صفحة الشاعر عصام يوسف

عصام يوسف

مين لْ قلّك
إنّك زهره ..
ليل و سهره ..
خمر و كاس
..
مين لْ قلّك
إنّك طَلّة بْوج الفلّة
و خد انباس
..
مين لْ قلّك
إنّك لوحه ..
لون و فوحه ..
و صوت جراس
..
شوفي !! ...
انْ قلّك ..
عيسى .. موسى ..
محمّد .. الله ...
الدنيا كلاّ .. شكال جناس
إنّك ملْكه بين الناس
إنّك شمعه بالقدّاس
....
انْ ما حبّيتي شاعر لوّن
دقّة قلبك بالإحساس
انْ ما حبّيتي شاعر دوّن
إسمك عَ الجرح الميّاس
...
شو ما انْقلّك .. زهرك فلّك ..
لونك ظلّك .. نصّك كلّك ..
ما بينقاس
رح بتشوفي الهم احتلّك
رح بتشوفي غصنك باس
..
ويلو لْ ما في عندو شاعر
يتعلّم منّو الإحساس

عصام يوسف

كان العتم
يشرب من عيونو
و يعربد بليل القهر
يفتح عَ شبّاك السما
جفونو..
يدبل من الخوف
الزهر
...؟؟..!!..
زنزانتو أضيق
من شفافو
زنزانتو
أقصر من لحافو
متل الدهر
لو يلبس
تياب الشهر
و سوالفو
من كتر ما خافو
ما عاد ينشافو

عصام يوسف

زيّني خصرك ..
متل قارون
عمّري
صدرك متل
صيدون
شيلي
مْنِلْ كْتاب لْ مْقدّس
سِفْر
هبّطي الهيكل
متل شمشون
....
التاريخ ..؟؟
من دونك
يا حلوي صفر
و منشان حتّى
يكون ..؟؟؟
مِن عنقك لْ محفور
زنبق حفر
بيشيل ليرات
الدهب ..
هالصفر
بيصير بالمليون ..!!

موضوع: تعليق الجمعة أبريل 04, 2008 12:27 am

شعر رائع ومعانٍ رائعة يا استاذ عصام

عصام يوسف

مشتى الحلو

كان شي إنّو
مَ ينزل عَ الصليب
و الليل عم
بيسنّد خيالو
و الجرح عَ المسمار
عم يطفي اللهيب
من دفق شلاّلو
داق التراب و صار
طين و طيب ..
و هوّي و بتالت يوم
عم بيغيب ..
حس عا حالو
قال.. ( هيكي وقتها قالوا )
يا ريت إرجع طيب
و لولا بقي العالم
على حالو !!!
و..
(عا ذمتن قالوا )..
من وقت ما داق
التراب
مشتى الحلو
خطرت على بالو

عصام يوسف

لو يطلع بإيدي
طويت الريح
تا إعملو كتابك
حتّى إذا شفت السما
ما تزيح
و هب الهوى
و صار المدى مراجيح
بيدق عا بابك
...
بفلفش الريح
اللابس تيابك
.....
بلكي إذا شربت المدى
المرسوم بهدابك
بشبع من غيابك

عملية البحصة الشاعرة ثناء بيطار حيدر
وقصيدة الشاعر عصام مخاطبا الجرّاح
عصام يوسف

عا مهل يا جرّاح
يا حسّاس
لا تشد إيدك
عا غصن ميّاس
لمّا الجرح بيكون
من إنجيل
خلّيك...
متل الشمع بالقدّاس
….
تأنّى إذا شفت
الفرح بيسيل
بيكون تم الورد
عم ينباس
و لولا سمعت
صوت الالم ترتيل
بيكون عم يشرب صلا ..
الإحساس
….
بس إنتبه لا تحط بنج تقيل
داخ الورد
ما عاد يحمل كاس
و لمّا من التاج
الحجر بتشيل
لا تشلحوا ...
هيدا حجر الماس

[color=darkblue]عصام يوسف

قالوا يا فاتح
إنت مش إنسان
وجودك وقت
لمّا مرق .. ما كان
غيابك خيال
و طلّتك ماشي
صوتك حكي
ما نقال .. من نيسان
همسك متل غبره
عالغباشي
...
رد الحلا و قلّن
كنت عطشان
بمشتى الحلو
صدفه أنا و ماشي
شقّيت باب الصبح
عالوجدان
لقيت الجرح .. " فاتح " ..
على الشاشي..
عطر و قصيده
و الحبق عشقان
دلقة ندي
عا شفاف حوّاشي
...
هَوْ كلّهن " فاتح"
سما و ألوان
بكوخ الفقير
و بيت الفراشي
...
الإنسان !!
شو الإنسان.. ؟؟
...
مرقة حلم عالضو ..
متلاشي....---------------------------------------------

ليش الولاد بيلعبوا ..
ما بيتعبوا ؟؟!!
بْشو بْيحلموا ؟؟
هنّي و على ضهر القبو
بيعمّروا حجار و حكي
واحد بيجرح إصبعو
التاني بكي ..
بيعربشوا بضو القمر
بيزوزقوا سهل و صور
بيخزّقوا تياب السهر
و بيدخلوا عَ المملكي ..
شي بيعملوا
فرسان
شي بيلبسوا
تيجان
شي بيخسروا
شي بيغلبوا
بيصدّقوا..
وج السما
ما أقربو !!!
....
يا ريت لو بس الصغار
بيلعبوا
يا ريت لو بس الصغار
بيكزبوا
...
لو كنت بعرف في بحر
بيردّني للولدني ..
تا إشربو ..!!!
[/color]

عصام يوسف

هودي اللي
مجد الشعر بيفوتن
و الخيخنه
بتعيش من قوتن
بيجمّعوا الكلمات
بمقشّي
و بيبيّعوا
القصدان بالكشّي
يا ريت لو بيبيّعوا
سكوتن
...
مرّه قلت
للجاذبيّه .. نروح
و نزورهن
شي نهار ببيوتن
ردت و قالت
من قلب مجروح
"عهر البشاعه
نام عَ تخوتن
كيف بدّي روح
عَ بيوتن "
...
ايه .. يلعن الساعه
اللي خلقت فيها
و يلعن
أبو التفّاح .. و نيوتن

عصام يوسف

ضيّعت وجّي
من سني
و لليوم مدري
شو بني
فتّشت
تحت قصايدي
دوّرت
خلف السوسني
قبّيت طربوش
السما
زحت
الصور الملوّني
ما لقيت وجّي
بهالمدى
و لا لقيت
مين يدلّني
...
يمكن إذا
بيضيّع الشاعر حدا
ما بيلتقى
في هالدني !!!

عصام يوسف

بيمر عا جسر الحكي
وج الصلا
حامل على شفافو
يسوع من الحلا
بيشدّني .. بضو القمر
بيلفّني .. بغيم الوتر
بيردّني ..
صبح انجلا
..
آه يا جسر الحكي
شو بحبّها ..!!
و بخاف قول بحبّها
ما أجملا !!
ما أجملا !!!
ما اجملا !!!!
...
بكرا إذا ليل
القصيدة صبّها
و كاس العطر
فيها انتلا !!
قبل الورد ما يغبّها
عنّي ... إسألا..!!؟؟

عصام يوسف

قدّيش صرلي
ما كتبت وجّي
عا سطور عينيكي
قدّيش صرلي
ما خلقت حجّي
تا شم خدّيكي
..
يمكن لأنّو الصدق
بينجّي
عم بكزب عليكي
و كل ما عا صدرك
إفتح القجّة
نجوم السما
بيهرهرو .. هيكي
..؟؟!!!
و صدرك طفل
أول ما بيهجّي
بيصير يقرا
بكفّك شفافو
و بيخربط بصابيع
إيديكي ....

عصام يوسف

ختير جبيني
من تقل وجّي
العتيق ..
و ما عاد يحملني
السهر
من كتر ما السيف انشهر
جرحي انشهر
..
تا صرت خاف
من الطريق
يسهر متل هالليل
ما يقدر يفيق
و حس الوقت
فيّ ...متل شي كاس
من عمر .. انكسر
..
يا ريت فيّ اشربك
متل الحريق
ما بيشرب خوابي
الشجر
حتّى إذا بعيونك
العتم انطفى ..
شعّل قمر

عصام يوسف

من بعد ما راحوا
الضيوف
مرقتي متل ما بيمرقوا
بعرس البدو
شفار السيوف
صرتي تصبّي
جمرة جنونك
و إشرب أنا و وجّي
من عيونك
أحلى السهر آخر مسا
لمّا اللي كلشي غير
خمر ... بينتسا
و بيخلصوا كل الضيوف
بيضل إحساس القصيده
عا الورق
متل الحروف
...
شو السر بالسهره
إذا فيها ضيوف ..
بحسّها متل القناني
عا الرفوف
و شو السر بالسهره
إذا فيها قمر
وجّك بيطوف
بحسّها رهجة سيوف
و شو السر بالشاعر
إذا بيسهر معك ..
بيحس ... ما بيقدر
يشوف

عصام يوسف

ليش الحقيقه هيك ..؟؟
ما بتنشاف !!
لا خصر إلها
لا صدر لا شفاف
متل نهر الغيم
مالو ضفاف
لا دلب يشهقلو هلا ..
لا يغنّجو صفصاف !!
...
آه ... يا نهر الحقيقه
يا حلم ..
أبيض متل لون العفاف
بيطق قلبي !!
من العطش تا إشربك
بس وجّي
من الغرق بيخاف ..

عصام يوسف

قال الخشب ..
مش عاجبو النجّار !!
....
صار يحكي عليه بغيابو
و يحرّض الجاكوش و المنشار
يقلّهن .. شو هالحكي ؟؟
ما في حدا يهابو !!
شو مفتكر لعبي .. أنا بإيدو
بيصير يتسلّى بْضجر صوتي
عا لون تنهيدو
متل الصدى بيكسّر حروفي
بيقعد يهجّي الآخ بحروفي
و بيحز بالمنشار ..
تَ يسمّع الجيران معزوفي
و بيشك هالمسمار بكفوفي
.....
يا هالخشب يا ناكر جميلو
نسيت لمّا كنت بالغابي
عم تنطر غيابي ..
قدّيش كنت بغصن توميلو
و مرسال مع مرقة بنت حلوي تودّيلو
"وينك يا هالنجّار خلّصني
برد العمر بيضل يقرصني
بقلب المغاره حدّنا ديابي
و بالليل عم بيمر حطّابي
خايف إذا ببقى..أنا و هالولدني
لَ آخر قطاف الدني
عطر الصبا يطلع من جيابي
و الوقت يسحب خيط إيّامي .. المسا
و تـْنـَسّل تيابي "

هيك الخشب متلو متل هالناس
كل ما يجي خلاّق من قدّاس ..
معجوق
من سَفرة سما الإحساس
تا يــِعْملْن كلّن تِحف
بتوقع خيالاتن شقف
شي بيحترق بالنار
شي بياكلو سوس العمر
دخنه و عتم و غبار ...
.....
يا ريت لو إنّو الخشب
بيصدّق النجّار
بيجوز تحفه صار !!!!

عصام يوسف

بْتـَعرفو ؟؟
متل لْ كإنـّي بَعرفو !
متل لْ كإنّي بَعرفو .. و ما بَعرفو !!
يمكن صبي بالمدرسه ..
دشّر خيالو عالورق تَ يْنـَشـّفو
يمكن شي راعي بالجرد
متعلّم هبوب الهوى .. و عم يعزفو
يمكن شي زر بْنفسجي
خايف تجي بنت الربيع .. تقطـّفو
يمكن .. عْذرني ..بالغلط عم شبّهو
معقول يا شاعر إنت ما بتعرفو؟؟!!
هيدا الوطن يلـّي جروحْ .. بْتـِنزفو
هيدا الوطن يلـّي ربيعْ .. بتقطفو
يلـّي وقفت إنت بوجه كل الدني
حتّى الدني ما تـْوقّفو ....
يا صاحبي ..
لْ بيضيّع الصبح بقلب عتم الشتي
هوّي و نهر عمرو عطر مَيْطوّفو...
...
لا تسألو بالليل عن وجّ القمر
....
ما بيعرفو....
!!!!!!!!!!!!!!

عصام يوسف

هالخـَيط ... شو بالو طويل !!
عالأرض شو خيالو تقيل !!!
متل نهر اللون
عم يشرب برتقان الأصيل
متل وزن الآآآآآآآخ عالبحر الطويل
متل شَعر الليل عَ كتاف القمر
متل شلاّل الوتر..
بيطرطش خيالو عَ شبّاك السهر
متل غنيّة نهار.. صوتو حلو
تعبت شفافو من السفر
هالخيط شو قلبو حنون .. ما أطيبو !!!
بيمرق عَ جرح .. بيقـْطبو
بيمرق عا شال.. بيخـْطبو
بيسأل عَ لون زرارها .. و بيشربو
و بيلبس الشمعه
تَ يحرق قلبها و تدوّبو
....
من يوم ما صار الجَمل
من خِرْم إبره يْفوت
و صار الغـَني
يدخل على المَلـْكوت ...
من يومها .. هالخيط
عم بيكسّر بواب السكوت..
وجّو مْختير
متل بيت العنكبوت
بـِتـْشِك بجنابو الإبر ..
و بْيـِسأل عْـلى كربلا..
بدّو بْكرامه يموت !!!

[b]

عصام يوسف

الشاعر..
خلق ما في حدا
قدّو
و لو وقّفو
كل البشر ضدّو
بيفرض بقوّة منطقو
دستور
يمشّي الطبيعه
متل ما بدّو

الشاعر متل بستان
كلّو زهور
تجاوز مفاهيم الزمن
حدّو
لْ بيعمّر التاريخ
بالمنتور
غير اللي بالبارود
بيهدّو

الشاعر نبي
بالدين مش مذكور
كل البشر
عن منهجو ارتدّو
بيطلع دراج .. دراج
من بخّور
يقطّف
عناقيد السما بيدّو

الشاعر
ما بيزلّو شعر مأجور
من هيك
فوق المادّه بعدّو
و لمّا أبو الطيّب
هجا كافور
طرقتو خمس بوسات
عا خدّو

بتصدقوا إذا قلت لكم أن الإبداع بدوخني، يا ملوك القلم وأرباب القافيه وانسياب المعنى الأصيل في سهل ممتنع. آه ما أروع هذه القصيدة الأخيرة ، سلمت يداك.
"الشاعر متل بستان
كلّو زهور
تجاوز مفاهيم الزمن
حدّو
لْ بيعمّر التاريخ
بالمنتور
غير اللي بالبارود
بيهدّو"

"وخير الكلام ما قل ودل"

عصام يوسف
تلت التلاتي

حدود الكون أضيق من صفاتي *** و مَ وصّل عا طموحي و مكرماتي
لأنّو للزّمــــــن بيضــــــل تابع *** و أنا ما صــــــرت تابع في حـياتي

المجــــرّه و الكواكب و التـوابع *** بيحــــبّوا الجـــــاذبيه بمفــــرداتي
و لمّا بالتســــــارع صرت تابع *** قطـــــــــــع حد التصّور دفع ذاتي

و إذا الخــــــط البياني بكل تابع *** رســـــــــم حالو على ضفّة فراتي
بيخلـق للطـــــــــــبيعه بعد رابع *** تَ يتخيّل عَدد حـــــــامل صِفاتي

إذا بتتحــــــرّك بإيدي الأصــابع *** كأنّو الأرض فاقـــــــت من ثُباتي
بَراكين و أعاصـــــــير و زوابع *** من الطــاقه اللي طلعت من نواتي

إذا الله ارتـــاح بيوم ســـــــــــابع *** قلامي ما ارتاحـــــــت من دواتي
و إذا هالموت كل الناس ســـــابع *** انا بقيامـــــتي ســــــــــابع مماتي

مجد فينيقيا هالشــــــرق طــــابع *** مشـــي فوق الأرض لابس عباتي
و تايهديها من الخـــــلاّق طـــابع *** هداها بعــــــــــــلبك من بعلبكاتي

ســـــــجيع و راجح و فاتح منابع *** لِطوفان لْ عَ صــــحرا الفكر آتي
إذا حسّان معهم ربـــــــــــع رابع *** أنا بيناتــــــــهن تلــــــــت التلاتي

و إذا عا كرومنا جـــــــابو مْرابع *** خلط بجـــــــــرارنا زيتو النباتي
أنا الطهر لْ بجرن الزيــــت قابع *** ما برضى جـــاهل يعكّر شرودي
و لا برضــى كافر يدنّس صلاتي

عصام يوسف وقصيدته الجديدة
اعزميني يا وراقي

عزميني يـا وراقـي عالكتابـي***و عَ جنيّة حبر تشـرب عَذابـي
و حبقة عـن سطـورك قطّفينـي***متل ما قطّف الصّبح .. الضَبابـي
و متل شمس الخيـال البوشكينـي***افتحي شبّاك قلبـك عَ الصَبابـي
الشمس نِعست عَ وجّك ياسمينـي***و عَزمها النوم عَ سْرير السَحابي
مَ بِسْتغرب إذا بْيطـرَب حَنينـي***بِصوت الريح عَـم يفتـح كتابـي
مَ زالـو تنينهـن للـورد زينـي***شو فيها العْود لو يعشق رَبابي ؟!
كيـف حجـار بتعمّـر مدينـه***؟و مشتل ورد مـا عمّـر ترابـي!
يـا ريتـو بـرج بابـل نسينـي***و كسر لوح الشريعـه حَمُّرابـي
أنـا إحسـاس منجيـره حزينـي***ببيت مْن القصب فـوق الروابـي
لـو مـا يسـأل علـيّ أنيـنـي***يمكـن مـا حـدا بيـدق بابـي
عزمني الصوت عا عرس السَكيني***وقفت عَ النهـر تـا بـدّل تيابـي
تاري عَ الوقـت ضاقـوا سنينـي***و من تقل الدني انخزقوا جْيابـي
متل مَ بيحمـل البحـر السفينـي***عَ موج الذاكـره بحمـل غْيابـي
و مَ بفزع بالفضا ضيّـع جبينـي***لأنّـو هالدنـي بتلحـق سَرابـي
و إنتوا يا بشر من غيـر طينـي***نِسـي فِخّارهـا طعـم الخَوابـي
حاجي تـدوّروا بقلـب الخزينـي***روحـوا نبّشـوا تـراب الحقيقـة
لأنّو الجَوهـره بْقلـب الخَرابـي

__________________

مدّيت إيدي .. مسحت وجه الشرق ... رجّعت إيدي كلـّها غـَبرا

أبدعت أبدعت أبدعت ...من الفلسفة للتاريخ للأدب...

موضوع: عزميني الأربعاء أبريل 29, 2009 6:13 pm

عزميني عا الكتابي يا وراقــي *** كل ما حَن قلبك ع فراقي
لأني بعرسك الصاخب ربابي *** ووتر مشدود ع لحنو فراقي
ولأنو بينك وبيني قرابـــــي *** ولأنك من ضميري وع مراقي
ما بين التصابي والصــلابي *** بطّعــّم عنفوانك من رواقــي
عزميني كل ما عطشو الخوابي *** وعلى صدرك بساعة إنطلاقي
أنا بنزف على سطورك كآبي *** وورقة ترتوي وعطشان ساقي
عزميني ورغم مَ طَوّل غيابي *** وصار الدفل ع حفاف السواقي
عأرز الرب يشمخ عا الروابي *** ويتغاوى على النخل العراقــي
استحي من وراق يا حروف الرتابي ** * ويا صيصان القصيد العم تقاقي
عزميني يا وراقي عا الكتابي *** ما كانت راقيي وحلوي القصيدي
لوما اللي كتبها كتير راقـــــــــي

كل الإحترام للشاعر وللقصيدة

ممتاز استاذ حسن، واعجتني فكرة " نزف الكآبة على السطور" وهي الكآبة المبدعة للشاعر والكاتب والأديب فمن رحمها ولد المفكرون.

» محاورة مع الشاعر عصام يوسف
» مقومات الشعر ومعايير جمالية جديدة الشاعر عصام يوسف
» عصام يوسف طوني شلهوب
» توقيع كتاب عصام يوسف
» شَعرِك يالون الرّيح عصام يوسف