكن اليوم وللأسف ما بيلتقي
الا تنين على الحكي بيتخانقوا

عبيد

لمّا طراد اتمرّد ووحي اعتقل
صار الحرف حارس ع باب المعتقل
بيطوّع الكلمات بيهزّ السطور
بيحرّك الأموات بيبكّي المُقل

انا

بيطوّع الكلمات بيهزّ السطور
بس الحقيقه الشعر اصلو من الشعور
واليوم لو فينا نأسس معتقل
كنا سوا تنيناتنا نبشنا القبور

اختفى.....




عبيد
مين اختفى ومين اللي حافظ ع الصَفا
عمرو المضارع ما وصل خصر الصِفة
الردّة المافيها لا مزيّة أو صِفة
دخلك تقلّي كيف فييّ إوصفا
روحي مدى وما اقدرت روحي انصفا
والبحر ما بينذاق موجو ان صفا
كفّة الموجة بشدّها تا إقصفا
مدّ وجزر عم غيظها تا إقصفا
متل القمر تاطل ع الأرز الجليل
طالع على الباروك من نبع الصفا
......
طراد
الباروك كرمني ومروان ال وفي
ضيف من الاخلاق بحر المعرفي
ويا عبيد بعرف طفلك بحضني دفي
لما قبلت اعطيك فرصه مشرفي
عدنان قلي عبيد لا تهزو غفي
ومحمد الحاج انتقدلي موقفي
وما ضل الا جون عقل بطيبتو
يقلي فراس عبيد انساني ووفي
....
عبيد
يا طراد مينو لَ زجلنا كاحتو
موجة خراب اجتاحتك واجتاحتو
عدنان حرفو من المجرّة ناحتو
والحاج دخلك لا تقرّب ناحتو
وجان الحلو إيّاك تقلق راحتو
غيمة حزن مرقت عليه وناحتو
وعبيد طوّق بالقوافي ساحتو
كلما بصحرى الشعر تلمح واحتو
قرّب وغب واجمع وحمّل وشيل
مش كل مرة فيك تنهل راحتو
....
طراد
عدنان همو بالفراش وبالسرير
محمد الحاج الفتنجي الله يجير
جون الحبيب الشعر خايف لا يصير
معدي بداء الكبريا ويكفر كتير
يا عبيد اوعا تزعل البحر الكبير
و تقول عنو بالزجل باعو قصير
بتصير مش اعمى البصيره والبصر
بتتحول الانسان ما عندو ضمير
...
عبيد
اتركلي الشباب الطيبة حاجي بقا
تعمل متل قائم مقام المنطقة
إسمي وضميري أبيض من الزنبقة
وحرفي تجلّي وساكب النقطة ثقة
وما بين فصحى والزجل كَون ارتقى
موضوع مش مطروق متلو ما التقى
شعر الزجل نهده بكركة معتّقة
وشعر الفصيح معلّقة ع معلّقة
نقي شو بدك والكرة في ملعبك
تنشوف شو مخبي بأول ملتقى
...
طراد
يا فتنجي بها الطرح عندك مبتغا
وتقييم ها الموضوع بدو ادمغا
رح اعدمك لو كنت متل الببغا
قاموس تمشيط اللحى عندي التغى
الفصحى لغه.. بنيه خبيثي مزغزغه
والعاميه بالبساطه مدمغه
لغيت لغات المبهمه ومن دون حياة
ومن بطن ام الموهبه خلقت لغه
....
عبيد
يا جارة الوادي اطلبيني تكرمي
شوقي عطاكي اسم مكتوب بدمي
وأيّا لغة بتقولها يا آدمي
والأصل عندي اشْتق مني المكرمة
ووقت اللي بيصيبك عجز ..من معجمي
فسّر تتعلّم وعبي الجمجمة
وعن عنتره اتمنّى بآخر ملحمة
يقبّل سيوف البارقة قبل الرمي
وخلي الزجل يعطيك شي بيت بحجم
لمْعت كبارقْ ثغْرك المتبسّمٍ
..
طراد
يا مكبش بلغة صنم ما بتستحي
من بحر فقشت موجتو بدنيا الوحي
قلتلك من زمان ما بمشط لحي
بترجع لقصة عنترا وقصة جحي
الكلمه البسيطه بتطلع من جوارحي
تا كل لغات الخليقه تنتحي
بحبرك وحبري بنغتني تزكر طليع
/لما النوايا السود فيك بتنمحي/
....
عبيد
لغّة صنم؟ هيدي لغة جدي علي
ولغّة المتنبي بأبهر ترغلة
والشافعي ع الزهد رباني الي
والنابغة صمم إجي بعدو ولي
وعمي نزار ال رنّم الحرف العلي
ومتلو متل جبران قيمة منزلة
ونخلة كتبني ع نشيدو قنبلي
بتحني ع حرفي ودمك بيغلي غلي
ومن إمرء القيس انحبس نوري وعِلي
لما جزم بيتو وسما بالمنزلة
اذكر مكرّ مقبلٍ مدبرْ معاََ
جلمود صخر انحط سيلو من علي
الزودة
بتعيد ما بتعيد يا أرض اسألي
مين البسط فيكي اللغة متل الحلي
علقان علقة وعلقتك مش مشكلة
قدام اسطورة الشعر الجاهلي
...
طراد
فاجأتني ومفروض أربحلك جميل..!
بتعرف أسامي ..تعدّها منّك قليل..؟
هههههههه
نزار قبّاني ...نجح شعرو الجميل
لما بلغّه واضحه حاكى الجميل
وجبران كان يطعّم النص العليل
ويحط كلمه عاميه ...وفي دليل
هل /تحممت /قالها وصارت بديل
عن كلمتك ..والكل قالو مستحيل
وحتى سعيد العقل يا مستر فراس
خصص المحكي والشرح عنو طويل
....
عبيد
يا شاعر الفصحى لا تعتب ع الزمان
ان صار التدنّي باللغة يهد الكيان
بتفرح اذا بتضيف كلمة ب البنان
ورُبعك فرنسي ونص ربعك تركمان
طلّع بإعجازي بمصحفنا الملان
في حروف عجز يفك لغزن ترجمان
من الف لام وميم (الم) لل قاف (ق) استكان
علم البلاغة والخطابة والبيان
وهلق معي تتفك عقدة من اللسان
من ترجمة انجيلنا هتلي بيان
واقرا الأبانا ولا تهجّي بالفصيح
وخلّي صلاتك كلّها محكي كمان
...
طراد
لما القلب بيحن وبتحكي الشفاه
بننطق اسم الله بدون الانتباه
الله ..وإله ..ورغم كتر الأشتباه
في لغّتين وكل لغه اتجاه
بالعاميه اسم الله.. كبرجاه
وكلمة إله من الفصيح على عماه
طيّب اذا بتنضاق بدي إسألك
بتصرخ يا الله أو بتصرخ يا إله
الزودة
الله اسم هاؤ اللي أخدو ما نهاه
وعا لسان شعبو الطيّب المؤمن براه
كلمة إله الواحد العاش بسماه
ما فيك حرف الهاء تكتبها بلاه
...
عبيد
بصرخ إله العرش الله الدفى
أصل الوجود وكل شي بعدو اختفى
فلّست وسراجك ع نتفة بينطفى
تا تلعب على حروف يبليك بهفى
شعرك شعر محكي بتكريرو اكتفى
وشعري رصانة وسبك ما بيعرف جفا
وحتى الفصيح يرش منتور الوفى
فوق الزجل ويهز جفنو من الغفا
جايب قصيدة (مي) ترتيلة ندي
تدلف فصاحة من محمد مصطفى
....
طراد
لا تجرّني عدد أسامي ..من العصور
منشان قوّي حجتي ..وقت القصور
بلغّة القلب تكلّم ومحي الغرور
وفيّق قواميس الحنايا بالصدور
كلمة يا ماما صادقه وفيها شعور
وكلمة يا بيي عيشتنا بالسرور
نحنا شعوب على اللغه لازم نثور
ونلحق اللب ونكتفي بحرق القشور
ما العاميّه لغّة الأم لل لنا
ولازم بلغًة أمنا نحل الامور
الزودة
دخلك اذا مرحبتني بالبونجور
برد السلام ..بفرد.. أو باقة زهور؟
وايّاك تحكي بالفصيح ولا تجور
علينا لأنو لغّتك لغة قبور
.....

Firas Obaid
أوووووف أووووف أوووف
إبن قزمان إحساس وتفاني
وإبن التطْيَلي حسّو شجاني
وميشال طراد أول مين جدد
ب(فرشة مفشكلة)المحكي غناني
وهشام الجخ بالشعبي اتوطد
وخطف تاج الإمارة والتهاني
وطلال ب(وحدن) اتغيير المشهد
بحنجرة الأبد زاد الضمانة
ولكن سقفك العالي اتحدد
تحت عتبة دراج الأصفهاني
ولسيباويه إسأل إبن أحمد
الفراهيدي ال وَزن ضغط العيانة
ولا تنسى الأصمعي الحاكم تكبّد
خزينة بيت مال على التقانة
وبسوق عكاظ وقت الكان معبد
بماء من الذهب خطّوا المعاني
وإذا بتجمع دولنا من المأكد
رح تلاقي الف لكنة مُدانة
لا تحكي سويحلي بتصير مبعد
بأرض بغداد يمّا موريتاني
ولا كويتي بطنجة رح بتسعد
ولا بوهران رح تفهم عُماني
ولكن بالفصيح الما تحدد
اذا بتحاور القاصي وداني
رح بتجمع شمل أبعد وأبعد
من خطوط ال رسمها غرب جاني
ولإم كلثوم إفتح باب منجَد
مع الأطلال بتعيش الثواني
ووديع ال شال علّة قلب أوحد
بليلى الليل عاتبني وهجاني
ومع الساهر اذا بتحب تولد
(أنا وليلى)الحرير الإرجواني
طغى شعر الفصيح ال ما اتجمّد
على قالب المحكي بالغناني
أنا النبع وإنت جدول مبورَد
إلي مش هيك بترد الأمانة
أنا الأصل وإنت فرعي ال تعمّد
بروحي وعيب تهجيني بزماني
رحت تحمل على اللغّات مبرد
وتسرق منهن وتطلب إعانة
وع لغّة ضادنا من قلب أسود
تفضّل حالك وتنكر حناني
تعا إرجع على الأصل المخلَّد
يا نحلة لا تقصّ البيلسانة
أنا ترنيمة العدرا بمزود
أنا الله وأكبر ع لساني
أنا الكن متل حاتم الأجوَد
خزينة من الزمان الأولاني
وإذا سلّمتك من جديد مقوَد
سفينة شعرنا بآخر زماني
ضروري بمجمع البحرين توجد
جواب على سؤالك وقت بدك
قبل ما نلتقي بموضوع تاني


ألشاعر سليمان طراد

/ي ريت بقدر آخ لو فيي//
أجمل قصيده شعر محكيي
وإمك قبل ما تنام..//يلّا تنام//
غنّتلك بأنغام سحريه
حافظ أسامي كتير..ما بتنلام
ما الكل متلّك كان يا خيي
بيحفظ ..بيحفظ عا مدا الأيام
وما بيفهم اللغه الأساسيه
كل الزكرتو بالشعر أعلام
صفحاتهن بالذهن ممحيه
صارو بعصر العولمي ايتام
وبالكاد باقي تنين بالميه
شعر الفصيح تزلّف الحكّام
وما ثار مره عا العبوديه
وقضّى حياتو ذل استزلام
وسخّر حروفو للحراميي
تأمل بلغة إمك البشام
كيف بكلام الصدق مبنيي
وقفت بوج الظلم والظلّام
وصرخت بأعلى الصوت حريّه
تأمل معي بفيروز ها الأيام
بتعشق سماها بكل غنيّي
بتحكي قضية شعبنا المقدام
بلغة القلب العايشي فيي
الفكره وسيله وغاية الأقلام
وكل الهدف توصل بديهيي
تزكّر ميشال طراد لما قام
بثورة ادب عا حروف وهميي
عا لغتك في صار استفهام
صارت مع الايام منسيي
إم اللغه يا عبيد مش أوهام
لغة المحكي الفضلها عليي
ومنشان توعا من غفا الاحلام
تفضّل ازكرلي بيت عا النيّه
من لغتّك بيخفف الآلام
تا رندحو بها الوضع يوميي
لغة القلب حروفها صمّام
بتطلع من جروح الألوهيي
بتفهّم الاسياد والخدام
وما بتتطلب اذونات فكريه
عملك تا تفهم مقصدي حمّام
ورندح وغني وفضفض شويي
لبيروت أو للقدس أو للشام
//الله يرضى عليك يا بيي//
واعمل بريف الشام استجمام
وبباب توما وقّف شويي
اسآل العقيد اسآل بو عصام
بأيّا لغه حكيو بصدق نيي
فوت عا الدكان ارمي سلام
وقلو بفصيحك اعطني وقيه
بيجاوبك يا فحل يا مقدام
احكي الجمله متل ما هيي
الفصحى طلاسم مبهمي وأوهام
وتجريد لوحة سورياليي
والمرحبا زينة ثغر بسام
وال يا هلا ع شفاف خمريي
لغة فصيحك حبرها هدام
ولغة وطنا جبال حنيي
بتسوى قواميس اللغة الايتام
بالمتحف علا رفوف منسيي
ولا بو فراس ولا ابو تمام
حتى ولا أبن العتاهيي
بيبينو كومة حطب قدام
فراشات من قصفة حبق بتطير
من حنجرة فيروز صبحيي