صفحة الشاعر عصام يوسف

عصام يوسف منقول
شقف من تمثال
كان زر الورد عم يكبر
بعدو صبي ..
وسع المدى خيالو
حلمو قصيدة ..
بيوتها.. فراشه و ندي
عم تسهر بْبالو
..
صار وهج العطر يتفجّر
صار يهدر لون شلاّلو
..
نْ شفتو بدي بالشوك يتزنّر
و هوّي و عم بيلعب
جرح حالو
لا تفزعوا من الريح يتكسّر
إبن الجمال
بيحمل السيف .. الصلا
الرمح .. الحلا
بيتعلّم بآذار ..
أشعار .. صبح و غار ..
يمكن لغير الزهر ما نْقالوا

إي ..هيك الله
حمّلو .. الشوك .. السيوف
اللابسي أخضر ...
و رماح ..
من كاس الندي بتسكر
ما حمّلو .. خنجر !!!

عصام يوسف



هالشاعر..
اللي ألْهَن حروفو
كان متخبّي
بجرح قايين
صار الوحي
يشوفو !!..

بصلّي إلو
بفيروزو بصنّين
بشِفّة سهل
شاف الفضا .. فناجين
...
اللي بيخترع تكوين
من حلوين .... !!!؟؟
نحنا بملكوت الحلا
ضيوفو..
قبل الدني و الدين
...
إي ..رح صدّقو
و إركع مع ألوفو
و لوما شفت
مسمار بكفوفو!!..

عصام يوسف


حاج .. يا إزميل
منّي جروح تْشيل
تعّبتني من القال
تعّبتني من القيل
و صَرلك سني بتقول
باقي حرف
و بصيّرك إنجيل ...

بعدك بذات الإيد
بتصب منّي نبيد
و صَرلك سني بتقول
عملتك مسيح جديد ...

تركني .. طهق
قلبي من الآلام
من حلم حريّه
ضيّق على شبابيك عينيّ
شو هم لو إبقى حجر
و يكسّروني عيونها هيّ

عصام يوسف


هالأرض
هيّ و السما
شِركي
لا همّها فرنسي
و لا تركي
بتطمع بزر
النرجس النعسان
و ما بتطمع بثروه
و لاتِركي ..

ترابها ..
بشغل الورد فنّان
تا يرسم
عْلا شفافنا الضْحِكي
و حتّى الصخر .. إنسان
في وجدان ...
شو باك ... يا هالصخر
ما بتحكي ؟؟!!

عصام يوسف


بينك و بين العتم
شو بتقدر تشوف !!؟؟
صوتك الأطرش ..
خوفك اللابس كفوف!!
وهمك بإنّك فارس
و كل المدى رهجة سيوف !
شهوة قمر
عم يفتح قناني السهر
و يصب كاسات الضيوف !
وصيّة نبي عم يشلح
كتاب الدني فوق الرفوف !

شايف ؟؟!!...

إذا بتقدر تشوف ..
أول ما وجّك
يدعس تراب الحلم
و الليل بعيونك يطوف
بتضّحك عليك الدني
و بتهر نجمات السما
بْحرجك .. ألوف


....
إي مليح ..
ما بتقدر نشوف !!
و لا هرّت نجوم السما
بحرجك .. ألوف

عصام يوسف


سمعنا .. بإنّو العقربه ..

عم تضيّف سم

بقناني الدهب .

قال .. جارتها الدني

جابت صبي .

آه .. شو مْحِبّه ..

شو فيها عاطفه

بتشعل بعتم خيالها

و ما بتنطفي

من كتر ما بتخجل

شي نجمه تشوفها

بتلبس عتم ليل السهر

و بتختفي

بتركض تلاقي ضيوفها

بتفتح بلهفي كفوفها

و بتطيلع قناني النبيد من الخبي..

و بتصير تعصر

قلبها كلّو بفرحة هالصبي

بتصير تسكب خابية ْ إحساسها

متل لْ كإنّو المَحْبَره

عم تشرب من المكتبه .

بتشك إبره متل سنّارة سهر ..

بتطرّز الليل العَبي

و بتخجل.. و متل الصبيّه بتختبي

بتصير تحلم شي أمير يزورها

لابس عبايه مقصّبي

....

إي دشّروها تحلم بمنتورها

هوّي و عم يفرفط على شفّة صبي

بيجوز .. ما بتعرف بإنّا .. عَقـْرَبه

عصام يوسف
يا ضيعتنا قصيدة زجليّي

يا ضَيعتنا..يا مَوسَم للتـّصابي ***القمر عَ تلالك الحلوين رابي
بـِدي يـِكتب حلاكي عا تلالو ***و لـِحد اليوم ..ما خلـّص كتابي
رَسَم طلـّة عيونك عا جبالو*** كتر ما شاف بعيونك إهابي
لأنّو عيونك و شردة خيالو ***شِربوا تـْـنـَيـْنهن من فرد خابي

جـَوابك عَ الدني مُبهم سؤالو***خـْـلقتي و عالمك كلّو غرابي
كأنّو اللون عا لوحة خيالو*** غيرك ما بقي عِندو إجابي

الكـَرْم بْيشرب بْتسكر سلالو !!***الصـِـبح بيضحك بْـتبكي السَحابي !!
الورد بيسمع بتحكي ظلالو !!***اللون بيكتب بْـتمحي الصَبابي !!

و أنا شاعر حنينو راس مالو ***ما فيّ عيش عِمري بالرّ تابي
كِـلْ ما زْهورك الحلوين مالو ***بـِلون الورد بيفتـّـح شَبابي
و لأنّو الشـِّعر في جوهر كمالو ***مَدى و طـْموح و شْموخ و رَحابي
رح بْيبقى متل ما الناس قالوا ***شيلو من الدني بـِتصير صَحرا
ازرعوا فوق الرمل بـِتصير غابي

عصام يوسف

تحف عا الزغير

لو كان ما في لون
شو بيعمل الرسّام .. ! .. ؟

بْيرجع بْيخلق كون
و بْيخترع
ورد و سما و قلام
قبل مَ تخلص سبع تيّام ...

عصام يوسف


إنتوا..!
لْ ما فيكن تسمعوا
مْن الصوت شو بْتتوقّعوا
إنّوا بِلحظة يموت
يفتح بواب العمر و يفوت ...
يلّي الدني مَ بْتوسعو
لو أطرش التابوت
شو بْتفرق معو....

عصام يوسف

عَم يلعبوا فينا
على دراج القصور
ولاد الملوك ...؟؟!!
اللابسين العتم نور...

مَ بْتفزعوا..
ما بتفزعوا....
كل واحد يكسر اللعبة المعو

يا ولاد شوفوا الريح
عم بتثور
اي .. تمسّكوا بحرفية الدستور
مَ بتعرفوا إنّو الأرض بتدور ؟؟؟؟

عصام يوسف


حلّك يا أدم تسمع الكلمي
بعرفك خاطي على عِلمي
مش عيب تسمع حيّة الرَقْطه
و تخطى ... الخطيّة بتعملك زلمي
مش عيب تسقط عَ الأرض سَقْطه
و تبقى الجَنّة حلمك و حلمي..؟!!!!
من فوق... بتشوف الأرض نقطه
و من تحت... بتشوف السما كلمه !!!!

عصام يوسف


من كتر ما دِرْ تلّهم خدّي اليسار
خدّي اليمين من الورد
و النار غار
ينزف عايديهم
صمت قلبي الجريح
.....

في ناس بيقولو
إنت أوّل مســـــــيح
في ناس بيقولو
إنت آخر حمــــــــــــار......!!!!؟؟؟؟

عصام يوسف


جاي على بالي مرا سمرا
شفافها حَمرا بلا حِمرا
تدلق عَ صدري نبيد
تشرب خوابي العيد
تْشد ... تغمرني ألف غمرا
تشعّل بقلبي جهنّم الحمرا


عصام يوسف

شاعر أنا و عم يكبر طموحي
و ما بتدعس عالأرض روحي
و لمّا جروحي تصير تتفتّح
بتتفتّح الورده على جروحي
شعلان قلبي و واجبي إنصح
روحي قبل ما إحترق روحي
لكن إذا بقيتي بهالمطرح
بكرا مع البخّور .. بتفوحي ...


عصام يوسف

حبّيت ..
إسقي شفافك الماورد
وغنّج حلاكي
متل ما بدّو
إطلع أنا و قصايدي عالجرد
قطّف قمر
خدّك متل خدّو
لكن قبل فصل الشتي و البرد
خايف إذا تخطّى القدر حدّو
عمّر قصر
بعيونك من الورد
بكرا يجي تشرين و يهدّو



عصام يوسف


شو بحب دوقِك عطر
شمِّك لون
حسِّك حجر ياقوت
ما بيموت
ياخد بدربو الكون
يتدحرج
قيامه و صلا و لاهوت ... .


عصام يوسف

ان مرقت عليكي الشمس
صبحيّي
رَسمت عَ خدّك نمْش
بْمرّقك بْدروب
عينيّي
متل الكحل عالرمش



عصام يوسف

خصرك كأنّو برج بيزا ...!!
و مال ..
وواقف خيالك بس عَ دَقرا
و الأرض برمت متل شي سلسال
قعدت عَ ضو الشمس
عَم تقرا
بس القمر
عن قصد صار هلال
تَيْلف عَ خصر السما ....
الشقرا


عصام يوسف


لمّا بتكتب شعر
هِز الكون
نقّي عَ ذوقك
لون
مَشّي الطبيعه
متل ما بدّك
متل لْ كأنّك إنت
وحدك هون
و عم يمرق التاريخ
من حدّك

عصام يوسف

بالشّتي
لمّا الطقس
يبرد كتير
والدّني تصفّي
تلوج و زمهرير
الشمس بتمر
عْلا صيف خدودها
بتشلح تياب البرد
و بتلبس قصير


عصام يوسف

الشاعر


الشاعر
بتنزل قيمتو لَ نِّص
و بيرمّد
و بتفَوْنسو الجمرا
نْ ما كان عندو
عبقريّي و نَص
أحلا من الليل
بمرا سمرا
و أبعد من حدود النظر
بيطص
و شيطان فكرو
بيدوخ الخمرا
دارس بوادي عبقر
و مختص
تنعشر سني
بجهنّم الحمرا


عصام يوسف
مبارح
سمعت الزنبقه
مَتْوشوشو
حاجي بقا
شو قصّتك !!؟؟
يا هالحلو شو قصّتك
عيونك بخصري معلّقه
.....
حاجي تزيد بغصّتك
و لو كانت شفافك
عَ تمّي مْحَرّقه

منشان تقطف
من الزنبق حصّتك
لا تطلب البوسي
من الورده
اسرقا ....

عصام يوسف


لولا القصيدي
كان إلها فيش
ما بتنحبس جوّات بلّوْرا
و لو وقفت عْلا حاجز التفتيش
الإحساس دفقه و الشعر فَوْرا
ما أروع الثورا
بقصيدي تعيش
لمّا القصيدي تموت
بالثورا


عصام يوسف

بدّي القصيدي
حروفها ثوّار
عالشمس
بترفرف بيارقها
يعني ..
إذا ما بتحرقك بالنار
لازم إنت
بالنار تحرقها


عصام يوسف


في ناس بيقولوا
نبي دجّال
و في ناس بيقولوا
صبي مجنون
و بيعيّروه
بخشبتين تقال
و بجرح زنبق
من رمح مسنون
....
وانقال .. لو كانت
حمالو تقال
هودي إلو
حتّى مسيح يكون
..
و بعدو رغم
كلشي انحكى و انقال
كل ما حدا
بالرمح بيشكّو
بيزهّر بجرحو
غصن زيتون


عصام يوسف


مرّه سألني معلّم بصفّي
إنت شو بتحب ؟؟
.....
لا تكفّي .

ما بحب دربي يختصر لفّي
بحب عا دربي الصعب لفّي

و ما بحب شِفّي خمرها قفّي
بحب كون الكاس عالشفّي

و ما بحب دفّي الناس من دفّي
بحب لمّا إحترق دفّي

و ما بحب غِفْ عْلا السما غفّي
بحب بعيوني السما غفّي

و من وقت ما خلقت متعوّد
انْ مدّيت كفّي عالشمس كفّي
انْ قمّزت صفّي عالقمر صفّي
.....
و من يومها ما فت عا صفّي

عصام يوسف قصيدة الحمار


يا حمار لا تشكـــي من الأقدار *** قد ما يقولوا عليـــــــــــــك حمار
بيعيروك بالصـــــمت لا تحتار *** إنت الكتــــــوم و حافظ الأسرار

بيعيروك بالغشمـــــــنه الشطّار *** و يا ريت متلك يعرفوا شو صار
و قال صوتك مزعـــج المختار *** و هوّي الوحيد لْ مَنْشرى بدولار

و قال عا ضهرك بيزقّوا حجار *** حجار الوطن فيها مجـد مش عار
يا ريتــــــــهن أهل الشرق متلك *** و يحملوا هم الوطــــــن شي نهار



عصام يوسف


يا شاعر اللي بقيت
عا علمي
أكبر مْن النقد و التحليل
اسكب صور
شعرك على حلمي
ضوّي العتم
لا تنوّس القنديل
الشاعر قمر
بيشعشع الظلمي
شلال
عا رخام الوحي
بيسيل
بيعيش
حتّى يبتدي كلمي
وبيموت
حتّى ينتهي انجيل
***********
عصام يوسف


هالقدس لْ بالمجد تفيّت
كل رجال النخوي حيّت
يا قدس لْ عم بتناديهن
لا سمعوكي و لا سمعتيهن
...
لا تناديهن .. ما عرفتيهن
من ساعة ما اللعبه تهيّت
كل وجودن و إْساميهن
و الضمير و كلش فيهن
ميّت .. متل البحر الميّت


عصام يوسف

في مرّه
نيشاني تكسّر
و قلبي صوب الغرب
تهجّر
مرقت ببحر ..
و شو هالبحر
ما لو لا لون
و لا منظر
مسكت الشعر
انحرتو نحر
دمّي بقلب عروقي
فوّر
نزلت نقطه بكعب
البحر
إسمو صار
البحر الأحمر


عصام يوسف

حبّك بقلبي
متل شي قصر انبنى
ما بيسأل عن جنون العاصفي
بشوفك بعينيّي
على رموش السنا
بين الحروف
بتظهري و بتختفي
بشعل .. بدوب
بحبّك بليل الهنا
و كل ما عرقتي
من لهيب العاطفي
شو بحب
إنّك تشعلي متلي أنا
و كل ما شعلتي ..
ما بحبّك تنطفي
*****
عصام يوسف

بعمّرلك عْلا الغيم
متل القصر
و بطلّعك
عا دراج من زنبق
و بلف وهج قصايدي
عالخصر
بيصير خصرك
عالوهج يعرق
بخدّر عا باب
القصر
شمس العصر
كل الدني
بعيونك بتغرق
الصبح ؟؟..
برفعلك قواص النصر
بترجع بعينيكي
الدني تخلق !!..
****************
عصام يوسف
يا قدس ...

بفتح خيال الشمس
منّو بفوت
عا سهول عينيكي
بلاقي الشعر
ماشي نهر ياقوت
بيلف من خلف السما
و بيطلّع عليكي
يمكن وهب حالو
لعينيكي
لمسابح الزهر لْ بايديكي
كل الصلا و المجد و اللاهوت
ما بيطلعو نشوة بطل
بدّو .. فداكي يموت ..!!!

عصام يوسف

بْكيتي
على خد الجمر
متل لْ كأنّو
هالسما بتدلف
ندي
متل لْ كأنّو هالخمر
عم يدلق
قصايد تلج
نقطه.. على الكركي
غنج
نقطه.. دلع عالموقدي

ما بتعرفي إنّو البكي
بيجرّح العشب الطري...
لا تقعدي ..!!
ما بتعرفي إنّو البكي
متل الصْقيع
لفّي حلاكي بالفرح
بفزع عليكي
تبردي...

عصام يوسف

ليش الصبح
بيفتّح مشاوير ؟؟
شو الصبح وردي ..؟؟
بنت حلوي كتير ..!!

يمكن لأنّو الصبح
آخر كاس
عا تم هالليل
و خلص بكّير
متل القمر بلوّن
الإحساس
بيطلّعو تصوير
رسام
عا ضو الندي
بيصير....
يتفلسف برسم
القصيدي .. كتير

عصام يوسف

من وحي هالإيام


ليش صاروا الكل
قد النِص ؟؟..
و ما بقي بالنِص
إلاّ الربع خالي
يمكن لأنّو اللص
متل الموت
كل ما بيقبض صوت
بيرد لِكْمالي

عصام يوسف


رقصنا سوى
و تخدّر الإحساس
متل الشمع و الطهر
بالقدّاس
برمتي .. شو برمة
شمس عالفيّي
برمة قمر
عا ضو سهريّي
برمة شعب عطشان
عا نهر حرّيّي !!
ايــــــه ... شو بدنا
بهم الناس
بس برمي فيّي ...

و لا تِتعبي خصرك ..
على مهلو
لمّا رنين الكاس
يشهقلو
ميلي متل
ميلة حجر الماس
وتَ يدق كتفي بْكتفك
الحسّاس
متل ما بيدق كاس
بْكاس ..

هبّطي الشال .. الحلو ..
المغزول ..
متل حدعش أيلول

يا هالفارس
بالإيمان
وعّي الوجدان
مْن الرمس
تَ يصحى فينا
الإنسان
و تصحى فيه حواسو
الخمس ..
...
تَ نشيد بعزم
البنيان
نخلق بكرا ...
نطوي الأمس
و رايتنا فوق الجولان
تغطّي الشمس .. بْمجدل
شمس ...!!!

عصام يوسف


قالت إلي ..
بتحبّني ؟؟؟
لوني انخطف
شو بقلّها ..
بحبّك ؟؟!!
متل مو بْبالها
...
ما بقولها .. الكلمه
اللي غيري
قالها ..
...
فَتّحت تمّي عا صبح
موّالها ..
و مرّقت شفّة زنبقه
عَ خيالها
فاح الحكي .. لمّا
على حالو عطف
صار السمع
ينزل متل شلاّلها
...
نقّى .. على ذوقو ..
و قطف !!

عصام يوسف

شو بيشبه اللون
لْ بعينيكي
همس الندي
بإدن الربيع
شو بيشبه الضو
لْ بإيديكي
دلقة شمس
متشهوني عليكي ..
بدها تلاقي
حالها
عا خصرك و بدها
تضيع ..
الله .. ما أحلى الشمس
هيّ و عم تحمّم الصيف ..
بخصرك .. بشلاّلها ..
و هيّ و عم تمشّط
ربيع

عصام يوسف


شو بتعرفي عنّي ؟؟
غير إنّي
للحلا بغنّي

ما بتعرفي إنّي
نْ ما دقت وجّك ..
هالخمر
و حِسّيت خصرك ..
هالجمر
و رْسمت صوتك ..
هالصلا
و شْبعت
من ديكي غمر
بيهج عصفور الحبق منّي
بيهرب أبو نوّاس من دنّي
...آخ
لولا بتعرفي إنّي
ان حبّيت ما بْتـنّّي

عصام يوسف

شو بحب كل نهار
إخلق بلون جديد
شي أحمر ..
عْلا شفاف ..
شي ليلكي .. شال
انرسم عَ كتاف
شي أصفر عْلا غْياب
شي ازرق عْلا موج ..
من غِيّاب
شي أخضر عْلا عْيون
حلوي متل كانون
يلبس دفاها تياب ...
...
و ما بين لون و لون
غيّر مسار الكون
إطلع على درْجي
إنزل على درْجي
غيّر و بدّل متل
جوهرجي ..
..
الشاعر إذا تْكرر
ما فيه يتحرر
ما فيه يزرع ورد
بالمرجي
ما فيه يطلع
عالسما درْجي
ما فيه متل العطر
يتفلّت
ان ما انداق خمر
قصايدو
متلّت
متل الله
موحّد .. متلّت

عصام يوسف

قالت إلي
كْتبلي قصيد جديد
غير اللي قلتو
هالمسا ..
غير اللي عتّقتو
نبيد
غير اللي مرجحتو
بإيد .. و ما انْتسا ..
بس بحضن ورده
انتسا !!!..
....
يا حلوة التنهيد .. يلّي
متل مركب رسا
كل ْ ما .. لِبْسِتْ
عيوني جديد
من وجّك بتشبع أسا
...
صرت خاف
انْ قلت شعر جديد
من وجّك ..
يضيع الفرح و العيد !!